Sunday, June 25, 2006

دعوة لترك التدخين!!!!


صنعوها من ارقى المكونات، وانطوها اسماء خاصة و صارت ماركات عالمية انتشرت بالعالم كله، ضافوا عليها عطور و نكهات مختلفة، وانطوها شكل انيق و بعلبة حلوة والوانها منتقات بذوق، و كتبوا تحذير بأحد جوانبها يكول:
" أستخدامها سبب رئيسي لامراض القلب و الرئة وتصلب الشرايين و السرطان !؟! ". . .عدا كل هذا ريحتها مو طيبة.
مرة سألوني عنها وعن رأيي بمستخدميها، بالبداية جوابي كان ، انو تنطي لمستخدمها صفة غامضة و جاذبية معينة، طبعا هذا مو بس رأيي الخاص . يجور رأيي بالبداية بهذي الصورة لان الي اعرفهم من مستخدميها او متعودة على منظر الاشخاص يطالبون بيها و يشتروها، لكن ما اعرف شنو الي غير فكرتي عنها وبديت اتضايق منها يوم بعد يوم..
اتصور لان اكو صفات اهم ممكن ان يتمتع بيها الشخص وتنطي الجاذبية او صفات حلوة تترك اثر ايجابي عند المقابل....
هنا اتصور راح انتقل لموضوع ثاني مختلف و اله علاقة بيها ، واذا ماكو فراح اعتبرها مدري شنو و مو اي شخص يفتهمها.
.اما الصفات الي ممكن ان يتمتع بيها الشخص و الي تترك اثر حلو فمتعددة، لو اريد اعددها فأكيد راح اكتب رأيي بصورة خاصة ..مثلا :الشخصية.. الانسان ممكن يكون متفائل او متشائم، خيالي او واقعي، رومانسي او خالي من المشاعر، اجتماعي او منعزل عن باقي الناس، عنده هدف بحياته وطموح يريد يوصل اله او يذب اللوم عالدنيا و يشتكي من حظه و هو ما باذل اي جهد حتى يحقق شي بحياته؟..
ممكن يكون هذا الانسان مغرور او بسيط وعفوي بتصرفاته وية الغير، او يكون تفكيره محدود و سطحي (وهذي برأيي وحدة من اسوأ الصفات الي يملكها الانسان ) او يكون عنده افكار حلوة و يحلل الامور بعقل واعي و متحضر..
او ممكن عصبي او هادئ ، اشوف اسلوبه بالتعامل وية الناس وخاصة احترامه للمرأة ..اعترف هنا اكو تحيز!! اعتقد هذي الصفة مهمة و خاصة احنة البنات نهتم الها..اما بالنسبة الي فأعتبرها صفة مهمة تدل على رقي الانسان و افكاره..و هواية صفات و تفاصيل تنطي انطباع و جاذبية للاشخاص ...
مثل ستايل اللبس، اهتماماته الخاصة بالحياة، هواياتة، مستحيل تكون الجكارة تنطي صفة اهم من الي ذكرت.. ارجع لموضوعي الرئيسي الي هو التدخين..فيا مدخن بس اريد اعرف شنو الي مخليك متمسك بيها لهذي الدرجة؟
ممكن النيكوتين؟؟
او ريحة الدخان؟؟
او مدري شنو؟؟
و شنو الاحساس المصاحب للتدخين؟؟
و الجكارة بيدك؟؟
يا مدخن، شو من انت ضايج تدخن و من انت فرحان و مرتاح هم تدخن؟؟ساعة تكول من انت وحيد تكون الجكارة هي الرفيقة الي تهون عليك الغربة..و ساعة تكول الغربة بدت تقل و انحل موضوعها بس بعدك تدخن!! متكلي لشوكت؟؟ ترة مو زين على صحتك....مو زين . . .مو زين . . .

4 comments:

توماس كراون said...

الحمدالله لست مدخنن

نصيحه ثمينه

و موضوع هادف



توماس كراون

Morbid Smile said...

We're talking about Awesomeness at Attawie's blog, so I'd say this is an awesome advice, sister! :)

You forgot to mention that when the smoker sits at the computer for long hours, the ash tray would be filled with cigaretts. Mouse in one hand, and the cigarrette is in the other hand!

Hope people will realize how dangerous it is to smoke, and hopefully that will lead them to quite smoking

LionKing said...

محاولااتنا بترك الاشياء الضارة بعد التعود عليها صعب وماممكن التغلب عليها الا بالارادة بس مرات الارادة تكون مستعملة بحياتنا لشي ثاني فنواجه صعوبة بالتحكم بارادتنا لصالح موضوع معين .. هنا وبهذي اللحضة راح نحس بانة لازم نستعين باحد يمثل النا ارادتنا الثانية واللي من خلاله نكدر نحقق شي لصالح نفسنا بس بطريق ثان ...
حبيت ان اطلب رائيك بالتدخين مرة وجان رائيك من اجمل ماسمعت بوصف ولو سمعت هذا الوصف احدى شركات السكائر لنجحت هذي الشركة واصبحت الاكثر شهرة بالعالم فضلا للتعليق اللي ابديتي تجاه الجكارة بالمرة الاولى !! بس مرات التحويلات بالراي والخروج بنضرية مثل مايكولون تدحض النضرية السابقة هنا راح يختلف العقل ويبدي يطلب راي يكون اكثر اقناعا من الرأي الاول ...!! وهنا الصعوبة بالموضوع
انتي جربي ان تحجين وية شخص تعرفتي علية ولاول مرة كوليلة بطل التدخين .. واحجي وية شخص تعرفي علية وصارلك فترة طويلة وكوليله بطل التدخين مااكلك انه الشخص الثاني راح يستجيب اسرع من الشخص الاول لان يجوز يصير العكس (احتمال نادر) بس بالحالة الثانية تكون الاستجابة نابعة من شي اسمة (فترة) واكدر اعرف كلمة فترة هي ( ايام ... مواقف ...احداث ... مشاركة ... مشاعر ... قلق ... خوف ... رأي ... نقاش ... الخ ) اكيد كل هذي الامور راح تكوون فد دافع اكبر للاقتناع بترك التدخين مع العلم انه الشخص المدخن نفسة مامقتنع بنفسة انه يدخن لان يدري انها فد شي سلبي على نفسة وعلى المجتمع (احيانا) ..

بصراحة الموضوع اثر بية ايجابا ومن قريتة دخت وفكرت هواية وضجت وفرحت بس تالي ماكدرت الا ان سحبت جكارة ودخنت بس بالنهاية اقتعت بالفكرة !!

sarah said...

مرحبا ميشو
وحشتيني
شلونج
؟؟؟؟

يصراحة موضوعك جدا راقي والف شكر على هالنصايح فعلا يمكن يقراها واحد من المدخنين
ويتقبل هالنصيحة الحلوة
جزاج الله الف خير حبيبتي
ولا تقطعين
بعدين شلون الدراسة والكلية
؟؟؟؟؟؟؟؟؟؟