Thursday, March 02, 2006

مجرد كلام


واخيرا راح تخلص العطلة التعبانة جدا..كلشي ما شفنا بالعطلة بس حركة الاعصاب والقهر..ما نعرف نضوج على الوضع الي احنة بيه وعلى الي يصير بالعراق لو على حياتنا الي انقلبت رأسا على عقب..لو نضوج من كعدة البيت ووقت الفراغ الي ما نعرف شنو نسوي بيه...لو على الكهرباء؟؟ الله على الكهرباء....ما تنطفي الكهرباء الا بالاوقات الحرجة...وهي اصلا ماكو كهرباء وما تجي الا ساعتين باليوم كله..يعني خلال 24 ساعة ماكو كهرباء بس لمدة ساعتين....شنو هالتطور والنعيم الي احنة عايشين بيه؟؟ يا ربي ليش هيجي ليش؟؟..والله تعبنا..والله ما اعرف على شنو احجي..ترة صارلنا 3 سنين شفنا الهوايل والمصايب الي ما تخطر على بال اي شخص لا والمشكلة محد يحس بينه ..والعالم كله عايشين ومتهنين بس احنة الشعب المنكوب دائما..اوف اوف اوف
بلة هاي صايرة؟؟ اكعد الستة الصبح على صوت قصف مبين من طيارة امريكية..ما كمنا نعرف منو السبب..الامريكان لو المسؤولين السياسيين الله يسلمهم..لو الشيعة لو السنة....؟؟ محد يعرف منو السبب..بس كل الي نعرفه انو احنة تعبنا.
يعني اني هسة دا افكر..شلون راح اداوم واروح للكلية بهذا الوضع؟ والله اخاف اروح..كضينا طول عمرنا خايفين.مستقبلنا ضاع..وكل يومية يموت بداخلنا شي حلو...فقدنا الامل بكل شي..صرنا حقل تجارب الهم..كلمن يجي يجرب حكمه علينا وتصير ازمات ويموتون ناس ابرياء..والخراب يزيد يوم بعد يوموالضحية احنة.
لا وهذا كله واحنة مقتنعين....راضين بأي شي..يا الله والله ما رايدين شي بس خلي نطلع منها سلامات..وتعدي على خير

5 comments:

sarah said...

مرحبا ميشو
يالله شنو ضاق خلقي يوم قرات كلامج وهذا ما يعني اني مو عارفة عن الوضع البائس عندكم لكن احنا ما نسمع عن معاناتكم بالتفصيل وما نعرف عنكم شي غير اللي يطلعونة بالتلفزيون فعلا موضوع الحرب هذا مصيبة بحد ذاته اللع يصبركم ويسلم كل عراقي ولا عاد نسمع عن موت او قتل او اي انفجار وحتى الكهربا يا ميشو انا اتذكر من ثلاث سنين انقطعت الكهرباء في المنطقة عندنا لمدة ساعة واحدة بس ياللـــــــــــــه الساعة هذي كأنها سنة توقفت الحياة لا نور لا تلفزيون لا ماء بارد ولا كمبيوتر يعني لما اتخيل ان اربع وعشرين ساعة ماكو كهرباء والله معاناة قوية ليش كذا من جد الله يعينكم ويفرجها يا رب وتنتهي المهزلة الحربية الله انتو تعايشونها بس انا معجبة فيك ياميشو لما اقرا كلماتك السابقة وادرك الثقافة العالية اللي تملكينها والتفاؤل والكلام الحلو بالرغم من وضع الحرب عندكم انت انسانة قوية ورائعة واماك حياة حلوة واهلك محظوظين فيك يا ميشو...

Sarah

Michomeme said...

مرحبا سارة...
اني اشكرك على تعليقك الجميل وتعاطفك ويانة على الوضع وعلى الحرب وكل حياتنا وما يدور بيها..واشكر دعائك النا والله يسلم الجميع يا رب..
وكلامك الجميل بحقي .. كلك ذوق..

يا سارة ..لمدة 3 سنوات احنة مرت علينا ايام صعبة جدا..وعلى كل العراقيين...تحسين الشباب تعبان والامل بحياة افضل صار بعيد..
لكن يبقى ايماننا برب العالمين موجود
وندعي من الله ان تفرج في يوم ونعيش حياة طبيعية...حتى احنة ما طالبين تكون حياتنا كاملة..وانما تتوفر النا ابسط متطلبات العيش...مثل الكهرباء والامن..
بس لو تعرفين شنو احساس الشخص الفاقد للامن...يكفي يخلي الانسان عايش بدوامة وخوف...
ادعي من الله ان ما يمر اي شخص باللي نمر بيه حاليا...لكنه يبقى احساس صعب
ومهما نتناقش عن الموضوع صدقيني الكلام ما راح ينتهي..
حتى احنة الاصدقاء في العراق..نحاول نتجاور النقاشات الي تخص السياسة او الوضع الامني..لان بصراحة تعبنا..ونريد نعيش عمرنا كما هو ونتهنا بلحظات الدراسة والجامعة والعلاقات الاجتماعية والصداقات....
وان شاء الله الي بيه الخير الله يقدمه

شكرا مرة ثانية

aNarki-13 said...

hey there little devil :P

how are you now? hows the area where you at? bit calmer i hope?

take care now, salams to haneen and all..

cheers.

Michomeme said...

هاي اناركي...
شكرا على سؤالك..
الاوضاع يمنا او بأي مكان اخر بالعراق
هي نفس الشيء..مع بعض الاختلافات القليلة بين بعض المناطق...
والحمدلله والشكر على كلشي
الحياة بعدها مستمرة..

سلامك وصل

سي يو

aNarki-13 said...

:)

sorry bout the delay, but your paintings are OH-MY-GOD so good! u paint beyond your years.. really!