Wednesday, August 01, 2007

سلام من سوريا


سلام من سوريا
بالبداية احب اسلم على موربيدو ومافيس وكل الصديقات والاصدقاء الي يدخلون على البلوك، صارلي اكثر من شهر بسوريا، لحد الان ما عرفت عن شنو اكتب او اي موضوع اختار حتى يكون بوست جديد الي، الفرق بين العراق وسوريا جبير مستحيل اكدر اوصفه، وصارلي تقريبا ساعة افكر اريد اكتب وما ادري عن شنو اكتب، الناس بعالم غير عالمنا، من ناحية العيشة، الونسة، التصرفات، تقاليد المجتمع، كلشي مختلف، الجو، الطبيعة، واتصور العالم كله يختلف عن العراق والظروف الي بي، كلهم متعايشين سوا، يشتغلون، يتونسون، يسهرون بالكافيهات لآوقات متأخرة، بس العراق صار مدينة اشباح، حضر التجول كل يوم جمعة وصلاة الجمعة صارت ظاهرة نادرة عدنا، اشوف الناس بيوم الجمعة كلهم يروحون للجوامع ويستمعون لخطبة يوم الجمعة، بس لاحظت شي، الناس بسوريا يومهم يبدي من الساعة 11 الصبح، ونادرا ما اهل المحلات يفتحون من وكت، ويوم الجمعة حسيته كئيب لان اغلب المحلات معزلة، ومواصلات ماكو، بس منطقة (باب توما) تكون مزدحمة لان اغلب سكانها مسيحيين، وتكون عطلتهم بيوم الاحد، كلشي بسوريا اله معنى، الاشياء فقدت معانيها ببغداد، وكأنما الحياة انمحت، وما صار الها وجود، والناس تعبانين، وينتظرون المجهول، السوريين يتصرفون ببرود، واعصابهم هادئة، وكلما نتعامل وياهم يكولون ( طول بالك)!! مرة دخلت لمحل حتى اشتري كارت تعبئة للموبايل، كان اكو رجال عراقي دة يشتري قبلي وسمعته يحجي وية صاحب المحل، صاحب المحل كال (يا اخي طول بالك) العراقي كال : (ماكو شخص طوول باله اكثر من العراقي، احنة الوحيدين الي طولنا بالنا ولحد الان ما حصلنا شي، وتريدني هسة اطول بالي؟ ) ميدرون احنة اعصابنا ونفسياتنا تعبانة من الي صار وديصير النا.


من اكثر المناطق الي عجبتني بسوريا هي الصالحية وشارع الحمرا والشعلان، لان المكان بي حدايق عامة واني وصديقاتي نحب مرة نتمشى ومرة نكعد، واكثر من مرة تواجدنا هناك، والسبع بحرات وشارع التسعة وعشرين ايار وساحة يوسف العظمة، لحد الان ما صارت الي فرصة ازور الاماكن الاثرية، واذا صارت وزرتها اكيد راح اكتب بوست وانزل صورها. حبيت سوريا اكثر من عمان بهواية، لان اكبر، ووجود صديقاتي وياية اثر علية وما حسيت نفسي لوحدي، اتمنى كل هذي الطلعات الي صارت تكون ببغداد، ادري هذي امنية صعبة ان تتحقق، بس ماكو شي بعيد عن رب العالمين.


بيوم الي منتخبنا الوطني حصل الكاس، الشوارع انملت بالعراقيين الشايلين علم العراق ويرددون هتافات تشجع وتهني المنتخب، وكل العراقيين احتلفوا سوا، جان شي كل حلو، واتصور اكثركم شفتوا هذي الاحتفالات على قنوات التلفزيون.
البوست قصير، حاولت اكتب اكثر بس الافكار دتختفي، بس المهم اكون متواصلة، بوست صغيروني احسن من ماكو مو؟؟ ان شاء الله بالايام الجاية احاول اكتب اكثر، واتواصل...وشكرا لكل المتابعين البلوك ويكتبولي تعليقات.



ميشومن سوريا

5 comments:

layal said...

شلونك ميشو
استمتعي بوفتك بسوريا
واتمني تعرضي لنا ما قمتي بزيارته في سوريا
موضوعك رغم قصره الا انه كافي ووافي
تحياتي

Marshmallow26 said...

ميشو
نيالج عزيزتي ما اريد احسدج بس يا رب تتمتعين بهالسفرة و طلعين قهرج مال دراسة و الوضعية اللي شفتيها ابغداد

روحي سوك الحميدية هم سوك عريض طويل حلو و اسعارة رخيصة و بضائعة حلوة

Konfused Kid said...

good luck and hope you are having fun in Syria, we are missing you.

Michomeme said...

ليااااااال شلونج ان شاء الله تكونين بخير، والله اجواء سوريا حلوة وان شاء الله اكتب بوست وانزل صور عن الاماكن الي رحتلها ...وشكرا لتواصلك ...
تحياتي...





مارشووو شلونج؟ ان شاء الله تكونين بخير..
والله يا مارشو اني متونسة وصدك طلعت القهر كله مال الحبسة والوضع ببغداد، بس تدري شي؟ رغم الونسة بس اكو شي ناقص تحسين، يعني نتمنى لو هذي الونسة والراحة ببغداد..
طبعا رحت لسوك الحميدية لحد الان اكثر من خمس مرات، واحلى ما بي الشام القديمة ان شاء الله بالصور تشوفوها..هي سوريا كلها حلوة
يلة مارشو ديري بالج على نفسج
وبالمناسبة اتمنى الموفقية لآختج ..من قريت البوست الي حجيتي بي عنها تذكرت يوم الي سافرت اختي...
ان شاء الله ماكو شي يفرقكم
تحياتي





konfusedkid
hi how are you?i hope u r doing fine, im having sooo much fun in Syria..
w teshtaqlak al 3afia

Overcomer said...

Everyone must convert from false Islam to true Christianity. To see the difference simply put the Bible side by side with the Koran on a table in front of you and read the New Pentateuch (Mt. Mk, Lk, Jn, Rv which books contain most of the words of Jesus Christ) comparing it to the Koran. You'll find there is no comparison.

The Christian God is absolute spiritual perfection, and Jesus His only begotten Son is absolute perfection in human form.

Allah, the one who cannot beget, is without life, an inferior idea forced on you by a history of war which continues.

Change your hearts and minds to pursue Jesus and become absolutely perfect like He is. Pursuing Him is the reason the USA is a superior nation. Be smart, join the winning side now. Eventually the entire world will convert.