Sunday, July 02, 2006

جاي وكليجة...واحلى صحبة


جاي وكليجة، وكلام ومواضيع ولا اروع وية احلى صحبة، احلى صديقات ، سوسو ووسونة، ولولو صديقاتي، جان يوم حلو برغم الحر واجتمعنا من جديد من بعد فترة طويلة بسبب انشغالنا بالامتحانات، لولو نجحت ووسونة نجحت، وبقينا اني وسوس ننتظر نتيجة الامتحانات وما تبقى الى بس سنة وحدة عالتخرج، صارلي اكثر من ست سنين وياهم، احلى ايام واحلى ذكريات ومواقف ما انساها، الثقة بينا حلوة، الحب والاحترام متبادل بيننا، الله يخليكم الي يا رب...
اني معروفة بحبي لل(كليجة) بس مو اي (كليجة) . اكيد دا احجي عن بيت سوس، بكل عيد يسووها ولازم ننجمع يمها وتكون حصتي موجودة، وبيت لولو بعد اطيب كليجتهم، كل ما يسوون كليجة تكول ميشو حصتج موجودة، وحتى ماما ما تزعل عليه، الكليجة الي تسويها طيبة كلش، وما انسى كليجة خالتي توتة، ما اعرف هذا الحب للكليجة من وين اجة، وما اكدر اكل اي نوع منها، اكو مواصفات معينة احبها وغيرها مستحيل اكلها، احبها بالتمر والجوز، وشكلها يكون حلو مثل الي بالصورة، يمكن يجي يوم واتعلم شلون اسويها حتى تصير حسب المواصفات الي احبها..والناس اذواق، ممكن تعجبني وما تعجب غيري، مرة جربت اني ووحدة من بنات عمي نسويها، حضرنا المواد المطلوبة، والصواني، وبدينا بيها واخذنا وقت طويل، والنتيجة كانت افشل من الفشل، بس محاولة حلوة، ويكفينا شرف المحاولة، اكلوها وضحكوا عليها ومن ذاك الوقت ما حاولت مرة ثانية، لان لازم اعرف بالضبط المقادير شنو وبعدين احاول حتى تطلع النتيجة مثل كليجة ماما او بيت سوس او لولو..
واكيد، الدعوة لترك التدخين مستمرة لحد الان.!!!

6 comments:

LionKing said...

معلومة جديدة انه تحبين الكليجة الى هذا الحد .. ف الف عافية عليك وعلى الكليجة اللي تحبيها الى هذا لحد ... اختيار عنوان الموضوع حلو كلش ويخيل لي باجواء الخير واللمه الحلوة اللي ان شاء الله تكون حافلة بالامان والاستقرار .. ان شاء الله ماتنحرمون من هذه الكعدات وتكونين دائما فرحانة بوجود الناس اللي يملون عليك ايام حياتك بالشكل اللي تحبي كحبك للكليجة !!...
فالنقف باجلال واحترام الى كل من يسوي كليجة بالمستوى المطلوب .. والف عافية

Michomeme said...

هاااااااي لايون كنك..صح ممكن يكون حبي للكليجة معلومة جديدة بس من صدك مو اي كليجة،
ذكرتني الصورة الي اخذتها بكاميراالموبايل لههذا هي مو واضحة، ذكرتني بأيام العيد قبل الاحداث، نكدر نسميها ايام الخير لان على الاقل جان امان واستقرار، وان شاء الله يا رب يرجع النا الاحساس بالامان من جديد واتعلم اسوي كليجة بالمستوى المطلوب،
واشكر الدعوة الحلوة منك، ويا رب الله ما يحرمنا من الناس الي نرتاح بوجودهم ويانة..
والله يعافيك

Michomeme said...

هاي سارة
شكرا على حضورك
منو بينا ما يحب الكليجة، الكليجة المفضلة عندي يكون حجما صغير، ومحشية بالتمر او باللجوز، وتكون بيها نكهة الهيل والحوايج والدارسين..ومو بالدقيق الاسمر، لكن الصورة مبينة ان الكليجة مصنوعة بالدقيق الاسمر،
واكيد الكليجة عندكم طيبة، والف عافية على كليجة منطقة القصيم، وعندنا المنطقة المعروفة بصنع الكليجة..بغداد..لكن باقي المحاظفات هم ينصعوها، وبكل منطقة تكون الكليجة الها نكهتها الخاصة..

تحياتي..

layal said...

عليكم بالعافيه
بس وين حصتنا من الكليجه؟
احنا ما عندنا الا الكليجه الجاهزه
بالهيل او بالنخاله

ii said...

كليجاا؟؟
كنت احسب بس أهل القصيم يالكون الكليجا ..
وطلعت الكليجا عالميه ووصلت للعراق
:P

اعتقد طريقتها تختلف عندكم

صرنا نشترك انا وانتي بشي يجمعنا
فأنا من ديرة الكليجا
:D

Michomeme said...

هاي ليال والله يعاافييييييك
وحصتكم من الكليجة توصلكم..من تكون صنع ايدية وحياة عينيه..لكن شلون اكدر اوصلها الكم؟؟؟


سعلوة..
عجبتني صورة الطفل الي مختارتها..غريبة
بخصوص الكليجة، قديمة جدا ومعروفة من ايام زمان ، وعالمية ...لكن الظاهر معلوماتك عن العراق قليلة، اتصور الكليجة اصلها عراقي..ومعروف عنها انها اكلة عراقية...

واهلا بيك في المدونة، وارحب بتعليقاتك..