Thursday, March 01, 2007

هولاكو يغزو العراق من جديد...

طبعا ما جانت بنيتي ان اكتب موضوع الا علاقة بالظروف الحالية ولا حتى ردت اذكر كلمة من الي يخص حياة العراقيين بس ما ادري الاجواء الي جنت كاعدة بيها قبل كم ساعة لمن رحت لفاتحة احد الشباب الي تربطنا بي وبأهله علاقة صداقة قوية وقديمة، ظلت الافكار تدور ببالي، واني اسمع كل الــ(مصايب) الي يشوفوها الناس كل يوم، وحدة من النسوان الموجودات، كالت هذا مثل عصر تيمور لنك وجنكيز خان، ..بيني وبين نفسي كلت والله كلامها صح ونفس الدمار الي شافوه الناس بذاك الزمن بس الاختلاف هسة هذاك العصر القديم وهسة احنة بعصر السرعة، من سمعت كلامها تذكرت كتاب التاريخ الي درسته بالاعدادية والي بي احداث دموية وحروب وقتل ودمار، وأجة على بالي هذا العنوان "هولاكو يغزو العراق من جديد".. هولاكو رجع للعراق مرة ثانية، لكن بالمرة الاولى اخذ ثقافة العراق كلها من الكتب الادبية والعلمية والدينية، كل المكتبات والمؤلفات الثمينة ، وشمرها بنهر دجلة، وصنع منها جسر حتى تعبر عليه الخيول والقوات التابعة اله للضفة الثانية من النهر، ولكثر الكتب وما بيها من محتوى صار لون النهر ازرق بلون الحبر المستخدم بالكتابة، بس هسة هولاكو الي غزا العراق مرة ثانية تأثيره اقوى واشنع واكثر بشاعة، يا ريت لو اكتفى بأخذ الكتب والورث الثقافي وتوقف، يا ريت لو اخذ كل الاثار وما يتعلق بيها من حضارة العراق، بابل واشور وسومر، لآ..ما اكتفى، اخذ الارواح وياه، نهر دجلة هسة مو ازرق، لونه احمر بلون دم كل الشباب الي راحوا غدر، وكل الدمار والتعب الي نشوفه كل يوم، مدة نكدر نلزم راس الحية حتى نسيطر عليها ونتخلص منها، ما ادري الحل شنو، وليوين راح نصبر، رب العالمين يرزقنا بالصبر والحمدلله والشكر على هذي النعمة، بس الحل شنو؟؟ كافي ما اريد اكتب..

11 comments:

freeze said...

و الله بس هولاكو اشو يوميه يطلعنه واحد مدري منين

Michomeme said...

كلامك صح، يومية يطلع واحد.. بس كلهم هولاكو...واسوأ منه..

freeze said...

الصراحه هذه هولاكو الجديد مطب الدوله اله و سواهه محترمه شوفو اليابان شوفو المانيا شوفو كوريا الجنوبيه لسبب واحد و هو انو ناس تلك الدول رادو يصنعون من انفسهم شي و سوو .اي ادري صحيح هولاكو الجديد اله مصالحه بس عله كوله المثل القديم "اللي بي خير يسوي خير النفسه" و الصراحه اني بعد ما الوم اي دوله تعمل لاجل مصالحه و الشي المؤكد انو المسؤل الاول و الاخير عن الاوضاع التعبانه اللي ديعيشه هذه البلد هوه هولاكو .بس يا اخواني تره ذوله ربعنه ناس اجر بالطول و ناس اجر بالعرض و المن اتفهم ؟؟؟؟ واحدهم دوله ابحده محد يكدر ايحاجي .جنه نسمع بالمتوسطه عن درس التاريخ و موضوع تحرر الدول العربيه من الاستعمار و من هاي السوالف ,انو و الله الجزائر بلد المليون شهيد ...اريد افتهم باليوم العراقيين شكد دينقتلون و شكد اللي ديتهجرون اذا هسه بس بسوريا الاسد اربع ملايين لاجئ عراقي و الحبل عالجرار .شلون تاليهه ؟؟؟؟ما ادري.

Marshmallow26 said...

هلو ميشو

صار زمن ممتشاوفين؟

شلونج؟

اني هم بطل وهسي و مديعجبني أكتب

Michomeme said...

هلو مارشو...اني الحمدلله زينة بس كلش جنت ملتهية بالامتحانات وبحث التخرج فمدا الحك اكتب بوست جديد ولا اقرا بلوكاتكم، وهم كلما اجي عالنت ما الكي فكرة معينة اكبتها، فبالكوة دا اطلع الكلام هذا واسوي منه موضوع..

انتي شلونج وشنو اخبارج؟ ان شاء الله بخير.
استمري كتبي ..لان على الاقل دة نسوي شي بحياتنا ومستمرين بي والوضع ما يمنعنا منه..صح لولا؟

Morty said...

الصراحة على الاقل بزمن هولاكو من جانوا يكتلون يكتلون بالسيف و بس لا جان اكو خطف و لا دريلات بس شنكول الله كريم مثل ما رجعت بغداد برة هولاكو انشاء الله هسة هم ترجع احسن من كبل...

freeze said...

ان شاء الله

Michomeme said...

Kyubai
ان شاء الله ترجع بغداد ..كلنا نتمنى هذا الشي وننتظر اليوم الي نعيشه ونتذكر هاي الاحداث الي نمر بيها ونكول عليها :" أيـــه صارت سوالف"..


الله كريم

bo9ali7 said...

بصراحه الوضع لا يصدق
والواحد يحس بجرح بصدره لما يشوف اجمل الحاضرات العربيه تنتهي بهالطريقة المجنونة

A. Damluji said...

النقطة الثانية هولاكو جان واحد, هسة جم وجم بطل يريد يصير هولاكو وممدبرهة؟
ميشو, دوام الحال من امحال, ولا بد تزول الغمة. هذي كلنه متفقين عليهة بس اختلافنا في شوكت تزول؟؟

Anonymous said...

كس ام العراق هذا الي عندي
نشمي و افتخر