Saturday, July 22, 2006

شكو ماكو؟؟


شكو ماكو؟؟
السؤال العراقي المعهود باللهجة العراقية الحلوة، اكو هواية اشياء جديدة صارت، طبعا مالي اي علاقة بالوضع لان ما اريد احجي عنه وما راح اوصل لنتيجة اذا حجيت بي، المهم راح اكتب، نفسيتي زينة والحمدلله وماكو شي مضوجني حتى لو رحت للمطار ورجعت بنفس اليوم وما سافرت بسبب الاشكالات الي دائما تصير باللي يخص الجوازات، اذا على هذي ف كلش كلش سهلة وان شاء الله السفر على يوم ثاني بعد ما اكمل مسألة الجوازات..
الاجواء، الجو حار وصيف ، هم ميخالف بس دا احس برغم الحر اكو فد هوى طيب وبارد ، يجوز بس اني احس بي، على العموم هذا تحليل نفسي ومو شي ملموس يعني الهوى البارد ماكو، بس نسم علينا الهوى...
اكو احلى من ان يهديني (انسان) كلمات هذي الاغنية؟؟؟؟
كلتلهم يعود
كالوا نساك وراح
كلتلهم يعود
وبقلبي يالمحبوب بس انت موجود
ارجع يا ضي العين لا تنسى الوعود
ليلة اريد وياك نكعد سوية
ويلي ويلي يا ويل حالي
منتظره صار سنين والهم صفالي
لا تصدك يهون
والله صعب فركاك لا تصدك يهون
ولشوفتك والله حضرت العيون
اعذرني هايم بيك
سميني مجنون
بيدك جنوني صار لا مو بيديه
ويلي ويلي يا ويل حالي
منتظره صار سنين والهم صفالي
ما يهمني نوره
حتى القمر بالكون ما يهمني نوره
لو انت لو ما اريد لعيوني صورة
بستان قلبي راد منك زهوره
ويا ريت بالبستان نكعد سوية..

3 comments:

LionKing said...
This comment has been removed by a blog administrator.
LionKing said...

شكو ماكو ؟؟ سلامتك ماكو شي ...وتالي تطلع السوالف ولساعات !! تعودنا على هذي العبارة اللي نكولها اللي تحضرني بقصة قصيرة ((يكولون انه كلمة شكو ماكو هاي فد كلمة سرية تكشف كل الاخبار عن من يسال بيها والها فد تاثير سحري بحيث ماكو خبر ينظم بيها !! في يوم من الايام بوش راد يشوف الوضع ابغداد ف راح يتمشى بالشوارع بس هوة متنكر أكيد (لان اذا مايتنكر راح ياكل طن كتل !! ) المهم ف هوة تعلم كلمة شكو ماكو وراد يستعملها ف شاف رجال راد يعرف منه اخر الاخبار ف كالة بوش لهذا الرجال شكو ماكو ؟؟ جان يرد علية كالله والله ماادري بس يكولون بووش ابغداد !!
فعلا شكو ماكو تكشف شكو مضموم ومتستر !! هذي القصة احسها راح تكون بعدها فاصل غنائي وهية اغنية عادل محمود وكلتلهم يعود ... وهي اهداء خاص جدا مني ل كيف توما !!

Michomeme said...

لايون كنك
دائما من نسال السؤال المعهود "شكو ماكو" جوابه هم معهود"سلامتك ماكو شي" ويجي الكلام بدون توقف..فالاحسن نبدل الجواب ونكول "كلشي اكو" ونبدي نحجي ونكول اكو فلانشي وفلانشي وفلانشي

وخاصة انو الاشخاص الي يحجون..يحبون يتناقشون ويتفلسفون..ويطفرون بالكلام هواية..اشو نكول سلامتك كلشي ماكو...والحجي ما يخلص...شنو همة الي يحجون!!

اما بوش اذا يجي لبغداد اني متاكدة كلنا راح نعرف بي خاصة اذا جاي متنكر لان راح يبين وما تعبر على العراقيين...العراقيين كلهم يشبعوه طن كتل..

و ال كيف توما...اكيد تشكرك على الاغنية الحلوة والكلمات والاحساس الاحلى...

وكللهم يعود
;)