ما اعرف بأي طريقة ابدأ كلامي,اني اليوم كلش ضايجة...الجو مغيم ومطر ورطوبة..رحت الصبح للكلية وجنت متفقة وية ايفا نداوم سوة
وصلت للكلية الساعة بالثمانية ونص..الطريق جان ازدحام وابو الخط اليوم اختار طريق مختلف لان اكثرية الطرق مسدودة بسبب المجاري والمطر....اول وتالي...اي نطريق ناخذه راح يوصلنا للكلية بطريقة او بأخرى...وكل الطرق تؤدي الى روما!
وصلت للكلية وشفت ايفا كاعدة بالنادي وية كروب الانكليزي...نور وطيبة ورنا وزينة ومهند وعلي..سلمت عليهم وطلعنا اني وايفا من النادي ورحنا للقسم حتى نشوف شكوماكو ومنو مداوم ومنو ما مداوم....الجو جان كلش كئيب...مع العلم اني احب المطر والغيم بس جنت حاسة انو اليوم راح يصير شي يزعجني...ايفا فاجأتني وكالت اليوم لازم تطلع وية كروب الخط ووقت طلعتهم الساعة عشرة!!!! هنا اني انصدمت...اذا هي تطلع وية الكروب لعد اني ويامن ابقى؟؟؟؟
ابقى وية سرى وصديقتها ....صح احب سرى بس ما اكدر ابقى وياها مدة طويلة...ما استحمل سوالفها ومواضيعها الخرافية هي وصديقتها ..عدا انو صديقتها تحجي وتضحك بصوت عالي...
لو ابقى وية زينة؟؟؟الي هي اليوم مداومة علمود جماعتهااااااااااااا!!!!!
لوعلي...........نور او طيبة او علا...المشكلة انو حتى لو اروح وياهم راح احس بنفسي ثقيلة وهذا الاحساس جدا مزعج..وهمة صح يكولولي تعالي ويانه ولا تبقين وحدج وانتي صديقتنا بس هذا الاحساس يبقى طاغي وما اكدر افرض نفسي
شلون وية صديقاتي الي مدة يقبلون يداومون؟؟؟؟؟
مدا اعرف شبيهم...وكل شخص يشوفني مداومة وكروبي ماكو يكول هاي شبيكم السنة اشو متغيرين.؟؟؟؟
المهم...طلعت ايفا من الكلية واني رحت على كروب الانكليزي..كلت بلكي الكاهم حتى لو افرض نفسي بس هم ميخالف...واني ما شايفة منهم اي تلميح انو اني مثقلة عليهم فحاولت اتخلص من هاي الفكرة واروح يمهم....وصلت للقسم وما لكيت بيه ولا بنية...بس علي ومجموعة شباب....سالت علي عالبنات وما عرف همة وين....كتله اوكي ما عندي خير اختيار اذا ما لكيتهم ..واروح يم سرى
كال لا لا لا لاتروحين يم سرى ميصير!!!!لان يعرف اني ما استحمل مواضيعها....ولو هي البنية كلش محترمة نفسها وقلبها طيب وكلش تحبني وتحترمني....واعرفها من ايام الاعدادية وجنا ناخذ محاظرات خصوصية ببيتهم واتذكر ونستنا وضحكنا على استاذ العربي
او اتذكر محاظرات ست اشواق مدرسة الانكليزي....احلى محاظرات جانت...
المهم...رحت على سرى بالنادي وكعدت وية صديقتها وزميلهم(او شخص مميز بالنسبة لصديقتها)ما ادري ليش من شفته ما ارتاحيتله ولا حبيت انطي مجال حتى يصير كلام بيني وبينه...وحاولت اشغل نفسي بأي موضوع وية سرى بس علمود ما احجي وياه....وبما انو اني ضيفة عليهم واول مرة نكعد سوة وية الزميل..فراد يعزمنا!!!!!!!جانت العزيمة كلش مو بوكتها لان اني بالكوة مستحملة روحي ومالي واهس لا احجي ولا اجامل....ولا جان بيه حيل حتى اتنفس!!!!....المهم...قبلنا العزومة وعدت على خير بس بالمجاملات والحمدلله...ووراها راح الولد وبقيت وية البنات....................................يا ربي هاي شنو البنات...صدك الطيور على اشكالها تقع....كلمن راهم ولايك وية الي يمشي وياه...مستحيل نلكة اصدقاء مختلفين ..مثل الاختلاف الموجود بيني وبين سرى
اختلاف جذري من ناحية التفكير والتصرفات......جان المفروض بسرى تبقى بعد كم سنة بالاعدادية...لان سوالفها قديمة وتصرفاتها ومواضيعها جانت معقولة بأيام الاعدادية....مو بأيام الجامعة
وبعدين ضجت ...احتصرت...حسيت بنفسي راح انفجر...كلت للبنات اني رايحة بشغلة شوية وارجعلكم!!!!!!!!!!!!!!!اني اصلا مجان اكو مكان ببالي اريد اروحله ولا اريد اروح لاي مكان...طلعت من النادي ورحت لرئاسة القسم...بعدها رحت لقسم الانكليزي..وماكو احد هناك....ورجعت على قسم الفرنسي وهم ماكو احد...كلت احسن شي اخذلي فرة بالكلية لوحدي بلكي اصادف فد شخصية من الشخصيات الي اعرفها واكضي شوية وكت...
الكلية كئيبة وعدد الطلاب قليل...مشيت..مشيت..مشيت...ولكيت رنا....اويلي ربي ليش رنا؟؟؟اني منا ما طايقة نفسي وتطلعلي رنا وتريد تتمشى وتسولف وتشكيلي وتكول اني ضايجة وكئيبة وما اعرف شنو!!!هو اني ما طايقة نفسي تجيني رنا تشكيلي؟؟؟؟
اعذروني كلكم...صحيح انتوا صديقاتي بس الانسان هم تجيله اوقات ما يكون بيها مرتاح...هذا السبب الي خلاني ما استحملكم اليوم ولا جان عاجبني احجي بأي موضوع....لهذا جنت مستمعة الكم وبدون اي اهتمام
قضيت وقت قليل وية رنا وبعدها شفت علا وحسن...رحت وياهم للاعلام...علا ما تكدر ما تاكل والا تشتري باليوم 2 همبركر...واني اكلت جبس..وحسن نسكافيه....هاي اول مرة اكعد بنادي الاعلام...ما يعجبنا نكعد بالنادي اني وكروبي لان هوسة ومكان صغير وصوت الاغاني كلش عالي بحيث ما نكدر نسمع كلامنا اذا حجينا
ظلينا تقريبا ساعة بالنادي...بعدها اجة علي...كعد يمنة...صارت وحدة وربع وطلعنا سوة للبيت..
رجعت للبيت ضايجة...يعني ليش دائما البنات هيجي يسوون بيه ويخلوني بهذا الموقف...صارت اكثر من مرة بيه...ودا اكول ميخالف لا تزعلين عليهم....ومن اقرر ازعل ..تطلع الي مزعلتني ايفان....وايفان مو مال واحد يزعل منها......بس يلة قابل اني ما يحقلي ازعل عليهم؟؟؟؟؟
No comments:
Post a Comment