Sunday, June 18, 2006

ارهاصات..بأخر الليل...والكهرباء مطفية..


البيت هادئ والانارة خافتة، والساعة بالثنتين بالليل، الصوت الي دا اسمعه هو صوت مولد الكهرباء وصدى صوت ثاني يتردد على مسامعي من بعيد ..صوت اغنية سمعتها البارحة ولحد الان ببالي..
أسألي عني الليالي..شكد خطر طيفج ببالي..لو تشوف الناس حالي يبجي العاشكين
لا تطيلين السكوت..الزمن خوفي يفوت..السعادة ما تموت لو انتي تحجين
صرختي بليلي حزينة..هزت اسوار المدينة....وينج انتي يالحنينة يا نور العين
الربيع انتي والواني..رمشج الساحر ناداني..صوتي واحساسي وزماني...لا ..لا ترحلين
اقتربتي وكلتي همسة..
"قررت انساك هسة..انسى كل الي صار انساه..وابقى حزين"
للهوى سلمت روحي..يا زمن يشفي جروحي..عيشي سر.. بكل وضوحي..
يا حب السنين..انتي اغلى الناي عندي..جنة خضرة وحلم وردي
من زمن صدكيني ودي..يجمعنا الحنين
صدكيني بدمي انتي..بحلم ايامي وغربتي...والامل ظل بغرفتي ويسال انتي وين
كم مرة كلتيلي ارحل..قبل ما احجي واسال
بالعذاب والحيرة اقبل لو انتي ترضين
دوري يا دنيانة دوري..حطمي حلمي وشعوري..
الحزن اصبح سروري....يا قدر..ليوين؟؟ يا قدر ..ليوين؟؟
اكو احلى من هيجي كلمات ممكن ان اسمعها قبل لا انام؟؟ وما ادري شوكت راح انام لان مو نعسانة..عدا انو ما مصدكة انو الامتحانات بقالها يوم واحد، هو صحيح مبين من كلامي اني فرحانة بأنتهاء الامتحانات لكن الي اسبابي، ماكو واهس للقراية والطموح خاتل ورة الباب والهدف حاليا ضايع ومحد ديكدر يلكاه..فبالنتيجة ماكو دافع قوي للدراسة، طبعا هذا السبب الاول، اما السبب الثاني، الوضع واويلي على الوضع الامني الي هنا، الكوارث والانفجارات..الى اخره..وما اريد احجي عن هذي المواضيع لان تحطمنا نفسيا بسببها..
واني جنت اسمع الاغنية اجتي على بالي مكالمة البارحة وية بنت خالتي الي جانت خايفة بسبب روحتها للكلية، والاحداث الاخيرة الي صارت هناك...حالها حال كل المناطق بالعراق..حاولت احجي وياها واغير عليها الجو لان جانت واصلة مرحلة من التعب النفسي بسبب مشهد دموي شافته عالتلفزيون، كلام مني وكلام منها نسينا الواقع وبدينا نحجي بمواضيعنا الشبابية الطبيعية والبعيدة عن الهم والغم..استمرينا سوالف وسوالف الى ان سمعت صوت خالتي تكول"كافي روحوا اقروا والسوالف خلوها على العطلة"..شكرا الج شهودة على كلامج اليوم ..ان شاء الله نكون سوة ونبقى سوة والله يصبرنا على فراك حنونة!
مشهد ثاني اجة على بالي، مصارلي يمكن نص ساعة من كعدت من النوم، بعد عناء طول ونداء من ماما بأسمي حتى اكعد من النوم، بس من كعدت حسيت بنفسي جنت رايحة بسفرة طويلة ولمكان مختلف عن الواقع، لكنه مو خيالي، ورجعت من هذي السفرة مجبورة على الرجعة ومو بكامل ارادتي، وما لكيت نفسي الا واسال ماما " ماما، يصير نغلس؟؟" ..سؤال غريب ودخلت بالموضوع بدون اي مقدمات، مثل ما تعودت وتعودوا الي يعرفوني على هذي الطبيعية بيه، كالت ماما "ماماتي على شنو تريدين تغلسين؟؟ "..كتلها "والله يا حياتي اريد اغلس عالوضع!!"..طبعا الوضع الامني..اغلس على الاخبار واغلس على الحوادث واعتبرها امور طبيعية في حياتنا الغير طبيعية..تعبنا وملينا وماكو حل، نبقى نصبر ونتحمل بس لشوكت؟؟..هاي اني كلت ما اريد اكتب عالظروف بس هم كتبت..اوف يا ربي..شكد حلوة حياتنا تكون لو ما كل الصعوبات الي دة نواجهها..الحمدلله والشكر على كلشي.
شغلة ثانية، اكو هواية مواضيع احب احجي عنها لكن الكلام مرات يخونني..وعلى كولة الاغنية الفرنسية:
comme tout le monde j'ai mes defaux..
je n'ai pas toujours les mots qu'ils faut..
مثل العالم..فأنا لدي سلبياتي..لا املك دائما الكلمات كما يجب..
طبعا هي معناها بالفرنسي بدون ترجمة يكون احلى، فهذي الحالة، اقصد حالة الماكو كلمات بالوقت المناسب دا اواجهها بحيث كلام هواية ببالي اريد اوصله او اكتبه لكن ما يطلع بالصورة المطلوبة فأظطر ان اتفلسف شوية، ادري اليوم راح انوع بالكلام وامارس حقي الشرعي بالتغيير المفاجئ للمواضيع حتى لو كان البوست كله ما مترابط..
لحظة، تذكرت شغلتين، خابرت بنت خالتي وطلعلي "عوكي" عاشق"حسام الرسام" ..يعني هذا "عوكي" ذوقه خرافي بالاغاني، ومن نوع كل الاغاني الي يسمعها عبارة عن قصص حب فاشلة مع العلم عمره وتجربته بالحياة بعدهم بالبداية وما متجاوزة ال16 سنة، لكن لله في خلقه شؤون!
شغلة ثانية هم تذكرتها، اعرف نفسي مرات هواية احكم بسرعة على اشخاص حتى لو اعرفهم، من مجرد موقف بسيط او كلمة اسمعها او تصرف، ومرات يكون الحكم ايجابي ولصالح الشخص لكن مو بمحله الصحيح، فدائما الكه نفسي بحيرة معينه تجاه الموضوع الي يشغلني، يجوز هذا شي طبيعي ان ينتابنا هذا الشك الي يخلينا نحكم ،او نتسرع بالحكم، او يكون مجرد ضرب من الجنون الموجود بالعقل الباطن..اعتقد تفلسفت!!
المهم انو اكون واعية دائما لهذي الصفة الي عندي، اعرف نفسي ممكن ان اتسرع بأصدار حكم سلبي او ايجابي، بنفس الوقت الحكم ممكن يتغير بأزالة العامل الي خلاني اشك بالاشخاص او المواقف وساعدني على اصدار الحكم عليهم...وهذي وحدة من السلبيات الي اني اشوفها بنفسي.
قربت نهاية السنة الدراسية وما بقالها الا يوم واحد، من كعدت اليوم بلحظة سكوت او لحظة "صفنة" تجاه الكون! لاحظت شكد كبرنا، تغيرنا، تعلمنا اشياء حلوة، وشفنا اشياء مو حلوة، عشنا ايام صعبة، وصنعنا لنفسنا ايام حلوة، اتذكر بداية الدوام وبالذات اول يوم، على طول الطريق جنت اسمع اغاني فيروز...
تذكر اخر مرة شفتك سنتا
تذكر وقتا اخر كلمة قلتا
وما عدت شفتك وهلأ شفتك
كيفك انت ملا انت..
جان الجو حلو ورمضاني جدا، متشوقة اشوف البنات، علوشي وايفا ونوني، وباقي معارفنا بالكلية، كلشي مختلف وكلشي متغير ، وهذا التغيير خاص بيه اني، قرارات معينة اتخذتها وية نفسي خلت الدنيا كلها تتغير..برغم الحر يبقى يوم حلو، ورحت للكلية بطلتي الجديدة واللون البنفسجي الفاتح للشي الي جنت لابسته، والي ما لبسته مرة ثانية لان حسيت لشدة اناقته ما يناسب الظروف الراهنة.!!وموجود لحد الان بالكنتور ينادي وية باقي الملابس "المؤجل ارتداؤها الى اشعار اخر والى ظروف امنية افضل ونفسيات احسن" ..اعتقد هاي هم فلسفة..شفت البنات ..ورجعنا سوة نلتقي، وبدت المحاظرات، والدراسة والاحداث تجري، وكل هذا وية صديقاتي، تعرفنا على ناس وراحوا ناس، الي نتذكرهم والي نسيانهم، بس مستحيل ننسى اشخاص يتركون اثر ايجابي بداخلنا، ..واتذكر ايام الشتا والبرد، والمطر، والاجواء كلها...
ايفا، ان شاء الله نتشاوف عن قريب، مشتاقة لشوفتج وسوالفج وتعليقاتج، مرت هواية ايام وجنت اتمنى انو تكونين موجودة وياية، لكن الظروف كانت اقوى، وهسة انتي ويوني تلتقون وتسهرون سوا وتتذكرون ايامنا الخوالي!! ان شاء الله اشوفكم عن قريب، جدا جدا ويتجدد اللقاء مرة ثانية...
علوش، المكالمة الي بيننا اليوم جانت حلوة، ممكن اكون بداخلي شوية مقهورة منج بسبب تصرفات معينة تجاه اشخاص ومواقف معينة واللا مبالاة الي تتبعيها بأغلب الاوقات، لكن ادري بيها مو مقصودة وهذا مجرد جزء من شخصيتج، بس شسوي لدمج الخفيف والضحك الي يصير من نريد نحجي موضوع جدي وانتي تضحكيني، وتعرفيني اذا اضحك مو بسهولة راح اسكت خاصة اذا كان الج علاقة بالموضوع، هسة تذكرت واحد من ايام العطلة الصيفية الفاتت، جنا كل يومية لازم نتخابر ، الى ان اجة يوم ظلينا نضحك ولمدة نص ساعة، انتي تحاولين تسكتيني واني احاول اسكتج، فأضطرينا ان نسد التليفون حتى نعرف شوكت راح يتوقف الضحك...اي يا علوشي، تبقى الج غلاوة بقلبي حتى لو انتقدت تصرفاتج ببعض الاوقات، لان تعلمنا انو الصديق لازم يكون مراية لصديقه، يعكسله الصورة الحقيقية بأيجابياتها وسلبياتها، وهذا الشي كلنا متفقين عليه...وراح نحاول ان نتقبل الاخرين.
نوني، شنو ممكن اكتب عنج؟؟ بس انتي وردة، احس بيج مختلفة عنا، بس لو تبطلين الخوف والقلق بسبب الامتحانات اني ارتاح..
سراب ووسن ورولا...."والله مشتاقين يا قلبي للحب القديم" صارلي زمن ما شايفتكم، لو اريد اكتب شي الكم فمستحيل اكتفي، بس يكولون خير الكلام ما قل ودل....احبكم.
اعرف العطلة الجاية راح تكون مختلفة لعدة اسباب، الاول، الي يقرأ يعرفها، والسبب الثاني، الي يقرأ هم يعرفها، والسبب الثالث، هم الي يقرأ يعرف.......بس راح نشتاقلج حنوووون
عندي مجموعة مشاريع ابدي بيها بعد الامتحانات مباشرة، عدا التنظيف ، قررت اتعلم شوية طبخ، وممكن اتعلم سياقة، ومواضيع اخرى خاصة، بس يكون ما افقد هذي الطاقة من اول يوم من العطلة الخرافية!
اني حجيت هواية، وحسيت بالتعب، والكلام ما اعتقد لهنا يخلص، لان اكو بعد وبعد وبعد، وما اعرف الايام شنو راح تجيب وياها من مواضيع ومواقف..بس تأكد من شي مهم اليوم برغم قناعتي بيه، لكن تأكدت اكثر انو "ليس كل ما يلمع ذهبا"...

11 comments:

LionKing said...
This comment has been removed by a blog administrator.
attawie said...

اعتقد هذا من احلى ما كتبتي

جدأ عفوي و مليان معلومات
بالنسبة للاغنية الفرنسيه..كلش مبينه حلوه

ايام فيروز الصبح ما انساها و الى اليوم اني سمعت فيروز بالطريق للدوام..اغاني ترجع بينه للزمن البعيد و اغاني تنطينا امل و اغاني وطنية تبكينا

سوالف الصديقات و المواقف الحلوه و المرة متخلص و احلى ما بيها انه مهما نكبر تبقى ذكريات حلوه

مثل ما كلتي..اني هالفترة "مغلسه"عالوضع الامني و غيره

Michomeme said...

هاي اتاوي
شكرا على الكلام الحلو..تعلمنا من الافضل ان يكون الانسان على طبيعته ويتصرف بعفوية..لان كلشي يكون طبيعي وبدون تصنع احلى ويعكس شخصياتنا الحقيقية..الي نريد نوصلها للناس الي نعرفهم..

الاغنية الفرنسية عن جد حلوة وراح احاول ان ادزها الج على الايميل..لان اللحن والاحساس هم حلو مثل كلماتها..

اغاني فيروز تبقى سبب مهم يخلينا متمسكين بالامل وروح التفائل الي مرات نفقدها بسبب الوضع الامني وغيره..والاحلى اغانيها الوطنية الي مرات نحتاج ان نسمعها ..
وان شاء الله ما تنزل دموعنا بسببها وبسبب حزننا على الي يصير هنا وعلى الغربة الي دة نعيشها واحنة هنا او خارج العراق.

ذكرياتنا وية الناس الي نحبهم مستحيل نكدر ننساها، والاحلى من هذا انو تحسين بيها متجددة دائما..

"هاكونا ماتاتا..ارمي الماضي الي يغيض..هاكونا ماتاتا..اجمل شيء هو التغليس"

خلينا نعيش ونغلس على الوضع الامني احسن..

Little Penguin said...

يا أخي اللسان يعجز عن وصف المشاعر... مثل ما تفضلتي حضرتج و كلتي انه أحياناً نعجز عن وصف الحوادث او المشاعر.. المهم.. ما ريد أسترسل بالتفلسف.. ردت أنطي رأيي المتواضع عن هذا الموقع (ما أدري شيسمون البلوك بالعربي.. خاف أكول بلوك و هسه اللي يقره عبالة طابوكة) اي فالحقيقة انصدمت أول ما قريته و ان شاء الله متصير زحمة اذا شرحت أسباب الصدمة..اولاً ما جنت أعرف انه هالموقع بي خدمة عربية فكان غريباً بعض الشيء انه شفت هذه الصفحة (اي اهااا اهه.. هاي خوش.. صفحة) شسمه اي.. والله ذهني ديشرد.. ساعة بالثنيتين و ربع بس الحمد الله ماكو لا مولدة و لا أصداء و لا اي شي من هالقبيل.. المهم شجنت دا كول.. اي على ملاحظاتي..النقطة الثانية اللي شويونة أعمق و أهم هو كون حضرتج نوعاً ما جديدة علية.. يعني اني عمري كله شايف العراق لمدة أسابيع قلة.. و الباقي كله عايش برة.. فاختلاطي بالمجتمع العراقي محدود جداً... يعني اكو العراقيين اهنانا كومة.. بس كلهم فد نمط.. فد ذبة.. ما بيهم اي تنوع فكري او اي شي من هالقبيل.. خلي أكون صريح أكثر بعد.. عمري ما حاجي او سامع فتاة عراقية تحجي عدا اللهم هالجم بت عم و بت خال اللي عندي و مثل ما كلت فد نمط كلهن.. فاكتشافي لهذا المكان المبارك ان شاء الله و المليء بالأحاسيس المرهفة و العواطف الجياشة و المادري شنو... يعني اني معليه لا بالأحاسيس و لا بالعواطف.. هاي هيج مجاملات.. الي صدك حبيته بكلام حضرتج هو الصراحة الطاغية و التي ان كانت تدل على شيء فإنما تدل على الشخصية المميزة لصاحب الكلام و الكم الهائل من الاحترام و التقدير اللي تستحقيه.. هاي أكولهه بصراحة و بدون تلميع و بدون اي تفييك..

و أخيراً و ليس آخراً.. ان شاء الله الله يحفظ كل أهل العراق لا سيما البراعم الواعدة أمثال حضرتج و صديقاتج.. اللي تضحك و اللي تخاف و اللي متنجرع.. كلكم :)

أعتذر عن الاطالة و ان شاء الله ما أكون تعديت الحدود أو أسأت الكلام..

شكراً جزيلاً علي كل شي.. هواية فرحت بهالبلووووك..

أخوج الصغير..

بطريق

ملاحظة: كون تنتبهين للاملاء.. هواية تخربطين بالضاد و الظاء.. يعني كون تفرقين بين اخي الصاد و أخت الطاء.. و الا يرسبوج..

attawie said...

هسه اكيد عطلتي
تونسي

Michomeme said...

هاي اتاوي
العطلة بدت
خلصت امتحاناتي وراح اسوي احتلال على الانترنيت
وان شاء الله اكو ونسة
شكرا على تواصلج

باي

Michomeme said...

اهلا اخ بطريق
بداية...اشكرك على كلامك وتعليقك وابداء رأيك بمواضيعي

ثانيا..اسم البلوك بالعربي ..مدونة

ثالثا..بصراحة اسمك غريب....اشمعنه بطريق يعني؟؟

لو تبحث بعالم المدونات اكيد راح تلكى مدونات مكتوبة بالعربي...عراقي على لبناني على مصري...
وراح تكتشف مواضيع وشخصيات حلوة

ان شاء الله بالايام الجاية افرق بين الضاد والظاء...

LionKing said...

صعب ان ابدا بالحديث والتعليق عن هذا الموضوع .. لان التغييرات بالمواضيع سريعة جدا وحتى ماتخليني اكدر استقر على فكرة واعلق عليها او اتسائل بخصوصها لان بكل مااوصل لسطر الكي نفسي داخل بموضوع ثاني ماله علاقة باللي قبلة بس مربوط بشكل مايخليني احس اكو اختلاف بالمواضيع لان شكل هذا الموضوع يشبة دعاية لفلم سينمائي كل عشر او عشرين ثانية وتطلع لقطة ثانية تبين جزء من هذا الفلم .. فشلون راح اعلق ماادري !! بس راح اعلق واسال
اسالي عني الليالي اغنية حلوة كلش سمعناها واثرت بينا من احنا وصغار بس ماحسينا بكلاماتها الا من عشناها لان هية اغنية قديمة .. واتذكر نفسي جنت صغير من سامعها ..
مرور اطياف اشخاص اعزاء جدا هذا بحد ذاته شي حلو كلش وخاصة من يمر بسماع اغنية تثير أطياف الذكريات عدنا وتخلينا نسمع الاغنية الوطنية ونكول عليها هاي الاغنية مغنيها علية !!
الامتحانات عشناها يوم بعد يوم .. واحب ان اكلك على نتيجتها مبروك مقدما .. اما بالنسبة للطموح مهما ختل ورة باب او ورة حايط هوة راح نجيبة نجيبة .. قبل مااتخرج جانت عندي اهداف اتمنى ان احققها بس جانت صعبة بالتفكير بس مو بالتنفيذ .. شوية شوية وبدت الاماني تتحقق وبديت بشوط جديد ومرحلة جديدة من بعد الكلية.. فخرجت بنتيجة شخصية انه اللطموح مو بالضروري يكون تحقيقة من خلال الكلية والدراسة اللي احنا بيها لان غالبية اللي يحققون طموحاتهم يحققوها خارج نطاق دراستهم بس اكيد مو الكل لان هواية مثلا يشتغلون بمجال معين بس دراستهم مالها اي علاقة بهذا المجال بس اكيد اكو للدراسة جزء من يستغل بشكل او باخر .. اما بالنسبة للوضع اعتذر التعليق علية لان راح اتعلق اذا اعلق على الوضع !!
شنو المكان اللي جنتي رايحة اله ووين وشوكت نمتي وانتي جنتي تحجين عن احداث صايرة وانتي كاعدة بالليل ؟؟ وهل هذا المكان جان حلو الى هذي الدرجة اللي تمنيتي ان تغلسين على الوضع مثل مااني مغلس من يوم اللي عرفتك !!
التسرع بالحكم على المواقف او الاشخاص مااكلك عليها انه هي صفة زينة بس الزين بالموضوع من يحس بيها الشخص ومن يبدي يخلي الها حد من يتسرع باي حكم طبعا 99 % من المواضيع تفهم خطا بالمرة الاولى بس بالنقاش وتوضيحها اكيد راح نحس بال 1% اللي ينقذنا بالنهاية من خراب الموقف او التسرع بالحكم ...
دائما تكررين عبارتك بانه كبرنا ومشت الايام وصار اليوم ذكرى .. على كيفك على حسابك للايام والسنوات ترة بعدنا والله صغـــــــــــــار ..

مشاريع العطلة ان شاء الله ماتتوقف وان شاء الله تحققيها خطوة بخطوة .. وتتعلمين كل ماتحتاجين ان تتعلمي ةتضيفين للموسوعة اللي تملكيها من الافكار والتصرفات الحلوة .. فعلا حاس الك بان هاي العطلة مختلفة جدا من غير سبب الاشتياق لحنون .. ان شاء اله تكون عطلة مامسبوقة من العطل وان تلتقين بكل الاشخاص اللي همة يشتاقون الك ويفتقدوك بكل ثانية من ثواني حياتهم ... بنهاية البوست تبعك مافهمت شنو هذي العبارة وليش اجتي هنا ؟؟ ((بس تأكد من شي مهم اليوم برغم قناعتي بيه، لكن تأكدت اكثر انو "ليس كل ما يلمع ذهبا"...))
كيب رايتنك !! (هاي تحشيش)

Michomeme said...

ميرسي كتير كتير لايون كنك على كلامك الحلو...اول شي خليني اوضح ليش تأكدت انو"ليس كل ما يلمع ذهبا" ...تصورتك راح تفهم قصدي او تتذكر السبب الي خلاني اكول هذا المثل، يجوز اني حكمت بسرعة هم مثل باقي المواقف الي امر بيها، لكن اكولك السبب، اخر موقف واجهنا سوا من شخص اعرفه، وانتقدنا التصرف من قبله، برغم ان كلت هذا الشخص جنتل وشكله محترم....بس صدك لو كالوا لا تحكمون عالناس من شكلهم وظاهرهم وانما حكموا عليهم من تصرفاتهم وتعاملهم وية باقي الناس...
تشوفه يلمع مثل الذهب، بس احتمال من تتقرب اله تلكاه فالصوووووو

اعترف اكو تسرع بالحكم، بس جان الموضوع اله علاقة بالظاهر والحكم على البشر...فلا تاخذ الموضوع وتحدده بس على الموقف الي ذكرته، اخذه بصورة عامة حتى لا اكون تسرعت بحكمي عالشخص المقصود، وبنفس الوقت اخذه الموقف الي صار كمثال واحد على هواية امثله مشابهه وتنطبق عليها جملة ليش كل ما يلمع ذهبا...

اغنية تسالي عني الليالي شي حلو كلش وكلماتها احلى ولحنها والاحساس شي رائع
اني هم جنت صغيرة من سمعتها
:D
بس ما اعرف ليش من نكبر شوية ونسمع الاغاني القديمة يلة نحس بحلاوتها..ونلكة نفسنا نرجع الها ونسمعها دائما

شكرا على عدوتك الحلوة وان شاءالله النجاح للكل...واكيد نتيجة الامتحانات راح تعرفها...عدا انو راح احجي عن اليوم الي استلم بيه النتيجة عالبلوك تبعي واكتب اغنية عبد الحليم حافظ

وحياة قلبي وافراحوه
وهناه في مساه وصباحوه
ما لقيت فرحان في الدنيا زي الفرحان في نجاحوه....


بخصوص الطموح..تصدك اعتقد كل كلامي هذا ممكن يتغير بعد التخرج لان لحد الان اني بعدني بطريق محدد، النقطة الي اريد اوصل الها حاليا هي التخرج وان شاء الله بتفوق...
وبعدها اكدر احدد شنو ممكن اسوي
لكن هم مرات احس الطموح بعده خاتل..بس اني اكولك شوكت نجيبه من ورة الباب....ان شاء الله ورة التخرج..والله يسهل للجميع يا رب ويسهل الك وتحقق كل احلامك الي تريد تحققها...بكل سهولة ويسر..والله ما يضيع تعب احد...


اما المكان الي جنت رايحتله واني نايمة ..مجان حلم وانما نوم عميق جدا بحيث ما حسيت بنفسي ابدا...وجان عاجبني هذا الاحساس لان شوية بعيد عن الوقع تبعنا...وجانت نومة الظهر الي انامها ورة ما ارجع من الامتحان
..
اكوووول
خليناااااااااااااا مغلسين!!!

مفيش فايدة said...

مدونة جميلة بس محتاجة شوية تطورات شكلية بس علي مستوي المضمون رائعة ويا ريت تتفضلي تدخلي مدونتي وتقولي رايك فيها

www.alone-1.blogspot.com

Anonymous said...

www.alone-1.blogspot.com