Tuesday, January 16, 2007

زينة الاموووووور

ورحت للكلية مرة ثانية، يعني عدد الايام الي رحت بيها للكلية كله بس خمسة ايام او ستة..ومن المفروض الدوام الرسمي يبدي من الشهر العاشر، يا ســـلام، يلة المهم اكو دوام ودة نطلع ونشوف ناس، واكو شي يدل على الاستمرارية، اليوم طلعت من البيت وعلى رأسي علامة استفاهم جبيرة بخصوص السايق الجديد الي راح يوصلني، بالبداية عجبني انو هو ملتزم بوقته جدا، بعدين اكتشفت انو هذا الشخص مهدد من قبل جهة معينة، لحظة لحظة..مهدد!! شلون اصعد بالسيارة وية شخص مهدد؟؟ خوفا على نفسي ما المفروض اصعد لان بأي لحظة اخاف "يجفتون" يعني "يهجمون" علينا ويسووله شي خطية وكدام عيني اني وين اتحمل؟؟ هاي اذا ما سوولي شي وكتلوني اني هم، طبعا بقيت الوكت كله بطريقي للكلية مرعوبة واراقب الطريق واتشاهد لان كلت مراح يعدي هذا اليوم على خير، مع العلم السايق "ابو دعاء" جان مرتاح وفريش كلش..وبنص الطريق كال :" احتمال ما اكدر اجيج الساعة بالوحدة او12 ونص الظهر، فأني اتصل بيج واكولج ما راح اجي حتى تاخذين تكسي ورتجعين لبيتكم!!!" شنو؟؟ ارجع بتكسي؟ وبهذي االظروف ولوحدي؟ ليش شنو شافني المرأة الحديدية؟؟مممم..يجوز اني كونان المدمر..عاااا ساعتها من كال اخذي تكسي ردت ابجي، كتله :" على بختك ابو دعاء شلون اني بنية اخذ تكسي بهاي الظروف؟ اخاف والله لو اعرف ابات بالكلية وما اطلع وية واحد تكسي لان اخاف..جانت مدة هذا الكلام مجرد دقايق قليلة بس الافكار الي مرت على بالي كلش هواية، رأسا تخيلت نفسي واكفة بباب الكلية وعيني على الشارع، انتظر سايق تكسي يمر، طبعا، لازم يكون رجال جبير، شكله مريح، اخاف يطلع ارهابي؟ يخطفني؟ يطلب من اهلي فدية؟ يبووووو..يبوووو..المهم اني كلت اله ما تعوفني اليوم تجي عليه ما اطلع من الكلية ونزلت من السيارة وايدي على قلبي راح يجي السايق لولا؟ وصلت الكلية والحمدلله وانكضى الوكت بشكل خيـــــــــــــالي، رائع، مو طبيعي ابد..
قبل كم يوم اخذت صور للشارع بطريق الرجعة من الكلية للبيت، وراح انزلها على البوست...من رجعت من الكلية تعرفت على زوجة السايق، واكتشفت شكد اكو ناس بسطاء وعلى نيتهم كلش، بنفس الوكت اكتشفت انو الدراسة والتعليم شلون تنفع الواحد حتى يكون سطحي بعلاقاته وية بعضهم ويعمق علاقته وية الناس المناسبين اله، يعني اني اول مرة اتعرف على ابو دعاء وزوجته بس عرف تاريخ حياتهم كله ومواليدهم ومغامراتهم،ظليت افكر هو احنة الطبيعيين لو السايق وزوجته الي حجولي حياتهم كلها؟؟ والله الزمن هذا غريب ونلكه بي العجايب.. ورجعت للبيت قررت اعوف السايق وادورلي على شخص جديد، ولكيته والحمدلله.
الشوارع كلش مو حلوة، وحالها بائس جدا، اكثر من مرة ردت اخذ صور اما لآماكن صاير بيها انفجار او مفخخة او عبوة ناسفة بس ما كدرت لان اكو مسلحين بالشارع، وجيش، واخاف اخذ صور لان من يشوفون شخص شايل موبايل وياخذ بي صور يرموه بكل بساطة.. واني ما مستعدة افقد حياتي بهاي الطريقة بس مشكلتي احب الصور واريد اوثق كل اللحظات الي نمر بيها وكل الايام الي عشناها بصور حتى ياااا ربي يجي يوم نقارن بين صورنا القديمة ووضعنا الجديد الي كلنا ننتظره، واني ادري راح يطول الانتظار بس متأكدة يجي يوم وكلشي يتصلح ونرع مثل قبل واحسن، وما يبقى منها شي بس صور شوارعنا البائسة وذكرى مؤلمة بنفس الوكت
..






هذه الصور اخذتها بشوارع بغداد والخط السريع يم منطقة الكم وباب المعظم

9 comments:

Marshmallow26 said...

Hello Micho,

How are you? I hope good!

أكولج ميشو اشو جنج ماخذة الصور بيوم منع التجول لان الشوارع كلها فارغة!! هاي هيجي صايرة بغداد كئيبة؟؟ طبعا ابد متشبه بغداد اللي رحتلها العام

الله يعينج و تلكين سايق غير مهدد

Michomeme said...

هلو مارشووو
هاي الصور اخذتها بيوم عادي جدا، لان اني بلة كلشي اخاف اطلع بالاياام العادية...فشلون اطلع بيوم حضر تجول :)
وبغداد صايرة كئيبة ومأساوية كلش..

ان شاء الله المرة الجابة من تجين لبغداد تلكيها احلى..

كلنا نتمنى هذا الشي..


ولكيت سايق غير مهدد والحمدلله

Marshmallow26 said...

الحمدلله لكيتي سايق الف الحمدلله

Morbid Smile said...

اي كلش مبينة زينه الاموووور. اتذكر هذا الخط السريع يم بيتنه شلون جان حلو, بس هسه مبين كلش مهجور.. حتى من اني جنت بعدني ببغداد مجان هيجي

:(

Se Sentir said...

Been reading your blog for a while. I was more interested in the French section (it needs more posts!)

I hope you are fine, I heared about a horrific incident at a university in Baghdad and that most of the victims were females. I hope you and your friends are fine!

Treasure of Baghdad said...

I miss Baghdad, Old Baghdad. Your photos broke my heart. Please be careful. I keep thinking about you guys and how horrible it is to go out in the streets.

The days I were in Iraq in 2006 were Golden Days compared to now!

My prayers to all of you.

attawie said...

It's so hard to see the photos, i didn't know where it was but after Morbido's comment I remembered the street.

Please keep writing so we know you are fine.
Good you found a new driver. hopefully he'll drive you safe.

take care and selam to your family

PRIMITIVE ARTIST said...

ياالهي كم احب باب المعظم وكم اتمنى ان اعود يوما لاتجول هناك من جديد كما كنت في سنوات الثمانينات يوم كنت طالبا في اكاديمية الفنون الجميلة ببغداد واخ والف حسرة واخ على بغداد الحزينة والتى اتمنى لها ان تعود ابتسامتها من جديد . اموت على بغداد حتى لوبقيت فيها بيت وحيد وشجرة وحيدة الله كريم يابغداد

Michomeme said...

مارشو..الله يعديها على خير وية السايق الجديد..




موربيدو..بعد ماكو شي بقى على حاله وكلشي تغيير..جنت احب هذا الخط السريع يم بيتنا لان على الجوانب كلها مزارع وخضار حلو تتفائلين الصبح لمن تطلعين وتشوفين هيج منظر بس هسة طول الطريق كل الي تشوفيه يزيد الخوف والقلق والتشاؤم..الله كريم..



se sentir
i saw your blog, i didn't know from where you are>.. you have to write in french so you can practice it and learn it more than you do...thanx for coming here




treasure of baghdad
هلووووو....المنطقة مو مثل قبل ما جنت بالعراق، اني متأكدة لو تشوفها مرة ثانية راح تكول اني جاي للمكان الغلط...ما ادري شوكت ترجع بغداد لجمالها الاول الي كلهم يتغنون بي..




attawi
هاي اتاوي..شلونج...هذا الطريق مرعب همزين ما تذكرتيه من البداية...ان شاء الله كل ما يصيرلي مجال اكتب حتى تكونون مطمنين علينا...سلامي للاهل..



primitive artist
اهلا بيك...كلنا نتمنى ترجع بغداد كما كانت واحسن..
الله كريم
عجبتني رسوماتك..