Tuesday, June 27, 2006

سوالف

الدعوة لترك التدخين مستمرة...!!!
والله غريب امرك يا انسان، بساعة واحدة مزاجك يتغير اكثر من مرة وتعيش كل الحالات وحدة ورة اللخ بيوم واحد اذا مو بساعة وحدة، ما اريد الكلام الي دا اكتبه يبين انو اني ضايجة او كئيبة او اكو شي زاعجني، حتى لو اكو، فالاسباب الي زاعجتني ما اكدر اغيرها لان تغييرها مو اني الي مسؤولة عليه، يعني لو اريد اعددها للاسباب، اولها الكهرباء، مثلا ماكو كهرباء وظل الشعب العراقي يطالب بالكهرباء تالي بطل وماكام يطالب بحقه الشرعي بيها ورضى بالامر الواقع واعتمد على المولدات الكهرباء حتى يحصل على الكهرباء، اشو بعد ما رضى بالامر الواقع واجه مشكله ثانية واكبر، هو ندرة البنزين واحنة بلد نفطي وعدنا موارد غنية بالبترول وما نلكة البنزين الي يكفي ويسد حاجتنه، لان المولدات تحتاج ينزين حتى تولد الكهرباء المطلوبة، تنازل العراقي عن حقه بالكهرباء وكال ملازم الكهرباء مومهمة، هسة نريد بنزين، وين البنزين ووين النفط بالشتا ووين الغاز؟؟ شنو نبطل وما ناكل ولا نشرب ولا مدري شنو؟؟

نجي على مشكلة لخ، الانفجارات الي دة تصير واحنة هم ما مسؤولين عليها ولا نكدر نسيطر عليها ولا نكدر نحذفها من الوجود، اوكي، لعد شنو الحل، يعني قبل فترة جانت الانفجارات تصير على قوات الاحتلال الي اني جنت فرحانة بوجودهم بالعراق لان توقعت انو راح يصير تغيير ايجيابي بسببهم، لكن يوم بعد يوم اني بديت اضوج من فكرة وجودهم هنا، لان كل الي صار النا بسببهم اولا وبسبب بعض العراقيين ثانيا وبسبب الارهابيين من الدول المجاورة ثالثا، يعني التفجيرات الي تصير ما اعتقد ممكن اكو عراقي عنده عقل ومسلم ومؤمن بالله وبدينه او حتى لو كان مسيحي الشخص، ما اعتقد دينه يقبل بقتل الناس، لان كل دين سماوي حرم قتل النفس التي حرم الله، بغض النظر عن الديانة نفسها، لهذا اني متأكدة انو بس ضعاف النفوس الي غرتهم الدنيا بفلوسها همة الي يكدرون يقتلون ويفجرون ويأذون باقي البشر.. طبعا هذي من جهة، لان اكو بعض الناس يوصفون هذا الارهاب بالجهاد في سبيل الله، اوكي، كلنا جاهدوا بس مو هيجي لان رب العالمين ما كال الجهاد من واحد يفجر نفسه يم مدرسة او يم سوك او يم لمة شباب مجتمعين، او بأي مكان ثاني بي ناس ابرياء ما الهم ذنب، الجهاد المفروض يصير بس على المحتل، بس منو يقرا ومنو يكتب، اذا ضاع الاخضر بسعر اليابس، مستقبلنا ضاع بسبب الي دة يصير هنا، الاخبار تحجي عن القتل والانفجارات والاغتيالات، وكل يومية صايرة كارثة انسانية وناس يتأذون والسبب ارهابي، وانقتل الرزقاوي وما خلصنة من شره.
ضاع الحجي، جنت مسترسلة بالكلام وعلى غفلة كلشي راح، يلة المهم خليني اكمل كتابة واشوف ليوين راح اوصل، حاليا ساعة 3 بالليل، طبعا سهرانة لان ماكو شي عندي باجر، لا التزامات ولا شغل ولا دوام، وبأي لحظة تطفة الكهرباء، المهم، دا انتظر نتيجة امتحاناتي بفارغ الصبر، هذي السنة جانت مختلفة عن السنتين الي انقضوا بالكلية من كل النواحي، مثلا، اذا من الناحية الدراسة فبهاي السنة واجهت صعوبة اكثر من السنة الاولى والثانية الي ، لان الدراسة صعبة واسلوب الاساتذة مزعج وعدا هذا احس ماكو دافع وواهس للدراسة، بنفس الوقت خذلت نفسي لآول مرة بحياتي، لان وعدت نفسي ان اطلع تقدير( امتياز) بهذي السنة على الاقل واني متأكدة تقديري راح يكون اقل من جيد!!!...هاي من جهة، الاختلاف الثاني، الحماسة الي جانت موجودة بية او بصديقاتي مختلفة، اهتمامنا بروحتنا اليومية للكلية قل يوم بعد يوم وطبعا هذا بسبب سوء الظروف الامنية ، وكل الطلاب دة يواجهون المشكلة نفسها، ومن ناحية ثانية، بس اعتبره شي ايجابي، علاقاتنا الاجتماعية اختلفت، ومعارفنا زادوا، وجانت الي ايام حلوة ومميزة بقت بالذاكرة ولحد الان.
بعد على شنو ردت احجي؟؟ طبعا كلما اقرأ بلوك جديد اكتشف غرابة العالم الي احنة بيه، مرات اكول شكد حلو ان نلكة صفات متشابه وية اشخاص تبعدنا عنهم مسافات طويلة وكل الي يربطنا بيهم كلمة وحدة انو احنة كلنا بشر، مختلفين بالشكل وبالدين وبالتفكير والمعتقدات ونمط الحياة والمجتمع بس يبقى بينا شي واحد متشابه، احساسنا واحد، كلنا نحجي عن الاحساس، بنفس الوقت اكتشفت انه نسبة الاشخاص الي يعانون من شي بحياتهم عددهم جبير، منهم او الاكثرية منهم عدهم امراض نفسيه، كتاباتهم جذبتني الهم لان حسيت بيها من صدك معاناة، بس معاناتهم تحدد بأسباب معينة، اما ضعف الشخصية وعدم الثقة بالنفس، اما شخص وحيد وما عنده اصدقاء، او حبيب فقد حبيبه لسبب معين، او انسان انصدم بحبه الاول وبقى طول الوقت يكتب معاناته واحلامه المحطمة على البلوك ويوصل احساسه لآكبر قدر ممكن من الناس، او مراهق يكتب عن اهتماماته بالحياة، او انسان مو طبيعي ويكتب مواضيع اكثر من مرة قريتها وما فهمت المغزى منها شنو، واخر شي شخص ما يعرف شنو يريد وليش يكتب، لله في خلقه شؤون..

6 comments:

layal said...

تصدقين كلامك يعلمنا اشلون أخوننا بالعراق عايشين
اتمني لك التوفيق بانتيجه الامتحانات
بالنسبه للمدونات
لله في خلقه شئون :-)

عندي نصيحه صغغغيره
ياليت تتقبلينها مني
حاولي تكتبين كلامك بفقرات اقل وتنشرين كل يوم جزء منها من غير اطاله
او حاولي تختصرين المواضيع
وتخلين لكل موضوع بلوغ لحاله
بالتوفيق :-)

LionKing said...

سوالف ... عنوان كلش حلو مبين من عنوانة شي يخص العراق كلمة سوالف كلمة دارجة باللغة العراقية وتستعمل بكثرة واكيد بعض بلدان الخليج يستعملوها بس من قريتها حسيت بعراقيتها اكثر ...
اكثر ماعجبني بالموضوع شيئين الاول هو عنوان الموضوع والشي الثاني الكلام اللي بديتي بعد ماانهيتي الكلام عن العراق واللي خص امتحاناتك ومستقبلك وطموحك اللي متأكد منه انه راح يكون شي مميز الك وبمكانه تستحقها شخصية مثلك .. اما لواقع دراستنا الملل والتعبان جدا والله اذب اللوم على الاساتذة اللي وكانما يعيشون في عالم مثالي ويتصرفون وية الطلاب وكانما الضروف كلها زينة .. احنا اللي علينة نسوي واللي يرضي ضميرنا .. بس كونك تكولين على نفسك خذلتيها امام ضرف صعب مااسمي هذا خذلان وانما اسمية تحدي لكل الضروف الصعبة اللي عشتيها بطول السنة واللي ان شاء الله تعدي على خير بنجاحك الاكيد فلاتكررين كلمة خذلان وانما كولي تحدي والتحديات هواية بحياتنا ...
اما بالنسبة لعالمك البلوكات اللي انتي خليتيني اطلع علية فعلا هوه عالم متنوع وسي احداث حلوة ومعلومات احلى بس بالنسبة للانسان كونة دائما يحتاج الى شخص يحجي اله او يفرغ ماعندة فمنهم من يجد هذا الشخص المناسب !! ومنهم من لا يجد فيضطر الى الكتابة والتنفيه عن مايدور في البال ... قبل جنت احتاج ان اكتب هواية بس حاليا احتاج ان احجي هواية !!
سولفينا بعد ومتعينا بالسوالف والمواضيع المميزة دائما منك فقط ...

Michomeme said...

لايون كنك، شكرا على كلامك و تواصلك الدائم..موضوع العراق و الي

يصير بيه شكد ما احاول ابتعد عنه الكة نفسي ارجع احجي بي مرة ثانية، منو

بينا ما يكدر يفكر بهذا الموضوع؟
المشكلة انو هذا الموضوع ما اله حل ومو بيدنا تغييره...نبتعد عنه شوية

بس صعوبة الحياة و ظروفها هي الي تجبرنا على الكلام بي..بالنسبة الي

اشوف حياتي كلش حلوة..اذا عالدراسة برغم اسلوب الاساتذة او صعوبة

التعامل وياهم..واكيد مو بالضرورة كلشي يكون بسيط وسهل..يعني

موضوع الدراسة نكدر نتجاوزة..حتى لو ما حققنا طموحنا، وبخصوص

حياتي الاجتماعية وية اهلي والناس القريبين الي و صداقاتي اعتبرها حلوة،

و اذا عالصحة الحمدلله و الشكر عليها.. صح ما أكدر اوصف حياتي

بالكمال لان ماكو شي كامل لكن يكفيني اشوفها كاملة بعيني و مكتفية باللي

عندي...فالشي السلبي والطاغي بيها هو الوضع الامني الي دة نعيشه،

وباقي المواضيع اشوفها سهلة لو اقارنها بوضع العراق..وممكن حلها.

مستقبلنا والي يصير بيه سواء عجبنا او لا، لازم نرضى بيه وخاصة باللي

يتعلق بالدراسة، الاهم منها ان نسوي الي علينا وان شاء الله التعب ما يضيع

وبنفس الوقت نتقبل النتيجة مثل ما هي اذا حققت طموحنا اولا، المهم ، نسوي

الي علينا.
الموضوع الثاني الي بالبلوك، بديت افكر بيه من فترة، لان كلما ادخل على

مدونة جديدة اكتشف شي جديد، شخصيات، مختلفة ومتنوعة ، افكار جديدة

وشخصيات ما نتوقع ان نلكاها بحياتنا، وبنفس الوقت اكو شخصيات مشابهة

النا، يجي يوم واحجي عن هذا الموضوع بالتفصيل..لان عالم واسع

جدا..اكثرية اصحاب المدونات لجأوا للكتابة حتى يفضفضون ويشكون او

يحجون بأي موضوع، اكو منهم لكوا الاشخاص الي يحجون الهم عن حياتهم

واستمروا بالكتابة(مثلي يعني) تواصلي وية الي اعرفهم ما منعني من

الكتابة، بالعكس، اعتبر البلوك مكان للمشاركة وية الناس الي اعرفهم

بمواضيع تهمني، ولو القليل منهم يعرفوني معرفة شخصية، القليل، القليل،

يعني اختي وانت واتاوي..وبس
واكو اشخاص ما لكون ناس مناسبين يحجون وياهم ويتناقشون وياهم

فيعتبرون الكتابة الوسيلة الوحيدة للتنفيه عن النفس..الكلام بهذا الموضوع

طويل، واحب تحليل الشخصيات، مو لان اني طبيبة نفسانية، بس لان احب

احلل المواضيع والشخصيات..
وقبل جنا نحتاج للكتابة، وهسة نحتاج للكتابة والحجي..مو لو مومو؟؟
شكرا الك مرة ثانية على كلامك الحلو..

l said...

السلام عليكم ورحمة الله

اولا الله يحرر ارضكم ويفرج همكم ويداوي جريحكم ويرحم موتاكم

ثانيا انا عندي تعقيب على الموضوع واولها مثلا انت كاتبه ان احد اسباب الارهاب في العراق ارهابيين من الدول المجاورة وانك متأكدة انو بس ضعاف النفوس الي غرتهم الدنيا بفلوسها همة الي يكدرون يقتلون ويفجرون ويأذون باقي البشر
ترى اغلب اللي حولكم مليانيين فلوس فما يقتلوا اعمارهم عشانها اما عن ضعف النفس فمافي احد ترك اهله و ماله ودنيته ليجهاد اعداء الاسلام ويكون ضعيف نفس
اذن
انا متاكد ان الخطاء مو من الدول العربيه المجاوره،، بس يمكن يكون من دول مو عربيه مجاوره
...
اما عن دراستك فربي انشالله يوفقك يارب وتاخذي كل الدرجات الي توقعتيها واكثر
...
اما عن البلوقات ففعلا في منها غريب وغريب جدا بعد ههههه وفي منها ظريف وفي منها مفيد

اخيرا مو اخرا بالتوفيق انشالله
ومشكور على الزياره
وفي امان الله

layal said...

ميشو لا يكون زعلتي ؟؟

Michomeme said...

مرحبا ليال
شكرا على تعليقك وكلامك وتواصلك وعلى النصيحة الحلوة..وماكو زعل..
واني احترم رايك وهذا شي شخصي.. وما يوصل الى الزعل ابدا..

اني بطبعي احب احجي هواية، واغير بالمواضيع وانوع بيها، فما اعتقد ان اغير هذا الشي بطبعي لان صفة تميزني، اني بحياتي الاعتيادية اكون على هذا الشكل..
فما اعتقد اكدر اغير صفة من صفاتي، واحب ابقى على طبيعتي وعفويتي دائما مثل ما اني اريد ومثل ما كل اصدقائي يعرفوني..

وشكرالك على النصيحة مرة ثانية
واكررها..ماكو زعل

تحياتي..
ميشو