Tuesday, July 18, 2006

Me, Myself & I


قبل كم يوم، جنت دا اتفرج على التلفزيون، شفت برنامج starting over ، برنامج حلو، احب هيجي نوع من البرامج تخص نفسيات البشر وطبعهم وتصرفاتهم وشلون الانسام يحاول يوصل لدرجة الكمال بنفسه واخلاقياته ومبادئه تجاه اي شي بالحياة، احنة نعرف انه الكمال لله وحده، لكن خلينا نوصل حتى لو اقل درجه منه..وحدة من المشتركات بالبرنامج كانت طريقه التعامل وية نفسها ان تكون صريحة وواضحة وتتقبل نفسها مثل ما هي، طريقة علاجها عجبتني، بديت تعدد الايجابيات والسلبيات الي بشخصيتها وبصفاتها، وتحتفظ او تبين اكثر صفاتها الايجابية وتحاول ان تغير وتبتعد عن السلبيات الي تشوفها بنفسها..واكيد كل واحد بينا عنده صفات بنفسه تعجبه او ما تعجبه، بس ما ادري اذا حاولنا بيوم من الايام ان نصارح نفسنا بيها وية ناس نعرفهم ويعرفونا..
السلبيات الي اشوفها بنفسي،1
-السرعة بالحكم على الاشخاص و المواقف حتى لو على ناس اعرفهم ما ممكن ان احكم عليهم.
حاولت ابتعد عن هذي الصفة الي بيه، بس مرات اشوفها ترجعلي مرة ثانية، احس بيها مو مجرد اطلاق حكم سريع على شخص وانما مصاحب الها احساس بالشك ببعض الاوقات..مرات امر بموقف معين وية شخص قريب يبين عدم صدقه او عدم وفاءه الي، واني اعرف ان الموقف هو الي بين هذي الصفه وبنفس الوقت اعرف حقيقة هذا الشخص ومن المفروض ان مااسمح لهيجي احساس ان يجي على بالي، لكن ما اعتقد اكو انسان يكدر يسيطر على احاسيسه، ممكن يتجاهلها لفترة معينة، لكن يرجعلها بنهاية الطريق.

2- اختلاق الاعذار لبعض الاشخاص والمقربين منهم بالاكثر، برغم كم موقف مريت بيه جرحني او زعلني من الناس المقربين الي، لكن حاولت اتجاوز موضوع الزعل والفراق بيننا، واختلقت الاعذار الهم بتصرفهم على نحو معين جرحني بسبب او بدون سبب، بس حتى احافظ على الصداقة واحتراما للعشرة والايام الحلوة والذكريات الي تجمعنا سوة.

3-المسامحة، اكدر اوصفها بالسلبية او الايجابية، اسامح وبنفس الوقت ما انسى الغلطة الي اواجهها من صديق، وتبقى على بالي، ومرات اذكره بيها.

4-الشك..الشك..الشك....

5-مرات من اتعرض لموقف معين، افسره بعده طرق الايجابية منها والسلبية، المعقولة والغير معقولة، المنطقية والغير منطقية حتى اعرف شلون ممكن اتصرف، او اساعد نفسي ان اتخذ القرار الصح بالوقت المناسب..بدون ما اوكع بالغلط...لكن هذي الطريقة بتفسير وتحليل المواقف راح تتعبني لان على غرارها راح تتكون عندي احتمالات ما اعرف شنو اختار منها حتى استمر بحياتي او احدد جزء من مصيري.

6-التأثر نفسيا بالاشخاص الي اهتم لآمرهم، اذا اشوف شخص حزين راح احزن اكثر منه، اذا شخص عايش مأساة معينة راح ينتقل احساسه الي وكأنما اني الي عايشة هذي المأساة، اعتقد هذي الصفة سلبية..لان تخليني كل شوية بمزاج حسب نفسيات الاشخاص الي اقابلهم، واكدر اكول عليها صفة ايجابية لان اكون حاسة بالمقابل واكدر اوصل لدرجة احساسهم واعرف شلون اوكف بجانبهم.

7-احب التفاصيل بالكلام، من اريد اسولف وية وحدة من صديقاتي مثلا، اذكرادق التفاصيل عن الموضوع المقصود ...الى درجة الملل..

8-قليلة الصبر واكره الانتظار الى ابعد الحدود.

9-فضولية ! ببعض الاوقات..في ما يخص معارفي فقط

10-التعلق السريع بالاشخاص والاشياء.

الصفات الايجابية

1- الصراحة
2-العفوية والتصرف على طبيعتي
3-اذا وعدت وفيت بوعدي
4-مقتنعة بحياتي وباللي املك من اشياء معنوية او مادية
5-ما اصنع من المشاكل الصغيرة مشاكل كبيرة، احب كل شيء يكون بسيط حتى لو ما كان بسيط واتعامل وية اي مشكلة بعقل وفكر هاديء
6-مستحيل انسى الناس الي عرفتهم او قابلتهم بحياتي.
7-ما اتدخل بأمور الاشخاص الي ما يهموني.
8- امقت الكذب والكذابين...خاصة لو كان بدون مبرر قوي، لان مرات نضطر نكذب حتى لا نساعد بحصول مشكلة، لكن بغير شي مستحيل اتقبل الكذب...والحمدلله ما اضطريت بيوم من الايام ان اكذب بمبرر او بدون مبرر.
9-عاطفية ورومانسية..وواقعية بنفس الوقت..شلون؟؟ ما ادري.
10-احب النقاشات بالمواضيع المهمة والغير مهمة، بهدوء وبدون اي عصبية، واعتبر نفسي شخص سهل الكلام وياه، لان اكثر من مرة سمعت جملة "ميشو، حلو النقاش وياج..تسمعين بأهتمام " اعتقد هذا الي ساعدني على كسب الاصدقاء..

كل هذا الكلام جان شي شخصي ورأيي الخاص بنفسي..ميشو بنظر وفكر ميشو، مو بنظر اشخاص ثانيين، ممكن اكو صفات حقيقة وممكن لا او اكون بالغت بالوصف بس حبيت ان اكون مراية لنفسي واشوف نفسي بيها، كلنا عدنا سلبيات وايجابيات، حلو الواحد يعرفها، والاحلى، ان يتقبلوني الناس مثل ما اني على طبيعتي بدون تغيير ويتعاملون وياية بكل صراحة وعلى طبيعتهم، ما يحصل اي تغيير لا بصفاتي ولا بصفاتهم ، لان اكو صفات معينة بالانسان مو بسهولة يكدر يغيرها لان يكون متعود عليها او متربي عليها، فمو بسهولة يتخلى عنها، والمحاولة للتغير الى الاحسن دائما تكون موجودة، بس كل شي يحتاج اله وقت وتفهم وتشجيع ودافع قوي...

2 comments:

LionKing said...

You, Yourself & You !
في كل مرة تطل علينا ميشو بطلة وبشكل جديد من المواضيع اللي تخليني اعجب اكثر واكثر بشخصيتك وطريقة تفكيرك اللي احس بيها متكاملة بالرغم من كونك بعمر بنيتي بي شخصية وتصرفات وثقة بالنفس من وقت مبكر جدا راح يخط الك فد خط او كيرف متصاعد نحو القمة يخلي كل الناس تعجب بيك واكو منهم اللي راح يكون اعجابة بيك يعادل اعجاب كل الناس مرة وحدة !
الك في هذا البوست شي جديد تحدثتي بي عن نفسك مرة ثانية بس بشكل مختلف وبداتي بتوجيه كلام لنفسك وتناقشي وية نفسك ووصلتي الى شكل من اشكال القناعة والنقاش بان انه انتي عندك صفات انتي تعتبريها صفات مااريد اسميها سلبية لان كلمة سلبية احس بيها جبيرة كلش بحقك فراح اسميها صفات ثانوية لان هذي الصفات اللي كلتي عليها اتصور استعمالك الها يكون من المفروض بدرجة قليلة جدا الى ان توصلين نفسك الى عدم التقرب الها او استعمالها بنفس الوقت اكو بعض الصفات اللي يشوفهه الشخص قد تكون سلبية بنفسة بس يشوفوها المقابيلة وكانما هي الصفة المميزة لهذا الشخص مثل طريقة الكلام !! أو غيرها ..
هذي الصفات الثانوية اللي ذكرتي ممكن ان تكون هي السبب الرئيسي اللي خلت ميشو بهذي الدرجة من الرقي بالتصرفات والشخصية ، يعني اجي على سبيل المثال بالصفة الاولى الثانوية الك اللي هية التسرع بالحكم هذا صفة تجني على صاحبها بصراحة بس مرات وبنفس الوقت تكون صفة ايجابية تمنع اي احد من التقرب لهذا الشخص ويكونون حذرين منه يعني بحيث اذا فكر ان يتقرب من هذا الشخص لازم يكون حذر جدا بتصرفاتة هوة علمود لا يصدر علية الحكم بالاعدام ! قبل الدفاع عن نفسة .. بس انتي خالة حد بهذا الموضوع وتحسسين نفسك دائما من تحسين انه وصلتي لمرحلة تسرعتي بيها على الحكم على شخص قريب او بعيد بس اكيد اكو فرق جبير ..
مسالة الشك .. كلنا نشك بس لحد معين مانتخطة بي ان نخلي الشخص اللي نشك بي وخاصة اذا قريب الى مرحلة نشوف انه احنا تجاوزنا على هذا الشخص بشكنا علية بس بخيالنا فقط يعني احنا مانشك بي بشكل فاضح علمود لا نجرحة ووانما نعتبرها حقائق نواجهه بيها علمود ماتكون بدافع الشكوك ..
مسألة الصبر مرات الواحد بالفعل يفقد الصبر بمسالة معينة كانتضار نتيجة او معرفة شي مانكدر ان نتوقعة بالوقت لحالي .. اما اذا يكون الصبر بتوقع شي اكيد هنا راح يكون طعم الصبر حلو وترة فعلا الصبر شي حلو كلش وخاصة من يوصل الى النتيجة النهائية بي بحيث يحس بان الصبر تخطاه خطوة خطوة الى ان وصل للمرحلة اللي صبّر نفسة عليها .. واني مرات اكول ساصبر حتى يعجز الصبر عن صبري ..

اذا فضولية انتي تكولين على نفسك فاحب ان اكلك هاي اروع صفة بيك رغم اسمها فضولية .. لان فضولك يخلي الشخص اللي مقابيلك .. يبتسم ويضحك .

التعليق السريع بالاشخاص مااتصورة شي سلبي اذا جانو هذولة الاشخاص يستحقون التعلق اما اذا مايستحقون التعلق بيهم فهذا بسبب اطباعهم وشخصياتهم همة اللي حرموا نفسهم من فرصة التعلق بيهم من شخص مثلك ..
الى هنا مااتصور اكو صفات ثانوية (اسميها بيك) لان اللي كون هذا الخليط من التصرفات والافكار كون شخص رائع وإتصور هوة وضع كدامي فد عيوب او سلبيات مثل ماسماها بس للاسف فقد فشل بتسميتها سلبيات لان اللي قراها اعجب بسلبياتك اذا جانت بعينك هذي السلبيات !!

اما بالنسبة للايجابيات هذي مااتصور راح اكد اوصل بكلام واعلق عليها لان صفة اروع من الثانية الا السطر اللي استغربت علية كونت "" عاطفية ورومانسية ... وواقعية بنفس الوقت "" لان مااتصور ترتبط العاطفة والرومانسية بالخيال اللي يعكس كلمة واقعية .. لان عن طريق تفكيرنا الواقعي ممكن ان نتحكم بعاطفتنا ورومانسيتنا ونلحن الها لحن مخلوط مابين الواقع والخيال ليكون فد ناتج اسمة حب ممكن ان نحس بي من يوصل النا

هذا الخليط المتضارب اللي نلكي بكل شخص واللي مرات تغلب على نفسة التصرفات السلبية ومرات تغلب الصفات والتصرفات الايجابية ومرات يكون بيها محبوب ومرات يكون بيها مكروه ومرات يكون متعادل مابين بين ... المشكلة مااكدر اكول انك كاملة بصفاتك الثانوية ولا اكدر اكول انك كاملة بصفاتك الايجابية ... لان بالحالتين انتي رائعة !!

Michomeme said...

لايون كنك..اكثر من مرة قريت كلامك..وما عرفت شنو اكتب...وصفك وكلامك ورايك واحساسك كله حلو..

...
اكيد كل واحد بينا اله سلبياته وايجابياته...او الصفات الثانوية الي قصدتها...بس تدري..لازم اكو فد صفة سلبية لان البشر مو كاملين ابدا...
يجوز طريقة الكلام هي صفة ثانوية؟؟
يعني تعترف انو طريقة كلامي غريبة..هاهاها....اي غريبة ...مدري شلونها...لا هي بغدادية ولا هي مدري شنو...المهم من احجي وياك تفهني
;)

....
بخصوص التسرع بالحكم...دائما..احب انو كل انسان يعترف بشنو سلبي عنده من افكار..
من مرة حسيت على نفسي انو عندي هذي الصفة كلت لازم الغيها مني لان اعرف بيها غلط...صح ممكن تفيدني ببعض المواقف..بس التسرع ما راح يقودنا لاي شي..فالاحسن اخليها كدامي دائما انو عندي صفة التسرع بالحكم ولازم ابتعد عنها...فكل ما امر بموقف معين...اكول لنفسي..لا تتسرعين بالحكم...بهاي الحالة بس اكدر اترك هذي الصفة...

بخصوص الشك....ما اكدر اضيف اي كلمة على كلامك لان كامل ...ووصفته بشي حلو كلش وواضح..

,..وبخصوص الصبر

لعد اني هم سأصبر حتى يعجز الصبر عن صبري..والصبر يعجز من ميشو وميشو تعجز من الصبر وناس تعجز من ناس ...وتنلاص بعدين...
المهم...هو صح الصبر حلو..بس شنسويلها لميشو الي ما تحب الانتظار..ولا الصبر


يعني صدك اني فضولية!!! وكأنما ما اعرف نفسي..بس حلو منك تسمي صفة حلوة ويخلي المقابل يبتسم ويضحك...لعد راح ابقى فضولية وما راح افكر بيوم ان اغير هذي الصفة


مسالة التعلق بالاشخاص...مو شي سلبي جدا...بس مؤذي..لان تتعرف بناس وتشاركهم بلحظات حلوة..ويقضون وياك ايام حلوة ويروحون لسبب ما..مثل هواية اصدقاء مروا بحياتنا وحزننا على بعدهم، والاشياء اتعلق بيها..حتى الذكريات البسيطة...اجمعها..صور..قصاصات ورق مكتوب عليها شي...اشياء ملموسة ..هدايا معينة...بمرور الايام تزيد وتزيد...فما راح يبقى عندي مكان لخزنها...
ههههههههه
;)
بس يبقى التعلق السريع شي متعب، لو تعلقنا بناس وصار البعد..لان الاشتياق والحنين الهم..احساس مو هيين..


قصدت بصفتي" رومانسية وعاطفية..لكن واقعية"...انو انسان حساس..عاطفي جدا..محب..يحب كل الاجواء الهادئة الي توحي للعاطفة والرومانسية...اتعامل وية كل شي..برقة..او عاطفيا...
بس مرات..وبمواضيع معينة..اضطر ان ابعد عني العاطفة واتصرف بالعقل وبس، واكون خالية من اي مشاعر حتى لو على حساب عواطفي نفسها، بس حتى اكدر اختار الطريق الصحيح بحياتي...او اي قرار اخر او تصرف مو بالضرورة يخص "الحب" لان لازم نجرد نفسنا من الاحاسيس بمواقف معينة حتى نعرف شلون نتصرف بعقل وبس...مثل ما كلتلي مرة..نكول للمشاعر ابقي هنا..وراجعلك بغير وقت..
جان وصفك حلو...
ومنطقي جدا

فما احب يكون العقل هو الي مسيطر بشخصيتي لان راح اكون بدون مشاعر ولا احب ان تسيطر عليه المشاعر لان راح تاخذني بتياراتها الي ممكن توديني لطريق مو صحيح او مو مناسب الي..فخليت وقت للمشاعر تكون هي البطلة بي ووقت للعقل يكون هو المسيطر..ومرات وقت مشترك بينهم..لان ما نكدر نتخلى لا عن مشاعرنا ولا افكارنا...

شكرا الك..على كل شي
ونشوفك بخير ان شاء الله