Sunday, April 01, 2007

عبرت الشط على مودك


و عبرت الشط على مودك..
الكل يعرف انو هاي الجملة مأخوذة من اغنية قديمة للفنان كاظم الساهر، طبعا تنطبق هاي الجملة على واقع الحال العراقي البحت والمزري جدا جدا، اكتشفت انو احنة من صدك دة نرجع ليورة بحيث رجعنا الى زمن (عصمللي)، وهاي الكلمة جاية من العهد العثماني، يعني قبل اكثر من مية سنة، بالعهد العثماني ما جان اكو كهرباء وبالليل من يريدون يشوفون دربهم يشعلون (فانوس) او (لالة) ، بس الفرق بيننا وبين العهد العثماني هو وجود (المولدات الكهربائية) الي تبقى تشتغل من الصبح لليل وهم ما تنفعنا وتحمينا من حر الصيف الخيالي، والي يفوق الوصف، بس مثلا بالعهد العثماني ما جان اكو موبايل وانترنيت وتليفونات ارضية، بس اكو طرق نقل ومواصلات، تتمثل هذي
الطرق بالعربانة الي يجرها حصان، او البلم الي يودي الناس من ضفحة نهر دجلة الاولى الى الضفة الثانية. طبعا من بعد العهد العثماني وفترات متتالية مرت على العراق سواء سلبية او ايجابية شاءت الاقدار وانبنت الجسور الي تربط المنطقتين الواقعة على جانبي نهر دجلة، وصار تطور بالنقل والي يريد يروح للجهة الثانية يعبر الجسر بالسيارة..وبما انو العراق من بعد الاحتلال وسقوط النظام السابق (بغض النظر عن سلبيات او ايجابيات كل من الاحتلال والنظام السابق) بدأ العراق يرجع ليورة وبسرعة فائقة جدا..حيث ان الجسر المسمى (بجسر الائمة) مغلق تماما خاصة بعد الحادث المؤلم الي صار عليه وراحوا بسببه ضحايا وبأعداد هائلة..انسد الجسر، وماكو طريق ثاني يودي
على الضفة اللخة من نهر دجلة والي هي منطقة (الكاظمية)، ففكروا الناس ان يدورون على بدائل حتى تستمر الحياة وحتى تبقى اكو وسيلة سهلة للنقل نكدر من خلالها نوصل لمنطقة (الكاظمية) طبعا، دائما الانسان العراق يلجأ الى الانتيكات، والزمن القديم، مو لما للزمن القديم من ايجابيات، وانما لعدم توفر الظروف المناسبة حتى يبدع بيها ويخترع اشياء جديدة ومعاصرة، ولعدة عوامل لو اعددها منا لباجر ما راح يخلص هذا البوست..
المهم، الاكتشاف الجديد الي صار من بعد الجسر المغلق المؤدي الى منطقة ( الكاظمية) هو عبارة عن (بلم او زورق صغير) يعبرون عليه الناس من جهة الى اخرى مثل البلم الي جانوا يستخدموه بزمن العهد العثماني، والناس يعبرون بي مقابل دفع مبلغ قليل جدا وهو(250دينار عراقي للشخص الواحد) مع ملاحظة ان هذا الزورق قابل لآن ينقل انواع (الاشياء) من (الاوادم ..يعني الناس، الى صناديق الفواكه والخضروات وجليكانات البنزين والنفط والمرضى والعجائز، وحتى الماشية ومنهم ..الطليان)..طبعا ما كلت (خرفان) للي ما يعرف شنو خرفان هي جمع خراف بس باللهجة العراقية، ما كلت خراف حتى توصللكم الصورة مثل ما وضحتها الي ماما وبيبيتي لمن رادوا يروحون
لمنطقة (الكاظمية) فعبروا الشط على موده..بس الحمدلله (الطليان) ما صعدوا وية ماما وبيبي بس جانوا على غير بلم (او زورق) ..فبدال ما يصلحون الطرق، ويعمرون الجسور، ويسوون النا ميترو الانفاق جديد بالعراق، عافوا التطور كله ورجعنا لزمن عصمللي وكمنا نعبر على الجهة الثانية بالبلم..ما ادري اريد اتخيل نفسي بيوم الي اريد اروح للجهة الثانية هم راح اصعد بالبلم؟؟..مدا اكدر اتخيل المنظر واكيد بيوم الي اروح لهناك اكتب بوست عن هذي التجربة الجديدة جدا!!
مع العلم اني اخاف من المي كلش....

وعبرت الشط على مودك ..خليتك على راسي..
كل غطة احس بالموت..وكوة اشهك انفاسي..
كل هذا وكلت امرك..احلى من العسل مرك..
وين تريد اروح وياك...بس لا تجرح احساسي..
وخليتك على راسي..

7 comments:

Morty said...

I actually wished that your post is an April fools day post and that u r joking about the whole thing but unfortunately it is not since as u've said in Iraq we tend to use old fashion stuff not by our own will but we r forced to do so any way great post and I hope that u won't be obliged to cross the river and it is said "امشي شهر و لا تعبر نهر"...;D

A. Damluji said...

عمي يا مترو انفاق يا تطور؟
هذي افكار قديمة و متحجرة

احنا الجماعة طوروها بحيث يحطون البشر كبل بالأنفاق بلا مترو ولا هم يحزنون

great post Micho, as usual :)
take care, salam to all!

jisoo said...

مرحبا ميشو هذه اول مره اكتبلج تعليق بس مواضيعج حلوه ... والله اني برأيي اذا تبقى بيد الجماعه لا هوايه راح نتطور بس نتأمل بالناس الخيرين الشرفاء يستلمون زمام الامور بالبلد

Anonymous said...

لا مو هوه تدرين شفكروا الجماعه ؟؟؟؟؟كالو نكطع الجسور ها و البارحه هدمو جسر كله علمود يخلقون فرص عمل . اتصوري ابو البلم راح يشتغل و يعيل عائلته و اللي يصلح منضومات السيطره و الملاحه مال البلام هم راح يجي شغل و اعتقد راح يسوون شرطه مرور بالشط حته ينظم حركه المرور ويصدر مخالفات بحق الطليان اللي ما شاده رقم و ممراجعه المرور ...ها شفتوا انتو شلون تضلموهم للمسؤليين هههههههههههه

A. Damluji said...

وتكوم البلام تصير فردي زوجي
ويحطون كونكريتات طايفة علة فلين بالشط
ويم كل كونكريتة ثنين حرس وطني لابسين جوب

وطبعا ما ننسى سيطرات وهمية
ويصير ذبح الطليان عالهوية

هااا وينسد الشط أذا أكو اجتماع
ووووو كافي تحشيش ارد انااااام

Michomeme said...

Kyubai
والله اني هم تمنيت ان يكون هذا الشي مجرد كذبة نيسان مؤقته بس مع الاسف حقيقة واقع واذا يعجبك تكدر تروح وتشوف المواصلات من زمن عصمللي هعهعهع..وبالمناسبة لحد الان ما عبرت الشط..



Anarki-13
شلونك اناركي؟؟ ان شاء الله بخير، بس اريد اعرف شلون يخلون البشر بالانفاق بدون المترو؟ اخاف هذا مو نفق؟؟

شكرا على تواصلك الدائم، سلامك وصل..


jisoo
اهلا بيك جيسو..واشكرك على رايك، احنة كلنا نتأمل الخير والسلام يرجع النا، واملنا بألله جبير..



freeze
هعهعهعهعهعهعهعهعهع
شنو القصة..الظاهر انت تشتغل وياهم؟؟؟



Anarki-13
تصبح على خير


:)



thnak you all

A. Damluji said...

:D
كنت اقصد انه عدنا بدل ما نهتم بوسائل النقل الجماعي, اهتمامنا كله محصور بوسائل القتل الجماعي

الف مبروك التخرج مرة ثانية

take care now, stay safe!