وضعية تعبانة جدا

اليوم مثل باقي كل الايام الي نعيشها..كلشي بحياتنا يتكرر دائما..الاحداث نفسها والكلام نفسه والوجوه الي نشوفها والشوارع والاصوات والاغاني..والبرامج الي بالتلفزيون والاكل الي ناكلة والملابس الي نلبسها...كله نفس الشي ويتكرر دائما...كلنا ماشين بهاي الدنيا وبأتجاه واحد...لا نكدر نغير مسارنا ولا نكدر نوقف الزمن ولا حتى نعرف ليوين راح نوصل...ولا نعرف شوكت راح نتوقف.
الى متى يبقى الوضع بهاي الحالة؟؟
الى متى يبقى الوضع الامني متدهور؟؟
الى متى تبقى السياسة هي المحور الرئيسي النا؟؟
الى متى تبقى الكهرباء شيء نادر ومحد يكدر يحل مشكلتها؟؟
الى متى تبقى الاحزاب مسيطرة على الجامعات وتسوي احتفالات دينية من الخطأ ان تقام بالحرم الجامعي؟؟
الى متى نبقى محبوسين بالبيت وما نكدر نطلع ونختلط بالناس؟؟
ويظل الخوف بينا كلما نتعرف على اي شخص ونفكر احتمال يكون هذا الشخص عنده ميول سياسية
او يعمل لحساب واحد من الاحزاب المالية البلد او نخاف لا تكون وراه عصابة ويمارس عمله علينه؟؟
الى متى راح يكون البيت هو المنفذ الوحيد الامن ؟؟وما نكدر نكون خارج البيت لان ما تعرف اذا طلعت من بيتك راح ترجع او لا؟
الى متى راح ننام على صوت انفجارات واطلاقات نارية ونعكد على نفس اصواتها ؟؟
الى متى كل ما اطلع من البيت اشوف السيارات ماخذه سرة عالخط السريع وينتظرون دورهم حتى يحصلون على بنزين...واحنة بلد نفطي وغني بموارد النفط...؟؟؟؟
الى متى ابقى اسمع ان الفلان الفلاني انقتل؟؟
الى متى اظل خايفة انو اهلي اذا طلعوا من البيت احتمال ما يرجعون؟؟
حياتنا صارت كلها خوف بخوف وهواية ناس دة ينقتلون وما تعرف شنو ذنبهم؟؟
ونبقى نفكر انو احتمال يجري الدور على احد الاقارب او الاصدقاء؟؟
مستحيل اكدر انسى الصدمة الي صارتلي من عرفت بموت طالب ويانة بالكلية...اني ما اعرفه ولا عندي اي صلة بيه..بس بحكم انو بنفس الكلية جانت عندي فكرة معينة عنه وخاصة اكو بيننا اصدقاء مشتركين فيصير كلام وعرفت شنو هذا الشخص....شاب راقي جدا واخلاقه عالية وقلبه طيب وصديق الكل...اجتماعي ومحبوب...والي يشوفه ما يصدك انو هو يتمتع بهاي الصفات لان كان ضخم جدا...
ما اتذكر اليوم الي سمعت بيه الخبر بس كانت ببداية السنة على ما اعتقد بشهرالثالث او الرابع من سنة 2005 رحت للكلية وكانت الاجواء طبيعية جدا..شفت ليونا صديقتي وكالت ميمي ما عرفتي منو الي مات؟؟ اني كتلها يا ستار خير منو؟؟ كالتلي اكرم؟؟....اني ما صدكتها لان متعودة عليها دائما تسوي بيه مواقف معينة ووجنت اصدك بكلامها وبعدين تطلع وحدة من الاعيبها....فتعودت ان ما اصدك بكلامها الي من هيجي نوع
اني اصريت انو كلامها مجرد مزحة مو اكثر....بس بعدين هي اكدتلي انو الخبر صحيح...وحتى من رحت على قسم الانكليزي...شفت اصدقاءه او كروبه كلهم يبجون ومصدومين ما مصدكين الخبر.....وهذا كله واني بعدني ما مستوعبة....شفت البنات يبجون واصدقاءه مصدومين ......راح اكرم ويا ريت لو كان السبب طبيعي....بس انقتل.....الى رحمة الله.....كلما اتذكر انو شاب محترم ومثقف يجي واحد مجرد يريد ينتقم او مريض نفسيا ويقتله؟؟؟؟ وين صايرة هاي؟؟ الناس كاموا يحلون مشاكلهم بالقتل والمشكلة انو مدا يروح بس الزينين..........انَا لله وانَا اليه راجعون.
ادعي من ربي انو ما يصير الي صار بأكرم على الي اعرفهم....وعلى اي شخص اخر...