Sunday, March 05, 2006

5\3\2006 sunday

ليه..اسمع كلام واحلم معاه واتشد ليه
فجأة الغرام يطلع كلام عشمني بيه
ومين عارف اكيد قابل غرام تاني
وايه تاني هواه مخبيه ..؟؟
ليه..برضى بعذاب قلبي الي ذاب من عشقي ليه
ايام جميلة فعمرنا وهانت عليه
حرام ينسى الي كان بيننا وينساني
وانا بس الي افكر فيه
بدأ يومي على صوت اليسا وهاي الاغنية بالاخص....سمعت صوت السيارة وطلعت من البيت..صعدت بالسيارة...وسلمت على ابو الخط..ورحنا على باقي البنات...وبالطريق كنت اسمع هاي الكلمات وافكر.....(اني من محبي اغاني اليسا)...عدة امور تشغل بالي...كنت اتسائل بيني وبين نفسي...اني ليش ما نمت البارحة بسهولة...ظليت تقريبا ساعة بس احاول انام...لكن المحاولات كلها فشلت...المهم...حاولت اتجاوز هذا السؤال وما الكة الاجابة عليه..طول الوقت اباوع على الشارع..وعلى الناس الي متوجهين لشغلهم او لجامعاتهم...شوية تفائلت ..اكو مظهر من مظاهر الحياة اليوم...لكن اكو خوف متملكني...فكرت بصديقاتي الي جامعتهم بعيدة عن بيوتهم..وشلون راح يوصلون ...لو شلون راح نرجع للبيت..او الوكت بالكلية شلون راح نقضيه ؟؟ اكو طلاب؟؟ اكو محاظرات؟؟
وصلنا لمنطقة باب المعظم ببغداد...وهي المنطقة الي بيها جامعة بغداد...هذا الشارع كل يومية بأيام الدوام يكون مزدحم بالطلاب او الناس العاديين...لكن تفاجأت اليوم من شفت الشارع فارغ...فارغ...فارغ ..الا من كم سيارة وكم طالب على عدد الاصابع....المهم..توكلنا على الله ودخلنا للجامعة وتوجهنا على كلية اللغات..كان الحديث الي يدور بيني وبين البنات عن الوضع ..والضوجة..والامن..والامتحانات..وعن مستقبلنا بهاي الظروف......
بعدها وصلت لنادي الكلية ..وشفت صديقتي علياء..سلمت عليها وعلى مجموعة بنات وظلينا بالنادي...موضوع..يجر موضوع...والكلام ما يخلص..نقاشات على ضحك على فضفضة...على شكوى...حسيت الدنيا بدت تسود بعيني...ووبعدها بشوية وصلت صديقتي نور...سلام وكلام ...ونقاشات على وضعنا اكيد وعلى مواضيع خاصة....وما اشوف نفسي الا تكأبت على الواهس....بعدين قررنا نغير المود..وشوية نفرفرش...رحنا على كلية الاعلام..نشتري اكل....وبعدها رجعنا للكلية...طبعا الطريق ما يخله من الضحك والكلام والتحشيش......(وكت الجد جد..ووكت الهزار هزار)
وصلنا لمكان معين بالكلية..وكعدنا ناكل ونسولف.....واجونا بنات وشفنا طلاب شعبتنا وسلمنا عليهم...بعدها شفت(لايون كنك) هم سلام وكلام.....ونقاش...غيرنا جو شوية...واكيد كلامنا لازم بيه شي يتعلق على وضعنا الي احنة بيه...يعني محد يكدر يتجاوز هاي المواضيع حتى لو احنة نريد نشوف اصدقائنا ونغير جو وننسه الي احنة بيه..
عدة الوكت بسرعة وما حسينا عليه...قضيت وقت قليل وية سرى قبل لا نطلع من الكلية...وصارالوقت المحدد وطلعنا..وتوجهنا على البيت..
واكيد بالطريق سمعنا اليسا....مرات الانسان يستغرب على نفسه..شلون مشاعره تتغير تجاه شي معين بصورة مفاجئة وغريبة...يعني اغاني اليسا ما كنت اكدر اسمعها وما احبها...لكن صارلي سنة اسمعها وبنجاح ساحق جدا..ومتابعة لآحدث اغانيها....
يا ربي اني خرجت عن الموضوع....نرجع لموضوعنا الرئيسي...اليوم الصبح كان الجو رائع...لكن بوقت الظهر الحر صار موطبيعي...فكرت...هاي شلون راح نداوم بشهر الخامس والسادس..واحتمال الامتحانات بالسادس او بالسابع...؟؟؟ يعني بأكثر الشهور حرارة في العراق.....واني كنت مقررة اقضي هاي الفترة بسوريا حتى نخلص من الحر شوية ومن تعب الصيف...لكن الظاهر المشاريع بالعطلة الجاية راح تتغير تغيير تام.
وصلت للبيت واني منهكة من الجوع..وفرحانة لان غيرنا جو وتركنا البيت شوية ولان وصلنا سلامات والحمدلله والشكر على كلشي..
تغديت واكيد شفت الايميل لمدة 10 دقائق فقط...شربت جاي...وبعدين انطلقت على غرفتي و..(هيــــــــــا الى النوم)...
نمت وارتاحيت ...وكعدت بالستة......ومر الوقت ما بيت الصلاة وسوالف وية اهلي......واضاعة ساعة كاملة حتى اشوف ستار اكادمي...شكد متونسين...وبعدها عالنت.......
وباجر النا يوم جديد وانطلاقة جديدة وان شاء الله الاحداث تهدأ والامور تهدأ وترجع المياه الى مجاريها....
وان شاء الله الله يسهلها علينا ويوفقنا جميعا....وتعدي هاي السنة على خير...........
ودمتم للاصدقاء

4 comments:

sarah said...

مرحبا ميشو
اليوم كلامك حلو احسن من قبل لأن فيه تفاؤل وضحك وحياة خليك دائما كذا
Sarah

Morbid Smile said...

This is an evidence that I have read your latest posts! LOL !! See, I'm even commenting ;)

I'm working on your site meter now..

And, Hi to everyone!

nada said...

مرحبا
انا أول مرة ادخل البوست هذا وتعاطفت معك كثير بسبب الظروف اللي تعايشونها في العراق بس حلو اني المح تفاؤل رغم اليأس.....واليسا كل اغانيها حلوة,,
الى اللقاء
nada

Konfused Kid said...

بلوكج (your blog) از
شكاكي...

بس ترى اليسا بصراحة بس صورة, او بالاحرى بس دعاية مال عمليات تجميل...لان اذا تسمعيهه لواحد مشايفهه (اذا لكيتيه) راح يكلج هاي مرة عجيزة حنفيشة كاضيتهه بشد الوجه و صبغ الشعر...
بس ما عدا هذا كلش فيكة خاصة لانه لغتة عراقية اصيلة....
شكرا...