Monday, September 11, 2006

11\9 WOW happy birthday to my blog

من بعد عناء طويل وتحمل وصبرمني وصراع دائم وية الكهرباء التي جعلتني متنرفزة جدا، قررت ان اترك الكومبيوتر وأسويله شوت داون واخذ موبايلي ال( الأن سبعين ) الجديد واكتب هذا البوست على الموبايل هواية احسن من ما اكتب و تطفة الكهرباء وكتابتي تروح هباءا منثورا..جان المفروض من البارحة اكتب بوست لكن الوقت مر بسرعة جدا وبعد كل هذا الكلام اريد اكول انو اليوم هو مهم بالنسبة الي ، واكيد بعد ما قرأتوا عنوان البوست الجديد تصورتوا أني دا احجي عن احداث تفجيرات ابراج التجارة العالمية بأمريكا، بس اني ما يهمني هذا الموضوع بس صدف اليوم هو عيد ميلاد البلوك تبعي، صارلي سنة من كونت البلوك وكتبت اول بوست بي وجان بسيط جدا، مجرد تعريف عن نفسي وكتبت مقطع اغنية احبها وبعدها استمريت بالكتابة عن احداث وأيام و مواقف أمر بيها وعن ذكريات تجمعني وية الناس الي احبهم واكتب عن افكاري وأرائي بمواضيع معينة، لهذا مدونتي الها طابع خاص جدا. ولان احب الكتابة عن احداث مهمة الي ف عجبتني فكرة البلوك و الفضل يعود لأختي اللي عرفتني على هذا الموقع و هي الي علمتني شلون استخدمه وهي اللي خلت رسوماتي الخاصة على جانب البلوك ف شكرا موربيدو. وشكرا لكل المتواصلين بقراءة مدونتي و يعلقون و ينطون أرائهم باللي اكتبه.
الكلام الي جنت اريد اكتبه هواية وحاولت استرسل بالكتابة لكن سلسلة افكاري مليون مرة انقطعت وضاعت حلقاتها فضاع الكلام، بس ما نسيت ولا انسى ان اشكر لايون كنك على البوست اللي كتبته على مرور سنة لمدونتي، من صدك عجبني البوست الاخير الك وفرحني كلش، ممكن حتى لو اكتب ما راح يوصف اعجابي بالبوست...فكرة حلوة كلش منك يا لايون كنك.
طبعا تمنيت لو اكتب اكثر بس من صدك كل الكلام الي جان ببالي تبخر بسبب الكهرباء وكلما اكتب شوية تطفى الكهرباء ف تروح الكتابة وياها، المهم، خلال طول السنة تعرفت على هواية مدونات وجانت تعكس شخصيات اصحابها وعجبتني مدونات عربية او انكليزية واستمريت بزيارتها ولحد الان وانضافت على لستة الفايفورت ، وتعرفت على شخصيات رائعة ومواضيع ممكن تكون فلسفية، لان اني احب التفلسف هواية!! ومواضيع عامة او مدونات تكتب مواضيع منوعة او شخصية جدا، ان شاء الله دا ئما اتسمر بالكتابة واحب ان تستمرون بزيارتكم لمدونتي وتنطوني افكاركم..
ممكن تكون مدونتي خاصة او شخصية، لكن المهم عندي تعكس شخصية ميشو الحقيقة جدا، مرات اكون فرحانة او منزعجة ومتضايقة من شي اكتب كل شي يمر على بالي بصراحة وبعفوية مثل ما اهلي وناسي يعرفوني دائما..
ما راح ازيد بالكلام..اشكر موربيدو مرة ثانية واشكر لايون كنك مرة ثانية هم، وانتظر تعليقاتكم..
طبعا حاولت اكثر من مرة ان اضيف صورة لكن النت ضعيف يمي كلش ف قبل لا تصير ساعة 12 بالليل ويصير مو 11\9 قررت ان اكتب البوست بدون صورة ...

10 comments:

Marshmallow26 said...

Hey Misho,

I read your blog and it is cool!!

You remind me of my sister so much, she likes to write in Arabic and I like to write in English, she says that she will miss me once I gain the Fulbright scholarship...and believe me I know exactly she will go through what you are going through right now, crying and wanting your sister back. She is just like you...and she is my only sister too

God bless you and your sister

Omar Fekeiki said...

كل عام وانت بالف الف خير وانشالله يجي يوم ونكتب عن العراقيين فرحانين وحايرين وين يكضون راس السنة والعيد واعياد الميلاد!!

سلميلي على العراق و على بغداد

ودائما اتذكري انه كل شدة تزول

عمر

ahmed said...

congrats! i am in Amman now and i miss our times together...tell Khala so that she can convince ur dad and u to come back here.....

i hope this comes out right:

que les bloggers que j'ai reconne, tu est l'une que je prefere.

Salams to Khala

tweety said...

كل عام وانتي وبلوقج بخير
انشالله من نجاح الى نجاح
ومن تقدم الى تقدم
ومن مواضيع جميلة الى اجمل
على مستوى النت والمستوى الشخصي

تحياتي حبوبة

Michomeme said...

Marshmallow26

hey..thanx for your visit and your comment, i hope you will gain the fullbright scholarship, and be sure that your sister will miss you sooooooooo mich

cuz i miss my only sister
:(




***********


العميل33
اهلا بيك
اكيد الكتابة شي مهم خاصة لشخص يهوى الكتابة، مثلي، ..وهي فضفضة على مواضيع تشغلني، مو بالضرورة تكون مشاكل...راح استمر اكتب..الى اجل غير مسمى...

بالمناسبة..دا احاول ادخل على مدونتك لكن الظاهر محذوفه؟؟

**************





24 steps to liberty
شلونك عمر؟
شكرااااااااااااااااااا
ان شاء الله يا ربي يجي هيجي يوم على العراقيين وما تشغلهم صعوبات الحياة ويبدون يدورون على راحتهم وونستهم.

بس شوكت؟؟ شوكت؟؟
وسلاااامك وصل للعراق واهل بغداد..
وان شاء الله تهون وتفرج على الكل

**************


confused kid
انت بعمان مرة ثانية؟؟ يلة الحمدلله على السلامة..شلونها عمان؟؟
ما اتصور شي سهل نتخذ هيجي قرار ونرجع لعمان..خاصة اني عندي كلية وملتزمة بيها..
الله كريم منا لحد ما اتخرج..


باي ذة وي..الجملة صح ..لكن كلمة reconne= reconnue

merci a toi

سلامك وصل..

**********************
تويتي
شكرا على التهنئة
وعلى تواصلج..
وان شاء الله النجاح للجميييييع




تحياتي
ميشو
من العراق

Marshmallow26 said...

I thank you for visiting my blog though and wish you the best always dear.

Little Penguin said...

صارلج سنة كتابات و ارهاصات و عناء و نضال؟ الله يساعدج. بس الصراحة النتيجة ترفع الراس.. مدونة محترمة.. ان شاء الله موفقة و مسددة دائماً

Michomeme said...

Marshmallow26:

you welcom dear, wish the best for all







Little Penguin ...

تسلم على الكلام الحلو...كلك ذوق..
اهم شي الارهاصات، من تجي على غفلة وما تكدر الا تكتبها..
وان شاء الله الموفقية للجميع يا رب

LionKing said...

عذرا لكوني متاخر دائما ...
هذي المدونة طالما كانت الي فد مرجع لرؤية شخصيتك بشكلها المتكامل الثاني او لرؤية جزء من حياتك او مواضيعك او عقلك الواسع اللي اعجبت بي وبتفكيرة الغير مسبوق .
اول ماعرفت موقع المدونة مالتك سهرت بيومها وجنت بيومها مستغرب كلش اولا لان عرفت شي خاص او موقع خاص بيك الى هذا الحد وبنفس الوقت انعجبت وانبهرت بالموقع اللي دخلت لان لكيت بي عالم داخل عالم ثاني ..
مدونتك جانت الي وماتزال مثل المنتزه او دار الاستراحة اللي لازم امر بي كلما كعدت على الانترنت .. ناس تحب تطلع وتشوف الدنيا بس اني جنت احب ادخل لعالم المدونة مالتك واشوف من خلالها كل الدنيا ... جنت دائما اتأخر بالردود او التعليقات بس جنت اكلك لازم اعلق صحيح يجوز التاخير شي مو حلو بس وقتي كصير كلش وانتي تدرين بهذا الشي وجنتي تعذريني دائما بس المقصر هوه وحدة اللي يحس بهذا الشي ...
الان وقد مرت سنة على مدونتك سنة مليئة بالاحداث المتنوعة والمواضيع المميزة ، كل عام وانتي ومدونتك بالف خير وان شاء الله مدونة العمر كلة والفرح كلة ...

Michomeme said...

لايون كنك بالعكس ما متاخر الحلو بيك انو كتبت تعليق حتى لو مر على الموضوع ايام، شكرا على كلامك الحلو واحساسك الاحلى دائما، صح افتقدت وجود تعليقاتك على مدونتي بس جنت عاذرتك دائما واني اللي اعرف ظروفك كلش زين، وصدكني ما مقصر بأي شي..ولا تكول المتاخر دائما، بالعكس انت جنت اول واحد تكتبلي تعليق وتكون مطلع على مواضيعي اول بأول، بس دائما تجي علينا ايام نكون بيها مشغول او ما نكدر نكتب تعليق، ف اعذرك والله وماكو تقصير منك بأي شي.


وشكرا على تهنئتك الحلوة

فرحتني