Wednesday, March 29, 2006

ايام وبنعيشها

الي يزعجني باللحظات الاولى الي اقرر بيها اكتب موضوع جديد، انه ما اعرف من وين ابدي ،المواضيع الي تشغل بالي عددها لا يوصف وبرأيي كلها مهمة ، على الاقل بالنسبة الي، من اول الي اريد اكتب عنه واللي متعبني ، وضعنا المزري جدا والبائس جدا الي عايشين بيه، والي لو وصفته ما انطي الصورة الصحيحة اله، ومشاهد القتل و الصور الدموية الي تعرضها الفضائيات اكبر دليل على سوء الوضع، ومسبب جيد يخلينا نعاني ، وبسبب الظروف الامنية الي وصلت الى اسوأ مراحلها بهذي الفترة، بدأت اسمع بابا وكلامه :" بنتي لا تروحين للكلية والله اخاف عليج ومتعرفين شنو يصير بيه لحد ما توصلين للبيت بسلامة، حاولي يكون الدوام بس بالايام الضرورية"..اني ما اكدر اعلق على كلامه بس بجملة وحدة:" تفائل بابا ان شاء الله ماكو شي".. اقول للبابا تفائل واني نفسي بديت افقد الاحساس بالتفائل، او على الاقل بهذي الفترة الغريبة الي دا امر بيها، هو احساس بالملل، بالانزعاج، بالخوف من المجهول، بالخوف على نفسي وعلى اهلي ومعارفي. هذا من جانب الاهل والاوضاع الامنية،اما باللي يخصني اكثر، احساس غريب وجديد عليه، وكأنما مضيعة شي ودا ادور عليه ومدا الكاه! مدا اكدر الكة تفسير لهذا الشعور المزعج، والاحساس الثاني، الانتظار لشيء مجهول يخص المستقبل او يخص الوضع العام او يخص حياتي...هي الدنيا كلها مخربطة ومقلوبة ومحترقة ومدا اعرف شنو السبب. اصلا اني ليش دا اكتب كل هذا الكلام الي يزيد الملل عندي..؟؟

4 comments:

...دنيتي said...

قلبي معك
انا انجي من مصر وأحب افكرك بحاجات مهمة بفتكرها كل ما اتعب
قال تعالى
لقد خلقنا الأنسان في كبد
كما قال تعالى في حديث قدسي
انا عند ظن عبدي بي ان خيرا فخير وان شرا فشر
وان شاء الله ربنا يزيح الغمّة
وان بعد العسر بسر

sarah said...

ميشو
والله مو عارفة شنو اقولج
انا ادري لو اقولج تفائلي وانسي الوضع ما يساعد
لكن حاولي انك تسعدين نفسك بابسط الامور وتنسين الكآبة هذي
الله يعينج ويشرح صدرج

Michomeme said...

شكرا دنيتي..على كلامك...برغم كل الصعوبة الي نلاقيها بحياتنا..لكن ايماننا بالله وتوكلنا عليه هو الي يساعدنا انو نستمر..


سارة
شكرا لك وعلى تواصلك الدائم
وان شاء الله احاول ان اسعد نفسي بابسط الامور

LionKing said...
This comment has been removed by a blog administrator.