Sunday, August 13, 2006

لقاءات في عمان

بعيد عن العراق وبعيد عن بيتنا قررت اكتب بوست جديد عن سفرتي لعمان، هذي المرة الاولى الي اسافر بيها خارج العراق وان شاء الله مو الاخيرة، قضيت وقت كلش حلو وعشت ايام حلوة وية ماما واختي موربيد سمايل واتاوي وسنا وصديقتي علوش, وبرغم الونسة هنا والاجواء المختلفة تماما عن اجواء بغداد من حر واخبار مأساوية تخص الوضع الامني يبقى اشتياقي للبيت وللاوقات اللي اقضيها واني احجي بالتليفون وللسهر لوقت متـأخر بالليل واني اسمع اغاني او اتفرج شي عالتلفزيون او اقرأ كتاب او ارسم او أي طريقة اقضي بيها وقتي واني بالبيت وصوت موبايلي كل شوية يرن بمسج او مكالمة وتواصلي وية الي اعرفهم فهو اشتياق فاق الوصف.

من الايام المميزة الي صادفتني بعمان هو لقاء مجموعة من المدونين العراقيين، طبعا هو ما يعتبر اللقاء الاول
بس بالنسبة الي راح اعتبره الاول لان الوكت كله جنت وية المجموعة وجان وكت حلو ومميز اجتمعنا بي احنة العراقيين بمكان عربي واتصور جنا الكروب العراقي الشبابي الوحيد الي اجتمع بكافيه "بلموندو" بعمان..وشاءت الاقدار ان نلتقي خارج العراق وما نلتقي ببلدنا بسبب الظروف اكيد..واتصور جان صار شي صعب ومو سهل تحقيقه لو احنة ببغداد ولا اتصور جان فكرنا ان نلتقي بيوم من الايام والسبب الاول والاخيرهو الوضع الامني من تفجيرات وخطف وقتل واغتيالات الي منعتنا من هواية اشياء وخلت حياتنا تكون رتيبة وما ممكن نختلط ونلتقي ونتواصل وية اصدقائنا الا عن طريق النت او التليفون لان هذي الطريقة الوحيدة الي ما بيها خطر على ارواحنا ..بسبب الظروف صارت علاقاتنا الاجتماعية محدودة..ونحاول نحافظ عليها ونستمر وية الي نحبهم لان ما اتصور واحنة بالعراق نكدر نلتقي بناس زينين ومثقفين لان ما راح نلكاهم اصلا، اكثرهم اما سافروا او ما يتواجدون بس بمكان شغلهم او ببيوتهم او خارج العراق مثل ما شفت هنا بعمان كل الناس والعوائل الراقية تركوا العراق بسبب التهديد الي تعرضوا اله او بسبب الظروف وما بقى بالعراق الا القليل منهم والي دة يحاولون يعيشون بسلام.

جان عددنا عشرة :
Morbid smile
Attawie
And her sister S.
Anarki-13 "then some"
24 steps to Liberty
Baghdad treasure
Healing Iraq and his brother N.
The Kid
And me Micho
;))



الغريب بالموضوع اني الوحيدة بيهم الي عندي بلوك او بالاحرى مدونة عربية واكتب بيها باللهجة العراقية..وما كتبت بالانكليزي او بالفرنسي او بغير لغة لان شفت عن طريق اللغة العربية اكدر اعبر عن نفسي وشخصيتي وافكاري ومشاعري بطريقة احلى ...طبعا هذا رايي الخاص ..

وجان هذا اللقاء الاول..اما اللقاء الثاني..جان مختلف واحلى...رحنا "لحدائق الملك حسين" مكان جبير كلش وبي حدائق واسعة واجواء رائعة..ونفس المجموعة وويانا "كيتار أتاوي الي بدت اوتاره تتكطع وحدة ورة اللخ" الجو جان خرافي..برد..برد...كعدنا كلنا..و"N" عزف "hotel calefornia"" وغنينا...مدا اكدر اوصف الاجواء..بس حسيت وحدة من احلامي البسيطة تحققت، اجواء حلوة ولمة عراقية حلوة واغاني وامان وراحة نفسية ... .جان يعجبني ان تجمعني اني وكروبي بالكلية او وصديقاتي هيجي طلعة ومكان واجواء بس مصارت بسبب الظروف...وصارت وية غير كروب وجانت مثل ما تصورتها واحلى....تمشينا وقررنا ان نروح لمتحف السيارات الملكية وقطعنا طريق طويل الى ان وصلنا للمتحف وتفاجأنا ان المتحف مغلق بيوم الثلاثاء "فقط" يعني على حظنا طلع مغلق !!! عراقيين..دائما الحظ مو ويانا.. . .وخلصت طلعتنا....بالضحك والسوالف الحلوة وبقت منها ذكرى تجمعنا وصور ....اتصور هذي الايام راح تبقى ببالي مثل الايام المميزة الي تجمعني وية الناس القريبين الي، والي برغم بساطتها بقت ذكرى حلوة....ما انجمعنا ببلدنا بس التقينا ببلد ثاني مختلف، حسيت بتجديد نفسي لان كلنا جنا محتاجين لهذا التغيير وخاصة من بعد ال3 سنين الي عشناها باحداث الحرب والفترة الي بعدها وجانت فترة برغم وجود ايام حلوة بيها بس الخوف والحذر من الطريق والاخبار الي نسمعها والاحداث المرعبة جان مسيطر على تفكيرنا وجنا بسباق دائم وية الموت...

الي فرحني بالمجموعة، الافكار الراقية الي يتمتعون بيها والنقاشات الي دارت وتمنيت لو كل العراقيين يملكون هذي الطريقة بالتفكير بعيد عن الطائفية، الي صارت شغل العراقيين الشاغل، والحمدلله الله جمعني بناس مثقفين وراقين داخل وخارج العراق، وما حسيت بغربة من وجودي وياهم وكانما اعرفهم من فترة طويلة...

واللقاء الثالث صار "بمكة مول" وقضينا وقت طويل كلش ما بين تمشينا واستقرينا بكافيه " " وما خلت الكعدة من السوالف والنقاشات والضحك، قضينا وقت اطول من كل مرة وجانت الاجواء حلوة بالكافيه على اغاني عمرو ذياب، ودخان النركيلة الي ملى المكان بصورة مو طبيعية..! فكرت بالعراقيين شلون دة يعيشون اكثر الايام حرارة بالعراق لان بشهر اب يكون الجو حار وما ينطاق بينما بعمان جان الجو خرافي وبدا الشتا يجي واحنة بالعراق ما لاكيها لا من الجو ولا من الوضع الامني ولا من الونسة هنا ولا من النظافة ولا الراحة ولا من الكهرباء، كلشي بالعراق مختلف عن باقي دول العالم....


من الامور الغريبة الي شفتها بعمان انو صعدت بتكسي حتى يوديني على منطقة معينة وجانت مكتوبة جملة " لطفا....السائق اخرس!!" واني على طول الطريق ساكته وحتى ماما ساكته ولا سالت على المنطقة الفلانية او عن الشارع..وماما ما سالت او وجهت كلام اله حتى ما نحرجه....ولمن وصلنا منطقة الكاردنز ودا ننطي الاجرة كال السايق.."دينار ونص" !!!!!!!! علامات التعجب انرسمت على وجهنا....اشو السايق حجه وسمعنا صوته؟؟.....والشي الثاني...وحدة من تناقضات الحياة ...سايق تكسي كاتب ممنوع التدخين!!! اوكي ماكو اشكال واني ما ادخن اصلا وجنت مسوية بوست دعوة لترك التدخين ..بس الغريب اصلا السايق جان يدخن....زين ليش كاتب ممنوع التدخين؟؟

مرة دا امشي بالشارع وسمعت واحد عراقي يكول " المفروض يسمون بغداد عاصمة عمان" طبعا لكثرة العراقيين بيها، وين ما اروح اشوف عراقيين واسمع اللهجة العراقية ..وهذا احلى ما بعمان.....بحيث ما حسينا بالغربة..

ما بقت الي الا ايام قليلة وارجع للعراق، اشتياقي مو طبيعي، برغم الحر والتعب وازمات البنزين والكهرباء والظروف التعبانة اني ما ضايجة لان راح ارجع, جانت فترة حلوة بعمان وتمنيت لو كل الاصدقاء موجودين وياية بعمان ويحسون بالامان والراحة الي شفتها هنا, وان شاء الله تصير الظروف بالعراق احسن ونحس بالامان وتنحل كل مشاكلنا وكل المغتربين يرجعون ويعمرون وطنهم .....وماكو شي بعيد عن رب العالمين..



24 comments:

Konfused Kid said...

As always, a very nice post.
keep it up and may you return in safety.

I will return this Thursday.

Little Penguin said...

جان المفروض ترزليهم رزالة محترمة.. أشو أول واحد شايل خشمة عالعالم و ميريد يسولف وياهم.. شدعوة؟ قابل رح نقلل أدب؟ قابل احنه أخلاقنه أدنى من المطلوب؟ اصلا هم الاردنيين يخلون العالم تكرههم لمن يتصرفون هجي تصرفات.. أما ذاك اللاخ فجان المفروض تجرين الكطف من ايده و تطفيه بعينه حتى يتأدب... كبر مقتا عند الله أن تقولوا ما لا تفعلون

مادري اني عندي حساسية من أخلاق العرب خصوصاً هالأيام لمن حزب الله ديقاتلون اسرائيل و ولا عربي فتح حلكه تأييداً الهم او استنكارا لاسرائيل.. من عابت هجي أمة فاكسة

على كل.. نيالج.. اني اتمنى و أحلم انه أروح لفد مكان بي عراقيين براسهم خير.. لأن معظم اللي يمي او اللي بعمري هم شايفين روحههم و سفهاء.. بينما انتي ما شاء الله التقيتي بالنخبة. الله يحفظهم فرداً فرداً

ان شاء الله ترجعين لبغداد بسلامة و متنسيني من الدعاء.. نتائج امتحاناتي رح تطلع هذا الخميس.. اذا نجحت فأدخل صحافة او علم نفس.. اذا جفصت فأدخل في المجال التجاري (أفتّح علوة) و أتزوجلي فد وحدة عمرهه 15 سنه.. يعني قمة الفشل.. أليس كذلك؟

Nabil said...

nice post...
yeah.. we had a lot of fun.. specially in ALhusain Parks..
you forgot to mention our heritage songs.. the Iraqi songs...
peace out.
keep up the good work.

layal said...

موضوعك علي قولكم بالعراقي _هوايه_ حلو
وهوتيل اوف كالفورنيا يا سلاااام
كنتوا متفقين علي لبس الجينز ؟؟
:-)

Treasure of Baghdad said...

الله على هذا البوست الحلو اللي خللى دموعي تنزل ما ادري من الفرح لشوفتكم او من الحزن على بلدنا المدمر. اتمنى ان ترجع ايام زمان ونكوم ذاك الوكت نتشاوف بالعراق بعيد عن الشعور بفقدان الامان. ان شالله يرجع بس اتوقع مو عن قريب... تحياتي

karakib said...

قالي كتير ما جتش هنا ...
ليها وحشه المدونه دي ..
انتوك

LionKing said...
This comment has been removed by a blog administrator.
LionKing said...

مراحب .. تعودت ان اكتب وان تكونين بالعراق بس هذي المرة الاولى اللي اكتب بيها وانتي خارج العراق واتمنى لك كما تتمنين ان ماتكون الاخيرة !! بصراحة الموضوع المني لمن قارنت الوضع وبنفس الوقت فرحني لان انتي جتي بالوقت اللي كضيتي متونسة فتضاربت عندي افكاري .. وردت اكتب تعليق اكول بي بدون تعليق لان اللي قريتة جان شي حلو باحساسك بي وجان صعب علية ان اسمع طبيعة معشية الناس بالخارج وكانما اول مرة اسمع بيها ,... اسمحيلي بان اتوقف عن التعليق وفعلا راح اكول على هذا الموضوع
....... NO COOMMENT

Caesar of Pentra said...

Hey! I knew about you from the kid! He told me that he met Attawie and morbid smile and micho!
I said: "micho?!"
He said:"Yea, micho la jolie fille!"
I said:"hmm, elle parle francais! Bein!"
By the way, nice post and you may keep up blogging!
I dunno if I would post anymore cuz I'm intending to leave Iraq and live in Syria forever!
You are lucky to see each other and share a beautiful moments there!
I haven't met any other bloggers than the Anarki13 and the konfused kid!

I will keep in touch and I hope you will do the same!
(excuze me for replying in english!)

Caesar of Pentra said...

just omit the a* before the beautiful moments :P

Michomeme said...

Konfused Kid
شكرا على تعليقك، راح احاول اكتب مواضيع اكثر، حتى لو الوضع بالعراق ما يساعد...
اني رجعت بسلامة والحمدلله ...
جانت ايام عمان حلوة...
وان شاء الله تتكرر...وتتحسن الظروف

وان شاء الله الكل رجعون بسلامة

*** *** ***

little penguin

على شنو انت حارك اعصابك؟؟...المفروض نتجاوز اي تصرف سيء باخلاقنا ، واذا حبوا يشيلون خشمهم على احد ف براحتهم ومن ذكرت تصرف سواق التكسي مو بقصد انتقادهم سلبيا،لا بالعكس بس مجرد تناقض لكيته كدامي...
وبرغم الي سمعته عن عمان...اني ما شفت اي تصرف سلبي منهم، اصلا همة ناس بسطاء ومسالمين جدا...
وما اكولك الاردنيين كلهم هيجي.لان الزين والمو زين بكل مكان...
وترة كلمن حر بنفسه...ويتصرف بالطريقة الي تعجبه..مو؟؟ هي مو حرية لو شنو؟؟

اي والله صحيح اني وياك بهاي النقطة من كلت من عابت هيجي امه فاكسة...ترة هي مو بس حزب الله ومدري منو...
شوف العراق شصار بي وشنو جراله وكله بسبب منو؟؟؟
العرب..ومن كل الجنسيات حتى العراقيين...التهوا بالطائفية وكذاب الي يكول ماكو حرب اهلية بالعراق اصلا واضحة وضوح الشمس وصارت علنية جدا..والعرب نفسهم شوهوا صورة الاسلام الي رب العالمين ونبيه عليه الصلاة والسلام وصونا عليه...صار العالم الغربي يخاف من المسلمين ...لان يشوفوهم ناس تكتل بناس وهمه مسلمين...
اوووووووف يا ربي...

والله الايام الي كضيتها بعمان جانت جزء من حلم ...ولو هو بسيط ان اعيش حياة طبيعية مثل الي جنا عايشيها واحنة ننعم بالامان والاستقرار...والراحة النفسية والحياة كدامنا ...
وبالعراق كومة ناس زينين وعوائل راقية جدا بس اكثرهم سافروا وتركوا العراق الى ان تستقر الظروف...والله يحفظ الجميع يا رب ويبعد عنهم الشر..
ما كلت النا سيد بطريق انت باي بلد عايش؟؟؟

وكوللنا شنو اخبار النتائج؟؟
راح تدخل صحافة او علم نفس لو تتزوجلك وحدة عمرها 15 سنة وتفتح محل لو جنبر بالعلوة وورة يومين تجيك طلقة تايهة لو تنفجر عبوة ناسفة وكلشي يروح...!!
ان شاء الله تنجح وتكمل دراستك بالمجال الي يرضي طموحك ومن الله التوفيق

*** *** ***
Nabil
صح جانت سفرة حلوة بحدائق الحسين..والاجواء احلى
اما الاغاني العراقية ..جانت الها مكانتها الخاصة ...واحلى شي اغنية.."صغيرة جنت"...

ان شاء الله الايام الجاية احلى...

Michomeme said...

ليال...اهلا بيج...نورتينا..وحلوة منج ان تكتبين...هواية..بلهجتنا...كل لهجة الها جمالها وميزتها...
هواية...ووايد..وكتير ..وهلبا باليمني..وبرشا...تونسنا..او انبسطنا..وكضينا وقت حلو...
واذا عالجينز...كولي بعمان كلهم متفقين يلبسوا الجينز...لان الكل لابسين جينز وبكل الاوقات..
واحنا ما اتفقنا لكن صارت صدفة وتعرفين هي سفرة شبابية....فالجينز يكون مناسب جدا...

Michomeme said...

TREASURE OF BAGHDAD

شكرا على تعليقك الحلو، هذي المرة الاولى تكتب تعليق بمدونتي...ف اهلا بيك..
ان شاء الله اذا تكون دموع، ف اتمنى تكون دموع فرح، على شوفه اهلنا واصدقائنا واحبابنا وعلى رجوع الاستقرار والامن لوطننا مثل ما الكل يتمنى هذا الشي..
اني رجعت للعراق، للخوف وللحر ولصعوبات الحياة ولآنعدام الامان..
اكول للي بالعراق الله يحفظكم ويبعد عنكم الشر..
واكول للي خارج العراق الله يحفظكم ويرجعكم للوطن ويوفقكم بحياتكم جميعا... وان شا الله يتجدد اللقاء مرة ثانية بس يكون الوضع احسن والامان راجع النا والكل بالعراق...

تحياتي..

********* ********

KARAKIB
اهلا بوجودك انتوك...نورتينا..

******* **********


LIONKING
مثل ما تعودت دائما على تعليقاتك بكل بوست اكتبه،اكولك مراحب واهلا بيك
السفرة جانت حلوة واللقاء وية مجموعة المدونين جان مميز، وذكرنا اسمك واحنا هناك ...
المقارنة ما موجوده لان ماكو شي ممكن نقارنه بين الحياة هناك وبين حياتنا بالعراق..
كلشي صعب هنا وماكو امان وانت تعرف بالحال..
الوقت الحلو الي قضيته هناك جنت اتمنى ان اشارك بي كل الي احبهم..اهلي..اصدقائي وناسي بس للاسف ما تحقق الي ردته...
دائما ادعي من الله ان يرجع الاستقرار والامن النا...ونعيش حياتنا بصورة طبيعية...مثل باقي العالم...والله كريم وماكو شي بعيد على رب العالمين...

تحياتي..


**** ****** ********

CAESAR OF PENTRA


اهلا بيك
التقيت بمجموعة من المدونين العراقيين، وتعرفت على مدونات جديدة..
شكرا على تعليقك، وما اتصور حتى لو انت عشت بسوريا راح يمنعك من الاستمرار بالكتابة، بالعكس..استمر...

BY THE WAY
JE PARLE BIEN LE FRANCAIS...
D;

24 Steps to Liberty said...

هلوووووووووو
والله مشتاقلكم كلكم.. شكرا على التعليق اللي كتبتي على البلوك مالتي.. مثل م كتلج بعمان البلوك مالتج احلى واحد بالنسبة الي لان بالعراقي
ديريبالج على نفسج هناك واتمنالج كل الموفقية

عمر
(الله...كتبت اسمي بالعربي)

Michomeme said...

هلو عمر..شكرا على تعليقك وحضورك، حظ موفق ونشوفكم بخير ان شاء الله

واكتب براحتك بالعربي ..

Little Penguin said...

شكراً آنسة ميشو على مباركتج الميمونة، الحقيقة أكثر ردود الفعل لحد الآن سلبية لأن أهلي يعرفون و آني أعرف أنه جان أكد أطلع أعلى الدرجات بس مبذلت أي جهد في أن أدرس أو أراجع وقت الامتحانات.. طبعاً اني عندي 100 حجة بس لن ندخل بالتفاصيل في الوقت الحاضر.. على كلٍ مشكورة و يا ريت تلقين نظرة على المدونة العربية مالتي.. هواية يهمني رأيج الحقيقة، و هالشي لأن حضرتج جنتي أول مدوِّنة عربية أشوفهه.. مشكورة مسبقاً.. نراكم على خير

tweety said...

فكرة جميلة
تجمع جميل وذكريات جميلة
تعرفين صار المدون هالايام اعلامي وسفير لبلده
مثل ما نشوف محطات فضائية لدول أخرى
ونتابع برامج لحضارات أخرى
ونسمع اغاني بلغات أخرى
قمنا انتابع أخبار الدول عبر مدونات المدونين
يعطيكم العافية

Michomeme said...

اهلا littile penguin
شكرا على حضورك، واني زرت مدونتك العربية وقرأت الموضوع الي بيها ..
وزرت المدونة الثانية العربية وحلو ان يكون لكل مدونة اتجاه خاص بالمواضيع

وبالتوفيق ان شاء الله




تويتي
شكرا على حضورج ونورتينا..
من خلال المدونات عرفنا هواية شخصيات مو بالضرورة معرفة شخصية..لكن اكتشفت ولحد الان اكو هواية ناس طيبين ومسالمين ومثقفين جدا، من خلال كلامهم ومواضيعهم وافكارهم ..اضافة انو اكو هواية مدونات تعبر مو مجرد عن شخص وانما عن مجتمعه الي يعيش بي وعن بلده..مرات افكر ان اكتب مواضيع عني العراق والي يتعرض اله الناس كل يوم حتى اوصل الصورة الحقيقة الي اشوفها اني لكل من يقرأ مدونتي.....لكن ما احب ان تكون مدونتي سياسية..

والانترنيت او المدونات عالم مثل عالمنا الي نعيش بي..متنوع وبي اختلافات..وكل شيء نلاكي بي

تحياتي للجميع..
ميشو

GayofSun said...

سيدتي مدونتك راااااائعة

el_assel said...

هــــاي ميشــو
انا عايز اقول حاجة واحدة
ان الوطن لا يتعوض باي بلد تانية مهما كانت جميلة
عايز اقولك ان لو قالولي اسكندرية ولا فنيسيا اكيـــد طبعا حتكون فنيسيا
علي الرغم من اني بحب اسكندرية قوي بس فعلا ماقدرتش اقاوم
المهم ان الواحدبيحب امه اكتر من اي واحدة في الدنيا علي الرغم من انها مش اجمل واحدة ممكن ماتكون جميلة اصلا
وشكرا لزيارتك الرقيقة للبلوج بتاعي

Michomeme said...

الاصيل


اهلا بيك..
اكيد الوطن يبقى شيء عزيز وغالي جدا وهذا كان احساسي من اول يوم دخلت بيه لعمان، برغم الراحة الي حسيتها وعشتها هناك بقت مثل الغصة بقلبي جنت اتمنى لو العراق هاديء ومستقر ونكدر نعيش بصورة طبيعية بعيدين عن الخوف من الارهاب وفقدان اهلنا والي نحبهم..

رغم الصعوبات يبقى الوطن غالي، حتى لو ما متوفرة بي متطلبات العيش الي نحتاجها كل يوم مثل ماء وكهرباء وامان..
والحمدلله على كل حال
واهلا بيك وشكرا على زيارتك..

amjad said...

مساءكم طيب
قد تكون فكرة الكتابة باللهجة العراقية مبتكرة ومبهرة ولكن على نطاق محلي ومن وجهة نظر العراقيين ولكن بنظرة شمولية لاي مرتاد للنت فان المضمون اعجبني فقط هو الذي اعجبني .
ما اريد قوله جمله صغيرة فقط وهو كم يسعدني كأردني ان اسمع او اشاهد الاخوة العراقيين ينعمون بالهدوء في الاردن وكم يسؤوني عندما اسمع بعض وهم قله قليله يتنطحون للاساءة للاردن وللاسف ومن منظور ضيق يعرفونه جيدا .
لا الاردنيين او غيرهم من الشعوب يجبر الاخرين على كراهيتهم وهذا فكر ونظرة ناقصة لان قضية الكره والحقد والحب ابجديات تنبع من روح الانسان نفسه وليست كردة فعل على تصرفات الاخرين .
وتصرف السائق لا ينظر اليه الا منطلق عملي بحت انه مجرد سائق تكسي وله الحريه المطلقة بالتصرف الا من ضمن واجباته الاخلاقية والمهنيه كسائق تكسي ولا اظن ان الحديث المتبادل هو واجب مهني او اخلاقي قد اساء السائق ليتحتم على المتنطح انتقاد الاردنيين .
كان الامر مستغرب وتصرف غريب شي ما ولكنه حيثية لا تستحق الا الاستغراب فقط لا غير .
متمنيا للعراقيين الهدوء والطمانينة ببلدهم الاردن وان يعم العراق .
amjed690@wanadoo.jo
www.whitehouse0.net

reem78 said...

انا بنت من العراق ساكنة في المانيا
مشتاقة لبغداد ولاغاني عادل عكلة واغاني الهام المدفعي وسيف شاهين وفرقة الاجراس
جنت اتمنى اكون ببغداد حاليا وابقة وية اهلي على نفس اللمة وقصدي باهلي جيراني وكرايبي مو بس والدي ووالدتي واخواني
قصدي بكل اللي عرفتهم بالجامعة وبالمدرسة
مشتاقة لايام الثمانينات وجانت احلى ايام مع انه جانت ايضا حرب بس على الاقل كنا كلنا سوا مو مثل هسة كل واحد بديرة مننجمع حتى بالمناسبات
اتمنى الوضع يتغير وترجع تنور بغداد باهلها

TheGrace / النعمة said...

Warm welcome to Alnemat TheGrace Arabic Christian Internet Magazine, We love you! Please visit us at:

In TheGrace opportunity to meet Jesus the Savior / في النعمة فرصة للقاء المُخلِّص يسوع المسيح
http://www.TheGrace.net

Salvation pardon peace life certitude mercy in Jesus / خلاص غفران سلام حياة يقين رحمة في المسيح
http://www.TheGrace.org

Arabic Christian Magazine The Grace offering the Arabic Bible / النعمة تقدم الإنجيل الكتاب المقدس
http://www.TheGrace.com

نتمنى لكم الفرح والسلام والمحبة لأن السلام افضل من الحرب والمحبة افضل من الكراهية كما ان النور أفضل من الظلمة
سلام لكم في محبة الله.نتأمل زياراتكم الكريمة لموقع النعمة موقع مجلة النعمة يقدم كلمة الله الكتاب المقدس الإنجيل رسالة السيد يسوع المسيح قراءات مختارة مواضيع مصيرية قصص واقعية شهادات شخصية ترانيم ممتازة ردود مؤكدة كتب بنّاءة رسوم تسالي تأملات يوميات
Bible audio Read search in Arabic Studys Stories Testimonies Hymns and Poems Answers Books Links Daily devotions Acappella Music Graphics /
Alnemat Journal Arabe Chrétien La Grâce la Revue Arabe sur Internet offre La Sainte Bible Al-Injil L’Evangile de Jésus Christ gratuit, Bienvenue a La Grâce.