وأخيــــــــــــــــرا...استملت نتيجة امتحاناتي النهائية ونجحت، نجحت، نجحت، هذي اول مرة امتحن بيها ويصير عندي خوف من النتيجة، اعصابي توترت ونفسيتي تعبت، اشك ممكن ما انجح، بنفس الوقت اضحك واكول معقولة ما انجح؟؟ مستحيل، ليش هذا الاحساس المزعج مسيطر هذي المرة؟؟ بكل امتحان جنت اروح مسيطرة، ما اخاف واعصابي هادئة جدا حتى ما احتاج ان اراجع الدرس قبل الامتحان واني على هذي الحالة من زمان، لكن هذي السنة اختلف الحال جدا، المعدل ومستوى الدرجات مو مثل المطلوب، استلمت النتيجة وصيحت وكمزت بالبيت، خابرت الي مفروض اخبارهم وابشرهم بالنتيجة، بابا، بيت خالاتي، بيبي، شوشو، توتة، نوني، لايون كنك، سراب،...وبعد اكو ينتظرون تليفون مني لكن الوقت ما كفى لليوم..
اتذكر بأيام الاعدادية، الي لحد الان اتذكرها ولو اكو اختراع يعيد الزمن جان عدت هذيج الايام لان حلوة وبكل تليفون بيني وبين سوسو نتذكرها بأحداثها وضحكنا وسوالفنا ومواقفنا وية البنات وصديقاتنا وبدايتنا سوة كصديقات، جنا متعودين بكل سنة دراسية بعد ما تنتهي ونستلم النتائج، ننجمع الثماني المرح، اطلقنا على نفسنا اسمDEVILS...لان كروبنا كروب شعوذة ونشاط ومتونسين الى ابعد الحدود، ما اقصد بالشعوذة شيء مو زين او الجانب السلبي بيها، لكن كروبنا جبير وبس احنة بي...المهم..ننجمع سوة...اني..وسراب ورولا ووسن وايفيت ومروة وبان وزهراء...ونغني اغنية النجاح الي راح اغنيها لنفسي اليوم..
وحياة قلبي وافراحوه...في هناه ومساه وصباحوه..
ملاقيش فرحان في الدنيا..زين الفرحان في نجاحوه..
والناجح يرفع ايدوه...ويغني في عيدنا وعيدوه
ونقول على طول ديمن...ديمن على طول..ديمن على طول....
واخيرا....مبروك لكل الناجحين...
وما زالت الدعوة لترك التدخين مستمرة....
5 comments:
مبروك يا ميشو مبروك
وين الحلوه ؟
:-)
شكراااااااا ليال
الحلوو موجود لكن شلون اوصله الك؟
D:
نجاحك مية بالمية ميشو فازت بحب اهاليه !! الف مبروك نجاحك الغالي .. النجاح ليس فقط بالامتحانات النجاح انتي محققتة من زمان ومرافق الك دائما من 23/3 وماقبلها ، طالما كان النجاح هو مرافق لك ففرحة نجاحك هذه بالنتيجة تضاف الى فرح نفسك بنفسك بالنجاح اللي برعتي في تحقيقه من خلال علاقاتك وثقافتك ومناقشاتك وجمالك والتعداد في هذه الصفات قد يرهق القارئ ولكن لايرهق الكاتب نفسه لهذه السطور ، فرحي اليوم بيك وبنجاحك طير كل الكلام من عقلي .. بس راح اكررها الك الف مبروك نجاحك يارائعة
لايون كنك
شكرا عالكلام الحلو
دائما تذكرني بكلام رائع جدا
نجاحي الدراسي والي فرحت بيه جان نتيجة هذي السنة ونتيجة الدراسة.
اما نجاح شخصيتي فسببه الاول اهلي وتربيتهم الي والمبادئ الي اختاريتها لحياتي
ونجاحي بحياتي الاجتماعية والي يسعدني ان اسمع هذي الجملة منك سببه كل الاصدقاء الي اعتز بيهم والي جمعتني وياهم ايام حلوة وضحك وسوالف ونقاشات ولا اروع، وانت منهم
وهذا النجاح لكيته بيك انت هم..
شكرررررررا ساااااااارة
والله يبارك بيج
ويوفق الجميع يا رب
وشكرا لحضورج
Post a Comment