Friday, July 07, 2006

كلمن رأية وشخصيته


لو نلف العالم كله، راح نلكه اختلافات، لكل دولة الها تقاليدها وطبعها ودينها واجوائها الخاصة بيها، ممكن بالدولة الوحدة نلكة اختلافات ثانية، حتى بنمط المعيشة، وبالسلوك، والبشر مختلفين، بالشكل، صح الله يخلق من الشبه اربعين وهذي الحالة معروفة جدا، واني من الناس الي وحدة مصرية شبهتني بأختها وما كدرت تمنع نفسها والا تحجي وياية، بحيث بقيت الوقت كله كاعدة كدامها طيلة تواجدنا سوة بمكان واحد، لان ذكرتها بأختها، نفس الصوت والكلام وطريقة الكلام ، فهذا الشي متعودين عليه، والبعض كالوا يخلق من الشبه خمسة وخمسين، والله اعلم، وممكن نلكه اختلافات بين البشر من ناحية التفكير، كلمن يفكر على هواه، ويتصرف على الي يحلى اله، ويحب بيكفه ويكره بكيفه، واله وجهة نظر خاصة بيه على كل الامور بحياتنا، وهذي الاختلافات نلكاها بين الاخوة حتى، وبين الاصدقاء، ولكيته بعالم المدونات، لكيت اشخاص مختلفين ومتنوعين بالكتابة وبأختيار المواضيع، وبأستخدام المفردات للتعبير، وبأختيار عناوين مدوناتهم، كل الاشخاص الي قرأت مدوناتهم ما تربطني بيهم اي صلة قرابة او صداقة، كلهم بغض النظر عن 3 اشخاص اعرفهم، اما من مصر او لبنان او الكويت او السعودية او حتى العراق نفسه، واغلب الي يكتبون من العراق هم من الموصل وما عرفت شنو السر بهذا الشي، لكيت بالاشخاص سواء من خارج العراق او داخلها بأستثناء الي تربطني بيهم معرفة شخصية، لكيت بيهم صفات ممكن اكول عليها غريبة، سلبية وايجابية، حلوة ، دينية، وناس ما تعرف شنو بيها.
مثلا، احد المدونات وداني طريقي الها بدون قصد، اول ما انتظرت الصفحة الرئيسية للمدونة تطلع على شاشة الكومبيوتر، تكأبت، حسيت انو ماكو شي مميز بهذي المدونة، قريت الموضوع الاول، والاول يتبعه الثاني، والثالث والرابع، الى ان اكتشفت شي ضايقني جدا وكلت لنفسي يكفي لهنا، وشكرت الله وحمدته مليون مرة على نعمة الايمان بي وبدينه..كانت صاحبة المدونة غير مؤمنة بالله والعياذ بالله..
الاكتشاف الثاني، احد الاشخاص اكدر اوصفه بجملة وحدة بس انه( لا يعلم ماذا يريد) يكتب بدون ما يبين هدف كتابته شنو، اقرأ كلامه وما افهم شي منه، ما اكدر اميز اذا كان كلامه فضفضة او شكوى او موضوع معين، او خراميش بزونة!! شنو الهدف من البلوك؟؟ ما عرفت، حاولت افهم صاحب المدونة لكن ما فهمت، تركت المدونة بدون ترك اي تعليق عليها، تخيلت صورة لهذا الشخص، انسان وحيد، مظلوم وقبيح، منبوذ وفاشل بحياته، ينتظر نهايته اما مقتول او ينتحر!!
شخصية ثالثة عايشه بالوهم، تبحث عن فارس احلامها الي راح يجيها على فرس ابيض وحامل بيده باقة ورد احمر تعبر عن حبه الها، يأخذها من عالم الغربة والضياع، الى عالم تحس بيه بالامان بوجودة وبنظرات عيونه الي تحرسها، وسماع صوته، وتتغنى بيه على مدونتها وتكتب اله القصائد وكلمات الحب، لكن برغم انتظارها اله عدها مخاوف من طول الانتظار، لان الثقة بنفسها معدومة وتخاف لا يفظل انسانة احلى منها عليها..

انسان اخر، فاته قطار العمر، كعد يكتب عن ايام الشباب الي ضاع، من دخلت المدونة تذكرت البيت الشعري الا ليت الشباب يعود يوما...فأخبره بما فعل المشيبلكه نفسه وحيد بهذي الدنيا، لا زوجة ولا اطفال، تساقطت ايام شبابه مثل اوراق الخريف، لكن اكو فرق بينهم، اوراق الخريف تتساقط بموسم الخريف وترجع على موسم الربيع وتتجدد، لكن ايامه تساقطت بدون رجعة .

ومدونة ثانية بناتية الى ابعد الحدود، عالم بنات في بنات، بيها نوع من التحيز بجانب البنات فقط، عجبتني الفكرة وكلت اكول لصديقاتي ان نسوي بلوك خاص بينا ونكتب عن مواقفنا سوة وذكرياتنا المشتركة، لكن اعرف الفكرة ما راح ننفذها، بسبب انشغالهم وعدم اهتمامهم بهيجي نوع من المواضيع او بالاحرى التدوين..فخليت الفكرة مسجونة داخل عقلي..

واختلافات اكثر واكثر بالشخصيات ، بس يجمعنا شي واحد، الاحساس، كلنا عدنا احساس واحد اذا فرحنا او حزننا او تضايقنا من شي، اذا حبينا او كرهنا، يبقى الاحساس واحد، وما يتغير ولا يصير بيه اختلاف بين الناس.
مثل الاختلافات الي نشوفها بيننا وبين الناس الي نعرفهم، ما اعتقد نصادف بحياتنا ناس يشبهونا وطبق الاصل يصيرون، ممكن نلكه بيننا صفات هواية مشتركة لكن لازك يكون حتى ولو اختلاف واحد بين الشخصيات، ومرات الاختلافات هم تكون شي حلو، لان لو كل العالم مشتابه مجان كدرنا نميز بين بعض ولا حسينا بفرق بيننا، جان كلشي صار عادي، ورتيب، بس الاختلافات الي بينا حلوة، تضيف فد صفة على عالمنا..وكل اختلاف بينا، يعتمد على التفكير والثقافة ونفسية الشخص نفسه، ةالمجتمع الي عايش بيه، والاحداث والمواقف الي يمر بيها وتأثيرها عليه، كل هذا يساعد بتكوين شخصية الانسان بشكل معين ..بحيث يكون متكيف وية مجتمعه وناسه وعاداته وتقاليده، لكن مو بالضرورة يكون مقبول بالنسبة لغير مجتمعات.
واكتب جملتي المعتادة..كلمن رأيه وشخصيته

10 comments:

LionKing said...

شنو هذا الابداع وشنو هذا الموضوع المميز جدا .. شنو هذا التغيير باسلوب طرح المواضيع والخروج عن المألوف موضوع جديد وحلو كلش والوصف جان بمستوى راقي جدا وتعليق روعة وتعليقات مضحكة .. ابدعتي بهذا الموضوع بشكل لا يصدق بالوصف اللي وصفتي انتي .. اني متاكد انه الموضوع غير مسبوق من اي احد ومحد متطرق الى هيج نوع بالمدونات وهذا احساسي الخاص لان اني مامطلع على مدونات ثانية .. بهذا البوست اللي كتبتي وكانما وصفتي شكل للعالم عن طريق المدونات وكانما انتي التقيتي بكل ذولة الناس وشفتي افكارهم وتعرفتي عليهم من خلال كتاباتهم وعرفتي ثقافتهم واحلامهم الخاصة .. اللي يتعامل بهذا الشكل وية الناس راح يكتسب خبرة حلوة كلش ويكون مطلع اكثر على حقيقة الناس وحتى راح يكتشف اشياء جديدة بنفسة حتى، لان راح اما يشكر الله على النعم اللي عايش بيها ويبدي يحس بان يمتدح نفسة بنفسة ومرات راح يحس انه يريد يوصل للي وصل اله الناس الثانيين او يكون بمستواهم .. اني هم الي لقاء وية الناس وبشرائح مختلفة عن طريق عملي الخاص والتقي وياهم بالصوت واعرف شلون ممكن ان يفكرون وشلون اللي بيهم يتصرفون ومن كل هذا اكدر اتعلم شلون اتجنب انواع معينة من الناس وشلون اتعامل واتفاهم واتواصل مع نوع معين من الناس ..بس بسماعي لكل الاصوات مااحب ان اتعامل بشكل نفسة مع الكل ولكن احب ان اتميز بالتعامل مع شخص واحد فقط دائما !!
وكلمن رأية وشخصيته
1st Comment !!

l said...

السلام عليكم ورحمة الله

صراحه الموضوع شدني واخذني يمين وشمال وردني فوق و تحت وانا مستسلم له
:)
بس احس انه اذا ما عجبك شي في مدونه احد حلو انك تقولين له.. مثل ما اذا عجبك شي اكيد راح تقولي وطبعا انا متاكد لان الشي الثاني حصل معايا
:)
وعلى قولك وكلمن رأية وشخصيته

يالله
في امان الله

layal said...

نفس اللي قلتيه كنت افكر اكتبه ببوست- بعض الاحيان امر علي مودنات استغرب تفكيرها
ممكن يكون هؤلاء الناس حولنا ؟؟
بغض النظر عن المواضيع التي يكتبونها
لكن كما قلتي اختي
لكل رأيه وشخصيته
تحياتي -الحلوه وصلت بالبريد الممتاز :-)

Michomeme said...

لايون كنك..
دائما يكون تعليقك متميز وحلو ، اسعدني ان اكون كاتبة موضوع جديد وما متكرر بغير مدونات..
ممكن يكون عالم المدونات صورة مصغرة عن عالمنا الحقيقي، نكلة بيه شخصيات مختلفة ومتنوعة..ممكن تعجبنا وممكن لا..وممكن نتعامل وياها بحياتنا ونعرف شلون نتصرف وياها واحتمال اكو شخصيات ما نكدر نتعامل وياها وكلها تعتمد على المباديء والافكار والشخصية وصفاتها.

بعض اصحاب المدونات حسيت بشخصياتهم اما مشابهه الي او تشبه لشخصيات اعرفها..مثل الاهل او الاصدقاء، واكو شخصيات ما ملتقية بمثلها بحياتي..

لكيت بعالم المدونات هواية صفات حلوة ، ومباديء وافكار ومواضيع رائعة ممكن ناخذ بيها ونطبقها بحياتنا، ولكيت صفات سلبية ما عجبتني وابتعدت عنها للمدونة.. واكتفيت بجملة كلمن رايه وشخصيته والمدونة شي خاص، وكل شخص يكتب افكاره الخاصة وتعكس شخصيته هو وبس.
من خلال عملك اكيد راح يكون الك راي خاص ومعلومات اكثر عن الشخصيات لان تتعامل وية الاشخاص مباشرة..مو مثل البلوك والكلام وتحلل شخصياتهم..
ممكن تظطر ببعض الاوقات ان تكون بمستوى تفكيرهم حتى تعرف شلون تتعامل وياهم..وباقي الاوقات تبقى على طبيعتك وتخليهم يصعدون لمستوى تفكيرك..

ومن خلال كل هذا نكدر نتعلم شلون نتصرف وية اي شخص حسب شخصيته..

المهم نحاول نكون ونبقى على طبيعتنا ونبين شخصيتنا الحقيقية للكل..والاهم للناس الي نريد نكون وياهم على طبيعتنا..

wow wow wow
1st comment!!

Michomeme said...

اهلا حمزة..
شكرا على تعليقك..
ممكن ان ابين اعجابي بمدونة اي شخص، او ابين اعتراضي او عدم اعجابي بشيء معين ..لكن راح يبقى هذا رايي الخاص فقط..
ما احب افرض رأيي على اي شخصي، والمدونة شي خاص..وكل واحد يكتب الي يعجبه لكن بينت رايي بالمدونات على موقعي الخاص حتى ما افرض شيء على احد..

وكلمن راية وشخصيته

Michomeme said...

هاي ليال
شكرا على حضورك الدائم..
ممكن اكون سبقتك بالموضوع
لكن حاولي تكتبيه اكيد حيكون شيء مختلف وبأسلوبك الخاص...

وعن جد اكو ناس حولنا عدهم افكار وعادات غريبة ممكن نتقبلها وممكن لا..

تعتمد على الشخصية..

وبالعافية عالحلوة
;))

تحياتي

mashi_97 said...

موضوع جميـل
وأعتقد بأن هذا الشيء المميز في التدويـن
أنك تشاهد النـاس على حقيقتهـا وبأفكارهـا ومايدور في داخلهـا
ولكن قد ننتقد بعض الشخصيات لصراحتهـا
ولكن مع ذلك لاننتقد مدونين آخريين يلمعون لذواتهم وكل مايعملونه صواب في صواب
ولكن يظل التدوين الحقيقي لليوميات هو التدويـن الذي يعبر عن أحاسيس ومشاعر كل انسان بكل صدق وصراحه
ومن كان في داخلـه الصفاء والنقاء سيظهر في المدونـة والعكس صحيح

Michomeme said...

ماشي صح

شكرا على تعليقك وحضورك
ااكيد المدونة تعكس شخصية الانسان واحاسيسه ومشاعرة خاصة لو كانت كتابة يوميات وافكار خاصة لصاحب المدونة ومن خلالها نكدر نوصل لصفاته ممكن تلاقي اعجابنا وممكن لا...
حسب الراي والشخصية

تحياتي

Unknown said...

السلام عليكم

فى عالم المدونات هناك العديد من الافكار والاطروحات التى قد لا تكون موجودة فى مجتمعاتنا
ولكن هى فائدة لنا وحتى لو كانت سيئة المحتوى لماذا ؟
السبب بكل بساطة لنعرف ما هى عقلية البشر
وعلى فكرة من قبل ستة شهور كنت ابحث عن معنى كلمة blog
وجدت معناها والمدونة هى قد تكون مثلما تفضلتى خربشة
وما هو العيب اذا كان هناك شخص يخرج افكاره
وصدقينى انا فى عالم المدونات منذ سنة تقريبا ولكن
اغلب الاشخاص ما يكتبونه هنا يكون قله منهم من يعكسون واقعهم
فهى كتابة وليس بالاستطاع اصلاح الكل
والمدونة فعلا يجب ان تكون مسؤولة من الشخص لانه كلام ينتشر بين الناس ويحاول ان يكون مسؤول
لكن صدقينى لفت نظرى تعليقك على شخص يائس
هل تعتقدين انه من السهل على شخص ان يكتب يأسه بيده ؟
على العموم تشرفت بزيارة مدونتك واتمنى ازالة اللون الاسود منها لانه لون تشاؤمى :)
واتشرف بزيارتك لمدونتى
فهى خليط
اجتماعى سياسى ادبى وحتى فكاهى
السلام عليكم

Michomeme said...

اهلا مشاري
مثل ما كتبت في تعليقك ان المدونات خليط من شخصيات مختلفة عن بعضها ممكن نلاقي الي يعجبنا وممكن لا...
وتعتمد على اراءنا وشخصياتنا وطبيعة تفكيرنا..

لا يوجد اي عيب اذا كانت مدونة شخص معين عبارة عن مجرد خربشات لا يفهمهما اي شخص، لان المدونة خاصة جدا وكل شخص حر في المواضيع الي يكتبها سواء كانت سياسية او دينية او علمية او فلسفية او مجرد احاسيس وافكار في بال الشخص تدور ويكتبها بالمدونة الخاصة بيه او مجرد سرد للاحداث اليومية..

بالعكس، فكرة المدونة جميلة جدا، احيانا نحب ان نعبر عن احاسيسنا وافكرانا لكن يكون التعبير عنها بالكتابة اسهل واعمق لو كان بالكلام..

علقت على شخص يائس، ليس استهزاءا به ، لكن مجرد وصف لعالم المدونات الي اكتشفته ..فكرة خاصة بيه، ذكرتها للوصف لا اكثر..حالات اليأس ممكن نمر بيها جميعا بين فترة او اخرى، وكل كلامي ال ذكرته وجهة نظر خاصة بيه، طرحتها بمدونتي الخاصة وحبيت اعرف اراء الناس، وما فرضت رأيي على الكل..

اللون الاسود ممكن يكون تشاؤمي، لكن الحمدلله انا متفائلة برغم السلبيات والصعوبات الي نوجهاا بحياتنا في العراق..اعتبريه مجرد لون ومساحة خاصة وصاحبة المدونة ترحب بيج بأي وقت وبكل اراءك واسعدني حضورك

واكون سعيدة بزيارتك الدائما وراح اطلع على مدونتك..

تحياتي