Saturday, October 01, 2005

ذكريات العطلة الصيفية لعام 2004-2005

هلو....باجر اول يوم دوام بالسنة الثالثة الي بالجامعة...واخير راح نداوم, لان كعدة البيت كلش مزعجة وما كدرنا نطلع او نشوف صديقاتنا لان الوضع ما يسمح بهذا الشي..الطلعة الوحيدة الي بالعطلة لمن رحنا للشمال..اني وماما وحنون وخالتي وبنتها شهد وندى صديقة حنون..جانت الفرة لمدة 5 ايام فقط...بس جانت سفرة من العمر..الاجواء جانت جديدة علينا لان صارلنا فترة طويلة كلش ما طلعنا هيجي طلعة ...بالظبط من قبل احداث الحرب الى وقتنا الحالي..واخذنا كومة صور بالشمال..رحنا لشقلاوة اول يومين...طريقنا للشمال كان كلش طويل...وصلنا بابا الصبح الى مكان الشركة بالاعظمية وبعد ربع ساعة من الانتظار صعدنا للسيارة واخذنا اماكنا واني كعدت يم شوشو(شهد).الطريق كله كنا نسمع اغاني عربية من ضمنها اغنية فضل شاكر...خلصت كلامك ولة لسه..في كلمة بتجرح لسة ناقصة...قلها وخلاص..قول اي كلام في بالك..قول مدام بيهو عليكايامي الي انت عارف اني كنت بعيشها ليك..
وصلنا لشقلاوة تقريبا الساعة 3:30 او 4:00مدا اتذكر الوقت بالضبظ بس المهم كان ظهر والجو حلو ومنعش والشمس بالشمال عبالك تختلف عن شمس بغداد..مشينا مسافة معينة الى ان وصلنا للفندق المخصص للمبيت...وحجزنا الغرف والمفروض الساعة 7 العصر نتجمع حتى نروح لكازينو على الوادي ..
دخلنا غرفنا...ارتاحينا وظلينا اني وحنون وشوشو وندى على القريولات..صافنين وتعبانين ما مصدكين احنة بالشمال وشلون وصلنا سلامات...احنة ساكيتن..وعلى غفلة شهد كالت:((هاي احنة شجابنا؟؟؟شوصلنا لهنا؟؟ اليوم الصبح جنا بالاعظمية والبارحة جنا نايمين بغرفنا...))وكمنا نضحك ضحك عليها...بالكوة سكتنا...السفرة شكد جانت بسيطة والمكان بسيط بس احلى سفرة جانت...ايام من العمر..احلى خمس ايام
صارت الساعة 7 العصر وبدلنا ورحنا لمكان التجمع...وبطريق الروحة للكازينو كانت الشوارع ازدحام وما انسى ابد منظر الجبال والاشجار...الجو نقي وصافي صفاء مو طبيعي..والناس على حافات الوادي كاعدين همة وعوائلهم...الي دة يشوي..والي دة يسمع اغاني والي دة يركص دبكة كردية...صدك جنا بغير عالم..مختلف تماما عن بغداد..وخاصة بغداد بأخر فترة صار وضعها مو زين..انفجارات وطرق مسدودة وازدحام والقذارة الي بالشارع وعدا هذا كله حتى البشر مختلفين...
وصلنا للكازينو وجان كلش حلو...اول ما وصلنا ماما كامت تغني اغنية هيفا وهبي...
رجب..حوش صحبك عني
رجب...صحبك جنني
رجب..قرب طمني.
رجب..قلو يسيب قلبي
واحنة ضحكنا....لان الولد المسؤول عن الشركة..(المرشد السياحي المفروض) لقبناه باسم ..رجب..لان جان يشبه ممثل مصري اسمة محمد رجب فمشت عليه التسمية ...وظلينا طول السفرة نسميه رجب الى ان عرف
والله ايام حلوة...
ظلينا بالكازينو الى الساعة 12:00 بالليل...تعشينا...اكيد العشاء كان مشويات...اهل الشمال معروفين بالكباب والتكة الشوي...جان الاكل كلش طيب..والجو بااارد كلش...نقاء وصفاء ...تذكرنا بابا لان مجان جاي ويانة واكيد جان مكانة خالي لان بابا كلش يونسنا بهيجي طلعات....وكلنا خطية اهل بغداد هسة طافية عدهم الكهرباء لو دة يحولون الكهرباء من الوطنية الى مولدات الشارع .
يلة هذا حال العراقيين...الف الحمدلله والشكر على كل شي
تعشينا وكملنا واخذنا صور وبعدين تمشينا على الوادي اني وشوشو وكمنا نغني....
معقولة انا جنبك هنا عايشين بشوق ما بينتهيش...
من اللحظة دي عمري ابتدى من الحلم دة ما تصحينيش...
close your eyes, give me your hands darling
do you feel my heart beating? do u unserstand?
do u feel the same? or am i only dreaming?
is this berning...an eternale flame....
وبعد كومة اغاني حلوة....وراها رجعنا للفندق...جانت شقلاوة كاعدة على حيلها..الناس كلهم بالشارع...بنات وولد..شباب..عجايز...كلشي...ناس يتمشون وناس يتسوكون ...وكل شخص ملتهي بشغلة...واكثرية الموجودين اكرااد...دمهم بارد كلش..بحيث اني اشتاقيت لاهل بغداد...كلت لماما عاجبني اشوف اي شخص من بغداد يكون اسمر مو مثل اهل شقلاوة كلهم بشرتهم فاتحة...بس همة خوش ناس وخدومين..
ثاني يوم كعدنا الصبح الساعة 7:00
بدلنا ورحنا تركينا بس هم بداخل الفندق..جاي وصمون حار ...وعلى البلكونة والجو رائع ما ينوصف...وبعدها رحنا لشلال كلي علي بك
الطري حلو...جنا نصور بكاميرا الفيديو..وناخذ صور...وصلنا للشلال جان كلش حلو والمي باااااارد كلش...اول ما شفت الشلال تذكرت الصورة الموجودة اله بكتاب الجغرافية....هاهاها
وبقينا ساعة تقريبا وبعها تحركنا الى بيخال...شلاللا قوي ومي بارد...روعة...رحنا وجانت هوسة وكومة ناس جايين...تغدينا وتمشينا شوية واخذنا صور...بعدها رجعنا تعبانين كلش للفندق
لان ما متعودين على هيجي حركة وخاصة احنة صارلنا فترة طويلة ما طالعين او باذلين جهد عضلي
بس حتى لو تعبنا جنا كلش متونسين
ومن رجعنا تمشينا العصر بشقلاوة واشترينا حلويات وكعدنا بالبلكونة مال الفندق وخابرنا لبغداد..
ثاني يوم كعدنا الساعة 7:00 وهم تريكنا وحظرنا الجنط ورحنا لدهوك...والطريق جان حلو كلش..
وصلنا لدهوك بوقت الغدا تقريبا ورحنا تغدينا والعصر رحنا للسوبر ماركيت ((مازي)) و((دريم سيتي)) وجانت كلش حلوة وكلها شباب وبنات وماكو مضايقات والحلو انو هي ازدحام حتى بالليل وبعدها رجعنا للفندق وتحضرنا لثاني يوم حتى نروح لسولاف
وبالليل خابرنا لبغداد وعرفنا انو الجو عجاج وجانت العاصفة التراية اقوى من كل مرة ...
ثاني يوم كعدنا الصبح ورحنا لمصيف سولاف...المي بارد كلش وتسلقنا الشلال..وتغدينا...
واتفقنا من نرجع نروح لمدينة الالاعاب مرة لخ
ورحنا العصر وتونسنا كلش كلش وجنا كروب كلنا من نفس العمر
اني وحنون وشوشو وندى
وماما وخالة
ومظفر الي هو نفسه رجب
وعاصم وصفا وصدى وصبا وسامر ومجموعة بنات ما اتذكر اسمائهم
وبقينا فترة طويلة هناك...ورجعنا للفندق سيرا على الاقدام وجنا بالكوة نشيل رجلنا من الكاع لان تسلق الشلال يتعب كلش وبعدها مشي مسافة طويلة
واحلى شي انو احنة بنص الليل نتمشى بالشارع والدنيا امان والجو كلش حلو
واخذنا صور وتونسنا
وثاني يوم تحضرنا حتى نرجع لبغداد
وجنا كلنا ضايجين لان راح نرجع وخلصت السفرة
وبقت علاقتنا وية الكروب وحاليا عاصم على طول نحجي وياه بالجات وهو هم بمنطقتنا ويسوي النا مس كولات لو يدزلنا مسجات
ايام حلوة جانت...ما تجي مثلها...بس ان شاء الله تجي ايام احلى منها
والظلعة الثانية الي بالعطلة جانت حفلة نوني...الحنة مالتها ورحت اني وايفا للحنة وتونسنا كلش
ومرة رحت لبيت سوسو ومرة لبيت وسونة ولبيت لولو ولبيت جدي...وبس.....
هاي مختصر العطلة وذكرى سفرة الشمال
والجايات ان شاء الله اكثر من الرايحات
تحياتي
ميشو

2 comments:

A. Damluji said...

hey friend, came here via Iraq Blog Count.

salam to everyone.

Anonymous said...

هاي ميشو الصراحه عجبتني مدونتج كلش وقريت هذه الذكريات رجعتني لايام العراق ... اتمنى يارب في يوم ترجع هذه الايام ويارب احلى كل التوفيق

fairooza