Monday, April 16, 2007

يوم التخرج..








جان المفروض اكتب هذا البوست بيوم الاحد بس ما صارلي وكت، يوم الاحد جان يوم مميز وحلو كلش، ابتدت حلاوته من قبل فترة لمن بدينا بالتحضيرات لصورة التخرج الجماعية، يوم الاربعاء جان يوم غريب كلش من العاصفة الي صارت ودرجة الحرارة الي انخفضت بشكل ما متعودين عليه بشهر الرابع الى المطر الي ما خلصت منه ومطرت علية من اول ما دخلت للكلية ونكعت، وبردت، بس كل هذا نسيته لآن بدينا بعدها بالتحضيرات للحفلة وتعليك الزينة واللافتات والاسماء الخاصة بالدفعة مالتنا، واسم دورة التخرج والالقاب لكل شخص، جان يوم مميز كلش وما تصورت من بعد المطر والبرد الي شفته وحسيته راح يصير هيجي يوم حلو وما ننساه.. مر الاربعاء والخميس والجمعة والسبت ورحنا الاحد للكلية وكلنا متحضرين، جانت اغلب اقسام الكلية صور تخرجهم يوم الاحد، اكثر البنات لابسات الابيض والاسود، والشباب على اخر اناقة، منظرنا حلو، الي يشوفنا يكول المستقبل من صدك كدامهم وما يكول علينا مستقبلنا مجهول وبس الله الي يدري ليوين راح نوصل كلنا من بعد التخرج.


من احلى الي صارلي بيوم التخرج اتصال من اختي الصبح، دة تباركلي على التخرج، وصديقاتي من غير كليات اتصلوا بية بنفس اليوم، ورجوع صديقتي علوش من سوريا من بعد فترة غياب طويلة جدا بسبب الظروف لكن الحمدلله رجع عدد الكروب مكتمل، بس اكيد ينقصنا (يوني) الي داومت ويانا سنتين بس وسافرت بعدها واكيد السبب اوضاع العراق، الصور الي اخذناها هواية، فحبيت اخلي الصور الخاصة باللافتات والزينة، ومن بعد صورة التخرج، والوكت الحلو، والتصوير، والدي جي والاغاني، صورنا لقاء على قناة العراقية، يسألونا عن مشاعرنا بهذا اليوم وشنو هي الخطط والمشاريع من بعد التخرج، ما ادري الطاقة من وين اجتي علية وكلت الا احجي!! المذيع سالني عن مشاعري وكلته اكيد هي مشاعر فرح لان يوم حلو ومنجمعين ودة نحتفل بالتخرج بس بنفس الوكت اكو مشاعر حزن لان الايام الحلوة انكضت بسرعة والزمالات والعلاقات الاجتماعية بداخل الجامعات ما تتكرر من بعدها، كل هذا راح يصير من الماضي وتبقى منها صور وذكريات، وخاصة احنة الشباب العراقي مستقبلنا مجهول ما نكدر نحقق طموحنا بالشكل الي نريده لان راح نواجه صعوبات، بس نكول الله كريم.. وانتظرنا اللقاء يطلع، وصورونا..والحمدلله طلعنا بس شنو مقتطفاااااات فقط، واني الوحيدة الي طلعوني احجي من مجموعتنا من قسم الفرنسي وجبت كامرا الفديو وصورت حتى اكون موثقة كل التفاصيل الخاصة بهذا اليوم، حتى الشريط الي نلبسه احنة المتخرجين وعليه العلم الفرنسي احتفظت بي..

وبدينا بالتعداد العكسي، الايام الباقية النا قليلة كلش، ايام الكلية والدراسة والامتحانات والتجمعات الحلوة راح تنتهي، الحمدلله جانت ايام حلوة بالنسبة الي، حبيت الكل، والكل حبوني وكونت صداقات حلوة ومحترمة، وجنت متوفقة بدراستي، ومتمكنة من اللغة بس اريد اطور نفسي اكثر واكثر، واتمنى ان اكدر اكمل دراسة، او اتخصص بمجال العمل بالجامعة او اي مجال بأختصاصي وتكون اللغة الفرنسية دائما محور مهم يشغلني، لان هي الشي الوحيد الي راح يبقى عايش وياية ويذكرني بكل لحظة كضيتها بالكلية حلوة او مرة، وبكل ضحكة سمعناها بموقف حلو وبكل دمعة تنزل على يوم الوداع..اتمنى للكل السلامة والصحة دائما، وان يجي يوم ونلتقي مرة ثانية حتى لو بالصدفة..


ميشو..

12 comments:

A. Damluji said...

ايييييييييييييه
عمي منو كدكم اليوم؟
الف الف مبروك اختي العزيزة ميشو وان شاء الله يوم ل
Morbid Smile!

:D seriously congratulations!

Marshmallow26 said...

ميشو ايباه ذكرتيني بيوم تخرجي و بالايام اللي :كًظيتها بالكلية جان كًروبنا دائما متماسك بس كنا متوقعين انو راح يجي يوم ورة التخرج بهواية اللي نخاف انسلم بي واحد على الاخر, ناس سافرت و ناس ماتت و ناس اتزوجت و الله يديري غير ناس وينهم؟

يلا معلينا: الف مبروك يا مادموزيل ميشو و انشاءلله يوم الفرحة الكبيرة
حاولت اتخيل يا اسم يرهملج و احزرة من خلال لوحة الاسامي

Marsh

Michomeme said...

Anarki-13
شكرا اناركي، اي والله من صدك منو كدنا، احنة جنا احلى كروب من ضمن كل الي دة يتخرجون، هو اما احنة مغرورين، او من صدك الفرنسي ملوك اللغات مثل ما هو معروف عند الكل..هعهعهعهعهع..شكرا الك مرة ثانية...





marshmallow26
مارشووو، اي والله ايام حلوة، وحسينا بقرب العلاقات بهاي الحفلة بشكل مو طبيعي، وبعدها اختلفت حتى تصرفاتنا وصرنا اقرب، احنة نتمنى ان نلتقي مرة ثانية بس الله اعلم، واكيد بعدين كلمن ويلتهي وية حياته والي يشوفه بيها، وان شاء الله خير عالجميع..لان الكل يستاهل الخير..

مارشو..اني فطوطة
هعهعهعهعهعهع

هسة عرفتي اني منو؟؟
:)





thank u
thank u
thank u

Marshmallow26 said...

ههههه اكيد اني و انتي خوات
عرفتي ليش؟
ظلي فكري
:]

attawie said...

يااااااااااااي ميشو بحفله التخرج!!!

ولا انسى اول يوم جيتي بيه لبيتنا ويه موربيدو و شعرج الطوييييييل

اني يوم تخرجي مجان هيجي ونسه لان اني جنت يوني بالنسبه لكروبي
اني تخرجت بمكان و هم بمكان

المهم الف مبروك يوم الي نشوفج استاذه
سلام للعائله
rkhboso was my verification word
funny huh

layal said...

مبروووك يا ميشو علي التخرج ولن شاء الله ايامك كلها افراح
مر علي تره عندي واجب لك اتمني تحلينا

صاحب البوابــة said...

الف الف مبروك التخرج

تمنايتى لك بمستقبل مشرق

http://elbawaba.blogspot.com/

Bassam Sebti said...

مبروك ميشو. يوم نركص بعرسج و نجيبلج مزيقة

:D

Michomeme said...

مارشمالو..
فكرت..هي وحدة من اثنين
لو انتي هم ميشو واني مارشو...لو الاسم الثاني...بس بقيت حايرة..
لعد انتي ميشو مو؟

هعهعههعهعههع






attawie
ولاااااا اني انسى ذاك اليوم الي جيت بي لبيتكم وية موربيدو، تصوري غبت من المدرسة حتى اجي..جنت صف سادس اعدادي..وهسة صف رابع كلية..بس بعده شعري طويل..
اني تونست بالحفلة مال تخرج بس تمنيت لو موربيدو موجودة..بس عوضت علية بمكالمة من الصبح...
وشكرا الج اتاوي..وانتي هم سلميلي عالاهل..وكوليلي شنو اخبار الاغنية كملتوها؟؟





لياااااااال:
شكرا على التهنئة ..وينج من زمان..؟؟مريت على مدونتج وان شاء الله بأقرب وقت احل الواجب :)




صاحب البوابة:
شكرا على مرورك والله يبارك بيك يا رب..






treasure of baghdad
الله يبارك بيك..شكرا..هاي وينك شو ماكو؟؟ اكيد غركان بالدراسة مثل موربيدو؟؟
يا ربي يجي يوم ونسمع صوت المزيقة من جديد..

كاردينيا said...

طبعا ميشو بالبدايه احب اهنيج على البلوك الحلو
وعلى الاسلوب الرائع بصياغه الافكار
وبالنسبه للتخرج اني بعدلي سنتين واتخرج بس هم دا احس بشعورج
وطبعا مثل ما نعرف كلنا احلى ايام الشباب هي بالكليه
بالتفويق بحياتج الجايه
و ديري بالج على نفسج

Through Grace Peace said...

Our Eyes Dream Acid Tears

One land, one people, all asleep
one dream in every mind
all see words of scripture, captive
in a vise of hatred, crushed
distorted words of God, acid
tears, with screaming lips, the captor
feels the kiss of Satan
on his heart.

jisoo said...

مساء الخير
الف مبروك اختي ميشو ان شاء الله بالموفقيه والنجاح بالحياة المهنيه