Saturday, July 22, 2006

خليك فاكرني....


شي غريب..اشو اخر موضوعين كتبتهم ما لكيت اي تعليق عليه، لا من قريب ولا من بعيد، اذا شخص واحد مشغول..نعذره..بس اشو حتى اختي ما كتبتلي تعليق..على العموم براحتكم، يكفيني كتبت افكاري وقريتوها...
ما ادري ليش فجأة ردت اسمع اغاني عمرو ذياب..شغلت مجموعة الاغاني الكاملة اله، ودا اسمعها هسة...
كان طيب كان حنيين
اتاريه كذاب كبير
مش زي ما كان مبين
دة خدعنا سنين كتير
حاليا هذي الاغنية....مرات احب اسمع بس اغاني عمرو ذياب، احس بيها شي مميز، اتذكر اول اغنية مفضلة لعمرو ذياب هي"كان عندك حق" واغنية "يا ملك قلبي في الهوى"
اكو اغاني تبقى بالبال ومستحيل ننسى الايام والذكريات الي ترافقها
مثلا اغنية ..كان عندك حق تدوب وترق وترجع تاني يا قلبي تدق
ندوب في هواه ونقول الاه...
تذكرني بأيام حلوة وية اهلي، جنا نكدر نطلع..براحتنا..الوكت جان مختلف,,طفولتي حلوة ...جان عندي كاسيت بي مجموعة اغاني عربية من ضمنها اغنية "كان عندك حق" واعنية"من تكون" لنبيل شعيل..هذي الاغنية صح قديمة ومر عليها زمن طويل بس روعة باللحن والكلام، واغنية اصالة نصري،"ما بحبش حد الا انت" صح اني مو كلش اسمع اغاني اصالة نصري بس هذي الاغنية غير كل الاغاني..هي واغنية..اغضب..اتهمتك..ما قلتليش....وبعد كم اغنية ما تجي على بالي..
حاليا دا اسمع اغنية..."بعد الليالي"..
فات قد اي ولا يوم قدرت انساك
وليه الدنيا ليه يا حبيبي بعيد وخداك
انا مش قادر على نسيانك حبيبي
مين في الدنيا حيملى مكانك حبيبي
والله بحبو وحفظل احبو حبيبي
مفسي ارتاح انا بين احظانك..حبيبي
هذي الاغنية، ذكرتي بوحدة من صديقاتي، جانت فترة صداقتي قصيرة بس حلوة، جانت تحب عمرو ذياب ، استمرت صداقتي بيها لمدة سنة ونص، بس بعدتنا الايام، لان الصداقة الجديدة الي كونتها وية غير بنات، ما عجبتها، برغم اني بقيت وياها وجنت احب ان تستمر صداقتي وياها بس بعدها ..مرت ايام الدراسة، تخرجنا، تزوجت صديقتي وسافرت لمصر حسب ما سامعت....قبل فترة دا ادور على شي معين بدفتر ذكرياتي، لكيت شي اني ناسيته تماما، حسيت وكأنما صفعة مفاجأ اجتني، لكيت بداخل الدفتر صورتين الي ولصديقتي..وحدة واحنة بالمدرسة وبملابس المدرسة"الزي المعهود" والصورة الثانية جانت بوحدة من السفرات المدرسية الى "برج صدام" بلايام الي جان هذا البرج موجود...جنا رابع اعدادي...اكتشتف اني ناسيه هذي الصورتين...بحيث بيومها من لكيت الصور بقيت اباوع عليها وتذكرت هواية سوالف وايام..خاصة ايام الدروس الخصوصية الي بالاعظمية، او التجمعات الي بالبيت، او سفرات المدرسة...
حيل..الايام شلون تعدي بسرعة...
وبعدني اسمع عمرو ذياب..
طبعا اني جيت عالنت وما اعرف شنو اسوي، حاليا ماكو احد على المسنجر، صديقاتي كلهم ما موجودات ولا لايون كنك، ولا حتى حسامو..او لولو..
شكد احب هذي الاغنية
قبل الوداع قرب هنا..قرب تعالا وضمني
خليك شوية بحظني حاول تفتكر
من كم سنة انت وانا
مع بعضنا وبتحبني خليك معايا بحظني حاول تفتكر
مين اللي قلك اني بعتك وانت ليه صدقتوا ليه....
واو...اغنية خليك فاكرني
يلي بجمالك وبعيونك دول أسرني
خليك فاكرني..وان حس قلبك يوم بقلبي
ابقى زورني..
اعتقد اني راح ابقى كاعدة الى باجر لان مدة يجيلي نوم،وعاجبتي الاجواء وية اغاني عمرو ذياب..
راح اترك الكتابة هنا واقرا بلوكات ثانية او اتصفح اي موقع عالنت

10 comments:

aNarki-13 said...

cheers..
been a while since i've been here.

hope you have a safe journey, really.

take care, friend.

sarah said...

مرحبا ميشو
سوري حبيبتي من فترة ماعلقت كنت شوي مشغولة
:(

شلونج وحشتيني
احس لما كنت تكتبين البوست كنتي في حالة حزن او حالة روقان
بس فضفضة حلوة فعلا حسيت اني وياج
الله يسعدج
والذكريات حلوة ياميشو
واغنية

:
خليك فاكرني..وان حس قلبك يوم بقلبي
ابقى زورني..
.
.
روعــة
اهديها لك
:))

Michomeme said...

hi ANARKI-13

how u doing friends?
long time no see ;)

nice to see u here

take care...




sarah
اهلا سارة، لا تهتمين، اذا على الانشغال فمعذورين جدا، بس البوست كان فضفضة وحالة روقان بنفس الوقت
جان حالة غريبة جدا واني اسمع الاغاني
ردت اغني وياه بصوت عالي بس ما كدرت
لان الدنيا ليل والوقت متاخر وما ردت اصحي النايمين
:D

شكرا على اهدائي الاغنية وتسلمين
اني اهديلج اغنية كان عندك حق
;)

تحياتي

MARSHAL Q8 said...

بالفعل مرات الواحد يحز بخاطره

ان يكتب ويكتب وما يلقى اي تفاعل

ببداياتي حسيت بهالحاله .. لمن شفت اول رد على احد بوستاتي استانست وايد :)

هذا اول مرور لي واتمنى ما يكون الاخير :)

LionKing said...

هل من الممكن ان يوصل احد بتعليق يصل الى العبارة اللي كالها هذا المغني وكال خليك فاكرني ... خليك فاكرني هية اغنية تمثل الي جو وصفتة الك مسبقا جو غروب وممطر بشكل رومانسي وسيارة تمشي بخط مستقيم وصوت موبايل يرن فاذا الواحد يشوف اسم ورقم الشخص اللي يحب يضغط على الزر الاخضر وبصوت رائع يسمع الكلمة نفسها خليك فاكرني ... وبعدها ابتسامة ضلت مرسومة الى نهاية الاغنية

tweety said...

مع اني ما احب عمرو دياب وايد بس اتفق وياج ان الاغاني تختزن داخلنا ذكريات وايد تتعلق بأشخاص او اماكن او مناسبات
مريت عل بلوقج ..مميز جدا ومواضيعج حلوة
وشوقني الجاي ويا الكليجة :)
تحياتي
راح احاول اتابعج دايما

Michomeme said...

مارشال
اهلا بحضورك لمدونتي،وتركك تعليق
كلنا نحب ان نعرف اراء الناس بأفكارنا
لكن الظاهر الانشغال منعهم...
معذورين
;))

****

لايون كنك
مرات من اقرا كتاباتك..او اكثر الاوقات من اقراها، احس عندك موهبة خاصة وقدرة على وصف الاشياء او الاشخاص بطريقة مميزة جدا
بحيث تخلي الي يسمع يعيش بعالم مثالي ومختلف ورائع بنفس الوقت
عدا هذا كله، تنطي للموصوف قيمته الحقيقية الي يستحقها

هذا الشي رائع جدا...
اعتقد الطريق المستقيم..وبي سيارة وبوقت متأخر وتمطر..والموبايل ..ويطلع اسم المتصل المطلوب..حيكون جو رومانسي ولا اروع...ترفع السماعة..تكول الو...والمتصل..يكولك...خليك فاكرني...
واااااااااااااااااااااااو
بس ما كتلي منو المتصل؟؟
;))

بعدها ما اتصور مجرد ابتسامة تنرسم الى اخر الاغنية، لكن احساس يبقى بالقلب، وبالعقل...ونتذكره كلما سمعنه الاغنية..وكلما مطرت الدنيا

خليك بالجو


*********
تويتي
اهلا بيج، وشرفتينا
الاغناني تبقى بالذاكرة..وتساعدنا ان نحتفظ بأكبر قدر ممكن من تفاصيل حياتنا لان راح تكون الاغاني مصاحبة النا اغلب الوقت...

واذاعلى الجاي والكليجة...
اني شوقني موضوع.."الطول" الي انطيت رايي بي...واكيد..راح اتواصل وية مدونتج كل ما سمح لي الوقت



تحياتي
ميشو

layal said...

بووه عمرو دياب له ذكريات معانا
هو وراغب علامه (ميل لي قمري وغنالوا)
بالنسبه للتعليقات
كنت حاسبه اني وحدي مشغوله طلع الكل مشغول صدقيني حتي تعليقاتي قليله وكتابتي -واعتقد كل المدونيين عايشيين بنفس الحاله
ان شاء ما ننشعل الا بالخير

24 Steps to Liberty said...

هاي اةل مرة اكتب تعليق على هذا الموقع.
ردت بس اكول انه فكرة الموقع بالعربي وباللهجة العراقية كلش حلوة.. اتمنى يبقى هذا الموقع على التميز الحلو

ترة سميرة سعيد عدهه اغاني خرافية.. آخر سي دي عدهه اكو اغنية رقم 13 اسمهه "ولسه حبي ليك باقي" اسمعيهه، رائعة

Michomeme said...

هلووووووو
ما توقعت الكة تعليق جديد
ان شاء الله من ارجع اسمع اغنية سميرة سعيد...وانطي رايي بيها

وان شاء الله تستمر التعليقات
وبالعربي
اقصد بالعراقي

سي يو