Monday, October 17, 2005

today is my birthday

اليوم عيدميلادي...قبطت العشرين ودخلت بالواحد والعشرين
قضيت عشرين سنة من عمري...قضيتها بالدراسة والمدرسة والكلية
وصارت هواية مواقف حلوة...من ضمنها تعرفت على صديقاتي
والسفرات الي رحناها وية اهلي وبيت جدي وبيت خالتي
واحداث الحرب والي صار بعد الحرب
البارحة الساعة 12 بالليل علياء دزتلي مسج
ونور ونوني دزتلي مسج
وخالة توتة وشهد وعوكي وسراب
اليوم الصبح خابرتني سرى وسمعتني اغنية عيدالميلاد
happy bithday to you
happy birthday to you
happy birthday happy birthday
happy birthday to you
كلش فرحت من سمعت الاغنية وخاصة انو هي مخابرة خصيصا حتى تهنيني
احلى شي من تشوف الاصدقاء مهتمين ومتذكرين يوم ميلادك
ونوردزتلي كارت على الايميل وتوفي دزلي تهنئة على الكروب واجتني كومة اوفلاينات على الماسنجر
تذكرت ايام قبل من كان عمري 7 سنوات او اكثر..كنا نسوي حفلات عيدلاميلاد دائما
نحضر الكيك والعشا والحلويات ...
ونعزم صديقاتنا كلهم ويوصل عددهم للخمسين ونشغل الاغاني ونركص ونغني
ودائما جنا نسمع اغاني فرقة (لمبادا)والكاسيت اني محتفظة بي لحد الان
ودائما احب اسمعه مع العلم الاغاني صارت قديمة
بس يذكرني بأيام حلوة كلش...ايام الطفولة
بس هسة كبرنا وما كمنا نسوي عيدميلاد مثل قبل
كبرنا وكلشي تغير ...حتى حياتنا واهدافنا ونضرتنا للحياة تغيرت
عدت عشرين سنة من عمري
والله اليعلم بالسنين الجاية شارح يصير؟
ومستقبلنا شلون يكون؟
ومنو راح اشوف واصادف بطريقي؟؟
وبيا مواقف امر بيها...؟؟
ومنو راح اتذكر والمن راح انسى؟؟
ومنو راح يتذكرني او ينساني؟؟
يا ترى صديقاتي باقين وياية...لو راح يكون عندي غيرهم؟؟؟
راح اكون اني بالعراق لو بمكان اخر؟؟؟
حنون وين راح تكون؟؟
اني راح احقق الشي الي اريده واوصل للي اريد اوصله واخلي اهلي يفتخرون بيه اكثر؟؟؟
كل هذا الشي راح اعرفه بوكتة المناسب...والسنين الجاية هي الي راح تثبتلي اذا اني اكدر اسوي الي اسويه
وانو اني قوية بما فيه الكفايه حتى احقق الي ببالي
ان شاء الله

2 comments:

Rod Pendergrass said...

You have a great blog here! I have a free music downloads site. In addition to free music downloads, you can get music of some of today's top artists' such as Green Day, Gwen Stefani, Simple Plan, Usher and many more. Check it out when you can :)
Rod

Anonymous said...

الله الله
كلشي ولا كاسيت اللمبادا
ههههه
طبعا اني ماعرفج بس انشاءالله تتوفقين بحياتج ذكرتيني بأيام حلوه
good luck , keep up writting ur good ..

ur iraqi sister : joann