Tuesday, March 20, 2007

ألوان..



الاحمر..

الاحمر دائما يعبر عن الحب، والمشاعر الايجابية تجاه الاشخاص او الاشياء، مثلا اني احب هواية اشخاص، بس الي حبي الهم يعبر عنه اللون الاحمر همة ماما وبابا، موربيدو، مافيس، صديقاتي، والاشياء الي احبها، الكومبيوتر، الانترنيت، الموبايل، واي قلم لونه احمر، وكارت انطتنياه صديقتي سوسو قبل اكثر من سنة كتذكار، لونه احمر، الاحمر يعبر عن مشاعر واحاسيس حلوة وراقية، احلى شي بيوم فالنتاين الكل يلبس احمر(طبعا مو بالعراق لان الناس ملتهين بغير شي، بالعيشة وبالنفط والبنزين والكهرباء والمولدات والطرق التعبانة والظروف الصعبة) والكل لابسين احمر او شايلين ورد احمر، ما ادري ليش هواية ناس عارضوا مبدأ عيد الحب، الحب لا هو عيب ولا حرام ولا شيء منافي لقوانين الطبيعة، واول ما تبدي التحضيرات لعيد الحب نسمع بالرفض ضد الاحتفال بهذا اليوم، وكأنما الحب حرام، لو كان الحب ظمن حدود معينة وحسب تقاليد المجتمع اكيد يكون شي حلو، والحب انواع، لمن ينذكر اسم الحب ما ادري ليش الي يرفضون مبدأ عيد الحب يتحدد تفكيرهم بسور ضيق جدا وهو الحب الي ضد تقاليد المجتمع واخلاقياته، خاصة بمجتمعاتنا العربية، او الخليجية لان بديت اشوف المجتمعات الاخرى تتقبل هذا الشي وما تعارض عليه..أكره الناس السطحيين، خلونا نحتفل بعيد الحب احسن من ما نحتفل بعيد الاستقلال، مدري بيوم سقوط بغداد، مدري سقوط نظام صدام، خلونا نتهم لهاي الامور احسن من ما ناس تاكل ناس..خلي نسوي مث المسلسلة العراقية (ميليشيا الحب) الي طلعت برمضان، جان هدفها تكوين مجموعة هدفها التصالح وزرع الحب بقلوب الناس وينسون انتمائهم لآي طائفة او اي جهة او حزب او دين ويتذكرون انو احنة بشر، النا مشاعر واحاسيس..بس التنفيذ على ارض الواضع اعرف صعب، والتمني سهل والكلام سهل والحلم سهل، خلي احجي واحلم براحتي ماكو احد يكدر يمنعني ويكولي لا بمخيلتي وليوين اروح بيها..


* * * *
الوردي والابيض..لمن نسافر بأفكارنا لآي مكان حلو، هاديء، دائما نكول احلامنا الوردية، مخليتنا الوردية، عالم وردي، احس اللون الوردي يعبر عن الصفاء والبرائة والعفوية بكل شي، بالتكفير وبالتصرف، وحتى بحب الناس، واللون الابيض سلام دائم، صدق احساس، ذوق وضوح بكل شي، حبيت اجمع الوردي والابيض لان المعنى الخاص الهم واحد مكمل للثاني ..قبل سنة كتبت بوست بيوم24-3-2006 بمناسبة مرور سنة كاملة على صداقة جانت من احلى صداقة عشتها وعرفتها بحياتي، من اول يوم بيها من 24-3-2005 الى سنة 2006 وحاليا 2007 ما فد يوم صار زعل ولا اختلاف برأي، وحتى لو يصير اختلاف بالرأي ما يصير اله اي اثر سلبي بالعكس، كل يوم نكتشف شي جديد سوا، يوم احلى من يوم، نقاشات ومواضيع سوا، واوقات حلوة ما اكدر اتذكرها بدون ما ابتسم واكون فرحانة على هذي الذكريات الحلوة، والمتجددة يوم بعد يوم بعد يوم، اكدر اكول اللون الوردي والابيض والاحمر يعبرون عن احساسي بكل هاي الايام والمشاعر والذكريا الحلوة..مرت سنة وكتبنا بوست، وهذي السنة الثانية، وان شاء الله العمر كله..مافيــــــس..







6 comments:

Marshmallow26 said...

هلــو ميــشو

فعلا موضوع ملون...
احنا العراقيين كل يوم لابسين احمر بس مو قماش و انما دم

اتمنى كل ايامج تكون وردية و قوس قزح

ديري بالج على نفسج

باي

LionKing said...

بديت استصعب كتابة التعليقات على كلامك لان اريد انطلق بالكلام واحجي اللي بداخل كلبي في ثواني بس ماراح تسعفني ساعات وايام او سنين علمود احجي بيها واعلق بيها مااعرف عنك ام على مواضيعك او على افكارك !! ضليت حاير شنو اكتب ولحد اللحضة هذي حاير ... الألوان بحياتك حلوة من تعبيرها عندك والله يحفظ الك كل الاشخاص اللي تحبيهم بحياتك ويحبوك ويخلووك بنص عينهم مو بس لان التقو بيك كشخص وانما لان التقوا بعقلك وتفكيرك ومقترحاتك ونقاشاتك اولا اللي جان اثرها الجبير عليهم ... ميشو المناسبة اللي تفرحك ان شاء الله تتكرر عليك العمر كلة انتي واللي تحبيهم وتتكرر عليك عام بعد عام وطول العمر ... والالوان الحلوة بفكرتك هنا ان شاء الله تكون مخلوطة مابين حبك الصافي النقي بالاحمر واحلامك الوردية المتجددة اللي ادعو الها التحقيق ...
الحب مايحتاج مكان للتنفيذ لان الحب حب اذا بالعراق واذا بالقطب المتجمد وبالحب احنا اللي نصنع لنفسنا عالمنا ودولتنا الخاصة اللي نسمح من يدخل الها ويتعلم منها ومايسئ الها ..
السنة والسنتين والعمر كلة راح يبقى المكان اللي اتردد اله هوه هذي مدونتك اللي راح اكتب بيها طول عمري واتذكر بيها لأول حدث من أنسان حب مــــلاك

A. Damluji said...

كوداك أجمل لووووون

:)

Sentir said...

I don't know why I never liked red, I think it's too strong of a colour and of course it's the colour of blood! But its beauty is that it can be seen as the colour of love, strawberries, heart etc. as well. Maybe it depends on your perception and how you see things.

About your point regarding Valentine etc. I read a funny response on a blog regarding this. The blogger said that if there was a عيد التفخيخ or عيد التفجير then maybe those people would like it more and would wear red!

freeze said...

ان شاء الله ايامنه ترجع ورديه و لو قربت افقد الامل . معلينه بالي ميعجبه الحب و الفالينتاين اذا ميحب عيد الحب هاي مشكلته .
الصراحه كوه كدرت اكمل قرايه الحجي لان اللون الاحمر و الخلفيه السوده غوشت عيني ههههههههه

Michomeme said...

nwkمارشووو..
شكرا على كلامج الحلو..
وسلامة عينج..شلون صرتي؟؟
ان شاء الله يجي يوم نلبس احمر...بس احتفالا بعيد الحب..

انتي هم ديري بالج على نفسج اوكي

باي..





لايون كنك..
انت الي خليتني حايرة بشنو ارد ..لان كلامك رائع وما جنت متوقعة اقرا كومنت منك خاصة من بعد فترة طويلة..
..





Anarki-13
hi how are you?? long time no see, thaaaaanx..
take care ok

see ya





se sentir
يكولون كلمن وذوقه وشخصيته، هذا الشي الوحيد الي يخلي نظرتك عن اللون الاحمر مثلا مختلفه عن نظرة اشخاص اخرين..
اني ما جنت احب اللون الاحمر..بس شو رأيي عنه اختلف..
وبخصوص عيد التفخيخ،..والله بهذا الزمن كلشي نتوقع وماكو شي مستحيل..



freeze
يلة المرة الجاية ااذا كتبت بالاحمر عود اكبر حجم الخط..