Thursday, April 20, 2006

ارهـــــــاصـــــات شابة!!

you raise me up so i can stand on mountains
you raise me up to walk on stormy seas
i'm strong when i'm on your shoulders
you raise me to more than i can be...
واو على الكلام الرائع، شكد ما اسمع هاي الاغنية ما امل منها.
أعرف صارلي فترة طويلة ما كتبت شي بالبلوك ،بس عندي اسبابي
كان الاسبوع الماضي من اصعب الاسابيع، اولا: لان كان عندي امتحان التاريخ الخرافي...واكثر الوقت كنت اقرأ ، ونفسيا كنت تعبانة لان الظروف الامنية سائت خلال هذي الايام، الحرب قامت خلال اليومين الي راحوا، ناس انقتلوا وناس قتلت والرعب صار صفة ملازمة للعراق واحنة كاعدين ننتظر الفرج من رب العالمين وندعي يا رب احفظ العراق والعراقيين..يا رب زيح الهم عنا..واحفظ اهلنا واصدقائنا واحبابنا ولا تحرمنا منهم..وتعدي الازمة على خير ويحفظ الجميع.......
السبب الثاني ونتيجته الاوضاع الامنية..وحدة من صديقاتي المقربات راح تسافر لفترة معينة وما ترجع الا على بداية الامتحانات النهائية..وهذا الشي صدمني وانقهرت عليها لان دا اشوف الوضع شلون يغير احوال الناس ويأذيهم، كله قتل واختطاف وما خفي كان اعظم...قبل سنة صديقتي (يوني) سافرت بسبب الظروف الامنية وهسة صديقتي (علوش) ويا عالم يجوز الدور يجي عليه واني الي اضطر اسافر واترك العراق وكلشي ورايه....
بعيد عن السياسة والاوضاع الي ما نكدر نتغاضى عنها..لان ما يصير ينتهي ونقضي عمرنا بس نحجي بهذا الموضوع..عراق..انفجارات ...الخ...وخلينا نحاول نعيش حياة طبيعية مثل باقي العالم
احاول اركز فكري على موضوع جديد شاغلني قبل فترة، اخذت فكرة الموضوع من مادة تاريخ الادب الفرنسي وربطتها بالواقع والحياة ...مادة التاريخ تتظمن عدة محاور ادبية وما يتظمنها من مواضيع تخص الفلاسفة والشعراء واحد هذي المواضيع هو الحب وانواعه...
اكتشفت ان الحب مصنف الى نوعين بالنسبة للفلاسفة الفرنسيين...
مثل الحب العقلاني وبالفرنسي
l'amour raison
الحب العقلاني هو الحب المبني على العقل وقراراته الصائبة، لا تتحكم المشاعر بالانسان ولا تسيطر على قراراته ..ومن انجح انواع الحب.. لان الانسان راح يحب الشخص المناسب اله..(طبعا هذا رأيي الشخصي انه هو افضل من ان تكون المشاعر مسيطرة على الانسان... لان راح يتبع قلبه وما يمليه عليه ..وما ينظر للأمور من ناحية الواقع والمجتمع والحل الافضل..وانما من ناحية عاطفية فقط...وهذا الشي غلط برأيي)
حتى لا يعيش الانسان بعالم الخيال والرومانسية وتكون نتيجة هذا العالم شي قاسي
والنوع الثاني هو الحب العاطفي...ونتيجة كل من النوعين على تصرف البشر ونتيجة اتخاذهم القرارات الخاصة بحياتهم الي اما تقودهم للهلاك او لحياة ولا اروع منها.
. . .
الحب العاطفي او بالفرنسي اسمه
l'amour passion
....لما قريت الموضوع صدقت الجملة المعروفة
( ومن الحب ما قتل)
لان هذا النوع من الحب يخلي المشاعر والاحاسيس هي الي تسيطر على الانسان وعلى افكاره واتخاذه للقرارات...فأكيد اذا الانسان يتبع عواطفة بكل قرار يتخذه بحياته راح يوصل لنتيجة غير مرضية..او نتيجة قاتله...مثل احد ابطال مسرحية Phedre
هذا اسم بطلة المسرحية الي وقعت اسيرة في غرام ابن زوجها (ابن زوجها لكن مو ابنها)..فهذا حب مستحيل لكن ما كدرت تمنع نفسها لان العواطف هي المسيطرة...حاولت ان تنساه لكن ما نجحت..بالنتيجة صابها الجنون..ثم الانتحار...فهذا الحب القاتل...
لما فسرت الاستاذة الموضوع بالتفصيل مع ذكر الامثلة...كالت جملة بالفرنسي عجبتني جدا
"ou tu m'aimes ou je te tue"
معناها..اما ان تحبني او اقتلك.......هم هيجي حب الواحد ما يتمناه بحياته...
ومن الجمل الي قرأتها وشفتها واقعية..
"aime qui ne l'aime pas, fuit qui le suit, se porte vers qui le fuit"
يحب من لا يحبه، ويهرب من الذي يتبعه ويتجه نحو من يهرب منه"
ذكرتني الجملة بأغنية محمد عبدالوهاب...
بفكر في الي ناسيني وانسى الي فاكرني
واهرب من الي شاريني وادور على الي بايعني...
زين ليش كل هذا التعب؟؟
ليش ما نحب الشخص الي يطلب رضانا ويكون قريب النا ويحب يكسب رضانا بأي شكل
ليش دائما نسمع قصص حب انتهت نهاية حزينة؟؟
ليش اكثر الاشخاص عايشين قصة حب فاشلة؟؟
او مجروحين من شخص كانوا يحبوه؟؟
او دائما اكو قصة وبيها طرفين..
الظالم والمظلوم
الحساس والاناني
الشخص الي مستعد يضحي بكل شي في سبيل يكسب قلب شخص معين
والشخص الي ما يقدر التنازلات الي تقدم اله من قبل شخص اخر
دائما اسمع قصص حب فشلت بسبب هذا النوع من الحب، حب من طرف واحد والنتيجة عذاب نفسي..بينما يكون شخص اخر متعذب بسبب الشخص الاول ومحد حاس بعذابه ..
الحياة شكلها هيجي؟؟
بس مجرد يعيش الانسان ويتألم بسبب هاي المواقف الي اكيد كل انسان يمر بيها
والي ما مر بموقف مشابه.. يجيله يوم ويعيش هذي الحالة
حتى سألت الاستاذة ليش اكو قصص حب تراجيدية لهذي الدرجة؟؟
كان جوابها
C'est La Vie
....
يعني شنو المطلوب حتى الانسان يحضى بشيء نكدر نسميه
The perfect love
احساس مرهف..ثقة عالية بالنفس وبالشخص المقابل؟
اخلاص تام بين الطرفين؟
قناعة تامة من قبل الطرفين؟
اتفاق الاراء ؟
تشابه الافكار والنفسيات والشخصيات وحتى البيئة الي كل شخص ينتمي الها؟
اعتقد لو توفرت كل هذي الاشياء راح يتكون شي اكدر اسميه
perfect love
راح يكون حب عقلاني مبني على اساس قوي ..واقعي..ومعقول جدا..
لكن تشوف البعض حكموا على نفسهم بالحب لشخص معين ما تتوفر بيه اي صفة مشابهة من الي ذكرتها
السؤال هنا....والي اني دائما اطرحه على الاشخاص الي عايشين مثل هيجي نوع من الحب..
على شنو حبيتي او حبيت الشخص الفلاني؟؟
لو هو مجرد حب وخلاص.؟؟
ما ادري ليش اسمع عن هذي المواضيع بكثرة واظل بحالة استغراب
ودائما يكون الحب مصاحب للمشاكل والنزاعات...
سؤالي يكون ليش هاي المشاكل كلها وانتوا تحبون بعضكم؟؟
جواب غير مقنع وما يوصل لنتيجة...احنة ما متفقين
واسال مرة ثانية...لعد شكو باقين سوة وانتوا ما متفقين وتأذون بنفسكم؟؟
الجواب يكون اسوأ من الشخصين....ما نكدر نترك بعض
اوكي الحل شنو؟؟
الجواب ماكو احد يعرفه...من الطرفين
وانطلق بصوتي واحجي من كل قلبي وبقناعة تامة
لو تتحملون بعضكم على هذا الحال الي انتوا بيه
او تتركون بعض وتريحوني من مشاكلم...عبالك بس انتوا الي عندكم مشاكل
الشرق شرق والغرب غرب ولن يتفقااااااا
فألافضل ان الشخص يحكم عقلة من يحس اكو بداخله مشاعر بدت تتحرك بسبب شخص معين
قبل لا ينجرف بمشاعره وقبل لا يوصل لنقطة معينة من الطريق..ويحس بنفسه معلق
لا يكدر يرجع الى نقطة البداية ولا ينطلق الى الامام الي دائما يكون مجهول
خلي يبني حبه على اساس قوي..من القناعة والثقة والاحترام والاعجاب وبعدها الحب

Thursday, April 06, 2006

رحل زائر الصباح


كان يوم الاحد المصادف 2\4\2006..يوم غير اعتيادي بموسم الصيف، كعدت الصبح وشفت الجو بارد جدا ومغيم
والمطر ما توقف من الليل، واستمر المطر الى فترة الظهر، كعدت الساعة 6 الصبح دا اتحضر واروح للكلية، كنت مترددة ما بين اروح او لا لكن اخر شي قررت ورحت، كلت على الاقل احسن من كعدة البيت، ما انكر انو الجو كان بارد وكئيب، وصلت للكلية واني امشي بيها كنت اكول لو ادري ما مداومة، شنو الي خلاني اروح للكلية بهيجي جو كئيب؟؟ بس الكلام ما يفيد لان دخلت الكلية وما اكدر ارجع للبيت ..المهم وصلت واخذت المحاظرة الاولى وما استفاديت من شي..والوقت الباقي قضيته بالنادي وية صديقتي نور الهدى واصدقاء من غير قسم يمامة واحمد وصديقات يمامة الي ما اعرف اسمائهم، حجينا وتناقشنا بمواضيع حلوة وانتهى الوقت، وصارت الساعة وحدة ونص وتوقف المطر وكلت(الحمدلله اكدر اطلع من الكلية هسة بدون ما اتنكع بالمطر) وتوجهنا للبيت.. حسيت اكو شي مو طبيعي، كلت اكيد الجو وتأثيره..بعد وصولي للبيت سألت اختي عن حالة جدي المريض ، كالت الحال كما هو، حضرت الغدا وكعدت اكل، واجة بابا وسالته عن حال جدي وكال مثل ما هو، انتظروني اكمل الغداء وبعدها يلة صعقوني بالخبر، واني كل الوقت اسولف واضحك واتناقش وية اختي على يومي بالكلية، واشوفها مو على بعضها واكوللها شنو السبب تكول ماكو شي بس الجو كئيب، بابا كال :"ميشو، جدو اليوم تعب كلش، وحالته ساءت اكثر من البارحة، بحيث...توفى!! اليوم الصبح"..بهاي اللحظة ولسماعي الكلمات، مرت ببالي وبصورة سريعة جدا كل الذكريات الي بيني وبين جدي الله يرحمه، صوته الحنين وكلامه وطيبة قلبه، انسان رائع ومسالم بكل معنى الكلمة، صائم مصلي ويخاف الله وماشي على السراط المستقيم.اتذكر مرة كان كاعد ويانة على العشاء، واني واختي وخالي الصغير الي هو صديقي ومو مجرد علاقة بين شخص وخاله، دة نسولف عن المستقبل ومواصفات زوج المستقبل او زوجة المستقبل بالنسبة لخالي وكان النقاش من احلى ما يكون وهو يستمع لكلامنا ويضحك وسمعنا صوته يكول:"جدو كلشي قسمة ونصيب وانتوا ماكو مثلكم وراح تلتقون بالشخص الي يستحق"او اتذكره ضحكته من كان يمنا بأيام الحرب ويشوفني خايفة من صوت القصف والانفجارات، ويضحك ويكول"صيري مثل جدج بطلة ولا تخافين ما راح يصير شي والله يحفظنا"كلشي راح ما بقى بس ذكراك وصورك يا جدو، والله يرحمك ويعوضك الجنة يا رب، كنت انسان طيب ومحترم وراقي وحساس،
وربيت اجيال نعم التربية والكل يشهد على هذا الشي..دخلت البارحة غرفة جدو الله يرحمه وشفت المكان الي قضة بيه ايامه الاخيرة، على فراش المرض الي لازمة 3 سنين، مرض الزهايمر الي اضعف خلايا الدماغ بالتدريج وادى الى حاله ضعف عام وكانت النهاية وفاته، المهم عندي انو هو ارتاح لان تعذب بأخر فترة من المرض، و صار احساسي افضل من شفته بالحلم.. كان الحلم شي رائع.. شفت جدي وبيبيتي الله يرحهم(اهل بابا) جايين علينا واحنة الاهل كلنا متجمعين ببيت جدي المرحوم..واحنة رحبنا بيهم وكانت هيئتهم وكأنما ملائكة مو بشر..وطايرين مو يمشون على رجلهم، والابتسامة ما فارقت وجوههم..رحبنا بيهم وكلنا لهم ليش عفتونه؟ اشو صارلكم فترة ما جايين..كالوا لا احنة ما جايين عليكم..احنة جايين ناخذ كاظم(جدي الله يحرمه) ويانة ونرجع...وراح جدي وكان لابس رداء ابيض ووجهه يشع نور ومبتسم..ويلتفت علينا ويللوح بأيده ويكول مع السلامة اني رايح والابتسامة ما فارقته ابد...وراح جدي...وكان هذا الحلم بالليلة الي توفى بيها..الف رحمة ونور تنزل عليهرحل زائر الصباح، كما تعودنا تسميته بهذا الاسم لان كانت زياراته الصبح دائما، كل يوم يزور احد اولاده او اقربائه ويقضي وقت وياهم، لكن رحل زائر الصباح الى الابد.
انا لله وانا اليه راجعون.