Saturday, May 06, 2006

طراطيش كلام

عاجبني اكتب موضوع وماكو شي محدد ببالي، حبيت اكتب عن الوضع العام الي دة نعيشه وتراجعت عن هاي الفكرة لان مليت منها وملينا من كلشي يذكرما بالوضع، واني اعرف حتى لو حجيت بالوضع ما راح اوصل لنتيجة ايجابية، احتمال كبير راح اوصل لنتيجة سلبية، تفكيري راح يكون سلبي واقربه منه الى التشائم الي راح يخليني اشوف الدنيا سودة وبدون الوان وهذا الشي مو حلو وما يساعد على التفائل ولا يساعد على ان اتقدم اي خطوة للامام، فموضوع العراق وما يدور في العراق ما راح اكتبه على الاقل بهذا البوست او البوستات في الايام القادمة، يعني مأجلته الى اشعار اخر وغير معلوم لحد الان، ولا اريد اكتب عن الصديقات او الاصدقاء بصورة عامة الي عرفناهم وعشنا وياهم فترة من عمرنا وصارت بيننا ذكريات حلوة ومواقف مشتركة ما نكدر ننساها تالي يضطر احدهم يسافر ويترك كلشي وراه والسبب هو الوضع اولا واخرا، ولا اريد اكتب عن الدراسة والاساليب التعجيزية الي دة يتبعوها الاساتذة ويانة بهاي الايام برغم كل الصعوبات النفسية والجسدية الي دة نعانيها كلنا من كهرباء وجو حار وحالة نفسية ما تساعدنا ان نقرأ بتركيز، وبرغم كل هذا احنة دة نحاول نقرأ وننجح، ودة نحاول نكون متفائلين ونستمر بحياتنا بأبسط واحلى صورة، ولا اريد احجي عن الازدحام الي دة نشوفه بطريق الروحة او الرجعة من والى الجامعة، ولا اريد احجي عن القلق الي يتملكني من اعرف انو بابا او ماما او حتى اختي او اني او صديق او قريب اواي شخص يهمني امره من يطلع من البيت يكون رايح على شغل او دراسة او اي مشوار، وشنو ممكن يصير بلحظة الي يكون خارج البيت، عبوة ناسفة او سيارة مفخخة او ارهابيين ومجموعات مسحلة ولا على التعيين، تقتل وتخرب وتعيث في ارض فسادا..وما اريد احجي عن الصيف ومعاناة فصل الصيف هنا لا كهرباء ولا تبريد ولا اي وسائل راحة لان كهرباء ماكو نهائيا...ومن صدك احجي اريد ابتعد عن كل هذي المواضيع قدر الامكان لان تعبنا بكل معنى الكلمة، تعبنا وهاي الكلمة ما توصف الحال الي احنة بيه، خليني اجمع شوية تفائل وحطة كدام عيني واركز عليه، احاول اتغاظه عن كل هاي الامور الي ما اريد ولا راح اريد احجي بيها ابد لان راح تشغل لي بالي وبدون اي نتيجة وبدون اي فائدة، وكل الي راح تسببه الي هو ارهاق نفسي، لا واني من نوع اتأثر واتعاطف وية اي موقف اشوفه كدامي...زين الحل شنو؟؟ والى متى؟؟ محد راح يعرف

4 comments:

karakib said...

hakteb comment besabab 7agtin awel 7aga ana from lebanon we 3aysha fe masr we barfa7 gidan lama ba2abel 2ay 7aga men balady:)
tany 7aga
sotek malyan 2alam fel post dah ya2ss we ta3ab .... nass ketir bet3any men mashakel we msh adrin itkalemo..

antika

karakib said...

el 3era2 aw lebnan kolo kwaiss :)
ana kanet wa7shan el lahga bass :)

antika

Michomeme said...

اكيد العراق او لبنان كله"كويس"اللهجة هي الي نشتاق الها دائما، لهذا اكتب بهلجتي العراقية اغلب البوستات،وحتى من اقرأ مدونات لبنانيين او مصريين، يكون الاحساس فيها قوي وواضح لان بلهجة غير متكلفة وعفوية

حالة طواريء said...

حسنا بما انكم اتبعتم اللهجة الدارجة فاليكم: انا يا ميشو بس بدي حيي فيكي هيدا التفاؤل رغم كل البلاوي المحيطة فيكن. ما شعرت انك عم تحكي عن شي ما بعرفو، يمكن انا مرقن بهيدي التجربة اللي منقول عنها اليوم تنذكر ما تنعاد، بس بدي قلك شغلة و يمكن تضحكي عليي او تستسخفيني: نحنا منقول انو ايام الحرب كانت من اجمل و اغنى التجارب اللي عشناها
بس بدي قول كمان ديري بالك ع حالك و ع اهلك و الله يحميكن من كل مكروه
قلبنا معكم