Tuesday, September 15, 2009

عدنا من جديد

ما ادري ليش عاجبني اكتب بالعربي اليوم، طبعا مثل كل مرة ابدي اكتب اكول ادري جنت غايبة فترة طويلة بس اليوم رجعت و الغياب سببه الوقت، بس هالمرة مجان الوكت جانت الصور، من فترة طويلة وعدت اجيب صور بس وكت ماعندي افتح اللابتوب و اختار الصور خاصة اني بشغلي دا اقضي وقت طويل امام الكومبيوتر يعني من اوصل للبيت يكون عندي اشباع من الانترنيت و الكومبيوتر و كلشي يخصه.


الحمدلله الجو هاي الفترة كلش حلو، و ما بقى بس يوم على شهر اكتوبر، شهر اعياد الميلاد، لان عيد ميلادي و زوجي، و خالتي و بت خالتي و خالي و صديقاتي كلهم اعياد ميلادهم بهذا الشهر، لهذا احب اكتوبر. الاجواء تذكرني بفترة الكلية، كلما تهب نسمة هوا باردة اغمض عيوني و يجي شعري على وجهي و اسمع اصوات طلاب و هوسة السنتر مال كلية و اني شايلة النساكفيه، افتح عيني الكي نفسي بنص المكتب و كدام الكومبيوتر و الموظفين كلمن غركان بالكومبيوتر الي كدامه، و كوب الهوت جوكليت الي كدامي يطلع دخان ما يخليني اصبر حتى ما اشربه كله و نسمة الهوا اجتني من الشباك المفتوح كدامي.


رمضان الفات جان شي مختلف، حاولت ابتكر و اتعلم طبخات جديدة طبعا، بما انو اني ما طابخة هواية فتقريبا كلشي جان جديد علية، تمن برياني، تمن احمر مرة يصير عجين مرة يصير عجين لحد ما صار تمن احمر، تبسي دجاج بعدة انواع، معكرونة و لازانيا و عدة انواع من تبسيات البتيتة باللحم او الدجاج، حاولت اخذ كم وصفة من الانترنيت و اطبقها و الحمدلله جانت تنجح عندي حتى جيز كيك سويت، تكدرون تلاحظون من خلال الصورة تاريخ اللقطة، قديم، يحتاجلي ابديت شوية :).
و للي يحب يجربها انطيكم المقادير و طريقة العمل بشكل بسيطة و السريع.
الطبقة الاولى عبارة عن بسكت، اي نوع بسكت حلو مو مالح، لو حتى مابي حلى هواية و حسب الكمية الي تريديها، اني سويت باكيتين بسكت حجم وسط طحنتهم و ضفت عليهم اصبع زبدة سايح، شوية شكر، شوية حليب حتى يتماسك لان اذ اخلي زبد هواية تصير دسمة اكثر من اللازم. تخلطيها و ترصيها بالبايركس و تخليها بالفريزر.
الطبقة الثانية عبارة عن، علبة دريم ويب، او اي كريمة خفق، تعمليها حسب طريقة العمل المكتوبة على العلبة، علبة قشطة اولكر او كي دي دي لان قوامها كريمي، اربع قطع جبن كيري او اكثر، تخفقين الكريمة بعدها تضيفين القشة، تستمرين بالخفق، بعدها الجبن، الى ان يتجانس، الخلط يكون باليد او الخفاقة الكهربائية، بعدها يضاف على الطبقة الاولى و ترجع للفريزر.
الطبقة الثالثة اما تكون قطع فواكه مثل الموز، فراولة، كيوي او اناناس، او مربى اي نوع، او جيلي، الجلي تسويه حسب طريقة العمل الموجودة على العلبة، تنتظري يبرد شوية، نجيب الطبق و نضيف الجلي ببطء شديد بالخاشوكة (ملعقة) على الطبقة الثانية، لان حرارة الجلي ممكن تكسر الطبقة الثانية و يتغلغل الجلي بداخلها و احنة ما نريد هيجي شي يصير فببطء افضل، بعدها بالثلاجة الى ان يبرد، و اكلوها و الف عافية، اني هنا خليت مربى عنجاص، بيبي سوتها جان طعما و لونها كلش مناسب.