Wednesday, September 27, 2006

رمضان كريم


ايـــــــــــــــــــــــه، البارحة غير اجواء غريبة بوكت السحور، لوحدي، والبيت هادئ كلش بحيث بالكوة اكلت وساعة اكول اترك الاكل واروح انام وساعة اكول لا خلي اكل واصلي واقرا قران واروح انام وبعدها كلت لا ما انام افتح الانترنيت بعدها واسهر للصبح!! طبعا حالة السهر هذي مرات تعجبني ومرات تزعجني، لان احب اسهر ولوحدي عالانترنيت مثلا وهدوء او مرات اني احب اقضي وقت وية نفسي، بس يزعجني لان مرات امل من الكعدة عالانترنيت ومكابلة الكومبيوتر، واكعد متأخرة ثاني يوم الصبح واحس بالتعب والكسل المو طبيعي، ولو اني مو من نوع الي يرهملي السهر بس ما ادري ليش دا اقاوم ومدا انام..
تسحرت البارحة، خلطة المايونيز وسفن أب، وظليت كاعدة واصيح وينج "حنونة" حتى المايونيز من سويته مو مثل ما انتي تسويه، هذا رمضان ماله طعم مثل السنين الفاتت ابد، طبعا السبب الاول بالنسبة الي "اختي مو وياية" واكيد هي هم دة تفتقد التجمع مالتنا على الفطور
بس الوضع هسة والظروف الصعبة الي دة نمر بيها هم الها سبب اكبر على هذا الاحساس الغريب..
طبعا الاخبار مثل ما هي والوضع دة يسوء يوم بعد يوم والف الحمدلله والشكر على كلشي، بس اكو شي رغم كل الصعوبات ضحكني، جنت دا انتظر أذان المغرب حتى افطر، سمعت 4 جوامع كل واحد بيها يأذن بوقت مختلف عن الثاني...يا ســــــلام علينا، بعدهم السياسيين يكولون "نحن نحارب بوادر الفتنة الطائفية" يعني معقولة هذا كله يصير ويسموه "بوادر"!!! يابة د طيروا انتوا وفيكاتكم التعبانة..!!!
المفروض بقت ايام على دوامي بالكلية، هذي اخر سنة الي، ان شاء الله اتخرج على خير وسلام، ولو يعز عليه ان تنتهي هذي الفترة الحلوة الي خلتني اتعرف على هواية صداقات وقضيت وكت حلو وياهم، وجمعتنا مواقف مشتركة بيننا، واوقات دراسة وخوف وقلق من الامتحانات والوضع ..من صدك كلشي اله نهاية..وماكو شي يبقى على حاله..ما راح تبقى بس الذكريات والصور..
صديقتي وسونة سافرت وتركت العراق الى اجل غير مسمى ، "الدفلز" جانوا اربعة بنات وصرنا هسة بس 3 لان وحدة من عدنا راحت، بعدني متواصلة وياها ويا عالم شوكت نتشاوف، هذي ثاني صديقة الي تسافر، اول وحدة يوني وهسة وسونة، وطبعا موربيدو هم سافرت ، وما ادري الدور الجاي على منو يسافر..
الحمدلله الازمة النفسية الي مريت بيها قبل فترة انتهت، وانتهت وياها الحيرة والخوف من اي قرار ممكن اتخذه، والاحلى باللي صار، ما اضطريت ان اقرر اي شي لان كلشي صار وانتهى بدون اي اثار جانبية...شنو القصة؟؟ محد ديعرف!!
ماكو اخبار جديدة، دا احاول اكمل قراية كتاب باللغة الفرنسية بعنوان
"je voudrais que quelqu'un m'attende quelque part"
عبارة عن مجموعة قصص قصيرة، ولحد هسة ما كملت قرايته :)
وشوكت اكمله؟؟ بس الله يدري

26 comments:

LionKing said...

رمضان كريم علينا وعليك هسة وبهاي اللحظة واني اكتب والساعة هسة بال 3 وربع ودااسمع ابو الطبل (المسحراتي) ديدك بس ماكو احد يركص !! المهم اجواء الوحدة مرات تكون غاية في الروعة وخاصة بوجود وجبة خفيفة او غريبة بوقت متاخر .. بس اني تعجبني هذي الاجواء اللي جنتي بيها لان اكثر ايامي اكضيها بهذا الشكل وان شاء الله تكون الفترة القادمة واني اكضيهي مو وحدي ان شاء الله ...
هوة الوقت اللي تاكلين بي محير يدعو لترك الاكل او ان تلتهين بشي ثاني بس بما ناه رمضان والمفروض ان تتسحرين ف اكلي احسنلك لان مرات لاالجوع ولاالعطش يرحم ولو على الثنين راح يكون اجرك على الصيام لان الصيام اذا مابي تعب مو صيام ولاواحد يحس بحلاوتة ...
اما افتقاد شخص عزيز مثل اختك هذا الشي مقدر ان يكون بهذا الوقت واكيد الكل وبكل وقت يفتقدوها بس ان شاء اله تنعاد عليكم اللمة الحلوة بالافراح وبكل خير يتمناه قلبي الكم ...
وبالنسبة للوضع والاخبار فياعيني على الاوضاع خلينا احنا خالقين لنا الجو اللي باعدنا عن الاخبار واذا تحجين على البوادر ترة بوادر حاليا متزوجة 10 والعدد في تزايد !! ..
الموضوع الاخير والحمد لله واهنئك علية انه انزاح بشكل يكون لصالحك اهم شي وبالدرجة الاساس وان شاء الله يرسملك رب العالمين الطريق الاحسن والافضل ...

1st Comment
h3h3h3h3h3h
سويتلة ببلش ساعة بال 4 و 31 دقيقة فجرا !!

Morbid Smile said...

الله .. تسمعون ابو الطبل الفجر , هنا اصلا ماكو رمضان :(

ماماتي تسحري زين.. شنو بس مايونيز؟؟ و لو شكل الماعون مشهي :) .. و الله حتى اشتاقيت لميز الطعام مالتنه من شفته بالصورة

ثاني كومينت !! هعهعهعهعهع

ههههههههههههههه

Michomeme said...

اي انتوا اثنينكم كمتوا تتسابقون ياهو "ياهو لو كوكل؟" الي يكتب كومينت اول..

موربيدو ابو الطبل سمعته مرة وحدة بس بأول يوم رمضان، وبعدها ما سمعته، بس يجوز موجود واني ما ادري لان دا اتسحر من وكت..

لايون كنك اذا ابو الطبل يدك ... عود احنه نركصله...هعهعهعهععهع

بديت امل واني اتسحر لوحدي، جرب تسحر لوحدك كل يوم راح تمل وتضوج..


تدري لايون انت هم الله يساعدك مفتقد اللمة وية الاهل على الفطور، حتى موربيدو هناك وحدها مرات تفطر..يبوووو راح اكلبها مناحة


ايه موربيدو اذا انتي مشتاقة لميز الطعام مالتنا ف اني مشتاقة للمعكرونة بالجبن الي تسويها
:(


يلة كافي ..اني جوعانة ومدا اعرف شنو اكتب اكثر..

ان شاء الله صيام مقبول..

هعهعهعهعهعهعهعهع

LionKing said...

موربيدو راح ادزلك ابو الطبل اليوم بس راح ادزة من الظهر علمود يوصلكم الفجر .. بس اخاف ياخذو السلابة بالطريق هوة والطبل مالتة وتالي يكولون لاحضت بالمسحراتي ولا بالطبل ... خلينا ندك الك مسد كول بس خلي النغمة مال صوت طبل اذا عندك !! ... الله يعينك على بعدك بس لاتتصورين انتي بعيدة ومحد يتذكرك بالعكس الغريب يذكرك اكثر من القريب ولو ميشو عدها قول تكول البعيد عن العين بعيد عن الكلب واني اكول لكل قاعدة شواذ !! وانتي صح بعيدة بس قريبة كلش منا كلنا ...
وبعدين ياميشو منو اللي بي حيل يركص بال 5 الفجر !! ترة التحشيش وصل للسكف !!
كافي ترة اني هم حششت ..
اتمنال(ج) الموفقية موربيدو !!

Michomeme said...

اني بيه حيل اركص هعهعهعهعههع



لا تصدك، هو اني ما بيه حيل بكل وكت شو الشحن عندي خلصان دائما وماكو كهرباء حتى اشحن البطارية...



ندزلها ابو الطبل لو نروحلها احنة؟؟


ولكل قاعدة شواذ اكولك..اي نعم صحيح اني وياك بهاي النقطة..
اتصور يجي يوم واكتب بوست عن "اللي بعيد عن العين بعيد عن القلب"

بس بحالة اختي اكيد ما ينطبق عليها المثل..

مكمت اعرف شنو اكتب
لان خربت من الجوع

A. Damluji said...

احمممممم

هم هلو

شوفوا لعد شصايرة هنا ونسة بحيث حتة اني كمت اكتب عربي!

ستي العزيزة, الف الحمدالله الحالة (حالة لو عمة؟)المعنوية احسن, وان شاء الله دائما up

ترة هاي مو خوش سالفة حاطة مايونيز وسفن هيج بالوجه ترة معدتي الصبح من فتت هنا كامت تغني فريد الأطرش!

رمضان كريم, وعساكم عوادة دائما وأن شاء الله السنة الجاية انتي وست حيحو تفطرون سوة

هنا كذلك ترة ماكو مستر مسحراتي, والأذان يادوووووووبك ينسمع..
اقترح لو أحد يفوت المسحراتي من يم بيتهم يسجل الصوت ويدزة لحيحو حتى تشغلة وكت الأمساك!

كافي ترة اصابيعي تعكدت وعيوني انعقجت من ورة سالفة العربي هذي...

and now, back in english

تدرون مو اني ثقافتي اوربية وما أكدر اكتب اللا باللاتيني... أو لا لاااااا

take care now, little sister, and remember, anytime you need anything, just whistle!

:D

salam to all, and then some!

ها ها لحظة (مو خوتي ها) ترة هوة صحيح مرات البعيد عن العين بعيد عن الكلب بس بعيد ورتاح أحسن من قريب ومتبهدل... مو لو مو مو؟

وأعتذر لأن وغفت هواية ويمكن صدك راح احتاج هذا السفن..

layal said...

ميشو
لازم تقولين لي شنو مكونات هذا الطبق مال خلطت المايونيز
شكله عجيب
وجان علي الاذان احنا منزمان نسمع اذانا احنا السنه وبعد ربع او عشر دقايق يأذن اذان الشيعه تعودنا
ودايم نعيد قبلهم بيوم
هذي الامور تهون لكن اهم شي اللي بالقلب يهون والناس تعرف انه ما لها الا بعضها
ربنا يكون بعونكم

Michomeme said...

اناركــــــــي...هلووو..رمضان كريم عليك وان شاء الله صيام مقبول..
والله كمتوا تكتبون عربي..
هعهعهعهعهععهعهعهع

بس اني حبابة، جان خليت شروط من البداية للي يريد يكتب تعليق بالبلوك ان يكتب بالعربي فقط...بس اني ما سويتها لان اعرفكم ثقافتكم اوروبية...
نيااااااااههاهاها


اناركي..لعد لا تفوتون للبلوك وانتوا صيام..خاف اخلي صور اكل بعد..بس والله جان طيب...اني جعت..عاااااا



شعجب ماكو مسحراتي يمكم؟؟ تصورت المسحراتي موجود وبكل مكان ما عدا بالعراق ممكن ما نلكاه ونسمع صوته لان الوقت بالليل يكون خطر...على اساس بالنهار ابد مو خطر..
اتصور راح اسويها واسجل صوت المسحراتي وادزه لحيحو مو احسن؟...

راح اوصي لايون كنك يسجل صوته لان المسحراتي يفوت من يم بيتهم... :)


شكرا على كلامك الحلو اناركي، اكيد من نعرف بشخص نحبه..بعيد بس مرتاح ودة يحقق طموحه..ف احنة هم نفرحله هواية..
ومو كل واحد بعيد عن العين بعيد عن القلب..لان لكل قاعدة شواذ..


take care, see U inshallah

Michomeme said...

ليال..الج وحشة وينج؟
رمضان كريم..وان شاء الله صيام مقبول

خلطة المايونيز عبارة عن (بطاطا مسلوقة ومقطعة مكعبات صغيرة، بزاليا، مايونيز، زعتز) جربيها ان شاء الله تعجبج...تكدرين تضيفين الجزر المسلوق

بالعافية مقدما

ويا رب تهووووون على الجميع والله يصبرنا

tweety said...

الله يصبركم ويعدل الاوضاع
ترى حتى انا عجبني الطبق شكلي بسويه
:)

Marshmallow26 said...

هلو ميشو

اني هم أخذني الوهس و راح أكتب بالعربي...أحلى شي لهجتنا العراقية محد يكدر يقلدها لان المصطلحات مالتها يومية يسوولها اب ديت....هههههههه

أحلى شي عجبني بكلامج انو دتظربين السياسيين بعرض الحايط: دطيروا...هههههههه كلش حلو.
عيني ميشو ديري بالج على نفسج و لا بس تتسحرين عالسلطات و السفن ترى هاي الاشياء تسبب اظطراب بالمعدة...يلا باي

Morbid Smile said...

اي و الله سجلوا صوت (ابو طبيله) و دزولياه حبابييييييين

:)

راح انتظر !! نياااا

Bassam Sebti said...

الله!!!! ابو الطبل اللي بمنطقتنا. و الله هواية مشتاق لهذا الصوت. السحور يذكرني بايام كلش حلوة وية اهلي خصوصا من كانت اختي يمنا قبل متتزوج. و الله الاهل و خصوصا الام و الاب ميتعوضون

موربيدو اني هم مثلج مشتاق لرمضان. هنا يا رمضان يا بطيخ محد بحالة

اما يا ميشو يا وردة, فانتي كتاباتك تخبل. و الله مو مجاملة. اصلا متت على السخرية اللي بالبوست على الجوامع. اذا هية صايرة بالعناد شتتوقعين بعد؟ مو

المهم انه انتي الان بحالة نفسية احسن و لو اني مثل الاطرش بالزفة. مادري علويش كنتي ضايجة. يالله شنسوي نعبرهة. المهم انتي بخير...

سلامي للجميع

Michomeme said...

تويتي
الله يسمع منج وبالعافية على الطبق..جربتيه لو لا؟؟





marshmallow26
اهلا بيج، رمضان كريم، طبعا هي مو حرية مثل ما يكولون؟؟ لعد براحتكم ظربوا الدنيا كلها عرض الحايط والله احسن، لعد شلون نطلع حركة قلوبنا...دخلي يطيرون...هعهعهعهعهع
واحاول ان ما اتسحر بس سلطات واكل زين...






موربيدو...تذكرتج البارحة سمعت صوت المسحراتي، بس من ركزت كلش بالصوت، طلع انفجارات بعيدة
عهعهعهعهعع





treasure of baghdad
يا اهلا بيك ورمضان كريم، لحظة!! ترة منطقتكم منطقتنا، ابو الطبل ماكو بس هل علينا كم يوم واختفى...وين؟ محد يدري...هسة يطلع على العيدحتى يجمع عيدية من الناس....خوش خطة..


ايام رمضان الحلوة راحت مو نفسها اللي تتذكرها بأيام الخير، صح لمة الاهل وشوفتهم ما تتعوض، بس هم تحس بينا غصة بقلب كل واحد بينا على الوضع اللي يصير...فأدعي لآهلك ان حفظهم الله ويخليهم الك وتشوفهم بخير ان شاء الله، وترجعون كلكم للعراق..بس لمن يكون العراق أمن للكل...ادعيلنا كلنا...الله يستجيب دعائك ان شاء الله..


شكرا على كلامك وتواصلك، والضوجة مثل ما تجي اكيد تروح، بس هي حالات نفسية بسبب الظروف...وراحت..

هم تتذكر لمة الكروب بعمان؟ شكد تونسنا
oh, good old days

سلامي...

Omar Fekeiki said...

يبوووووو
هم راح تخلوني اتذكر هاي السوالف.. تعرفون اني شنواللي اشتاقيتله والصورة ماال ميشو خلتني اتحسر عليه؟؟ السفن اللي مكتوب بالعربي!! والله مشتاق اشرب بهاي العلبة والله
الله رمضان وابوالطبل والسحور والخريط هذا كله شلون ايام حلوة
موربيدو... شخبارج؟ اشو لاخبر لاجفيه لاحامظ حلو لاشربت؟
بسبس .... راح اموت اريد دولمه
ميشو... احلى ايام العمر جانت بالكليه.. تونسي واظحكي ولتزعلين اي شخص عليج لان بعدين راح تتذكريهم وتكولين ياريت اللي جرى ما كان.. والله احلى الايام هية المرحله الرابعه.... الف عافيه
فييه
عمر

Morbid Smile said...

باركولي اليوم اشتريت موبايل
:)

عمر ليش ذكرتني بالدولمه ؟؟؟؟ هاي وين راح نشوفهه و ناكلهه هنا!!!؟؟؟

و الله اني موجوده بس مديصير عندي وكت اكتب بوست جديد, صارلي شهر هنا و لحد الان كلش مخبوصه :(
و هسه يله عرفت شنو الخلل هنا .. ماكو شي مكتوب بالعربي...

يله محد سجل صوت او الطبل؟؟

LionKing said...

عل خير موربيدو عل موبايل اني فرحت الك كلش كلش لان تدرين مجال شغلي اني بالموبايل ... زين تقصدين اشتريتي موبايل لو خط موبايل !! بس على الخير اذا على الاثنين ... البارحة جنت سهران وسمعت صوت ابو الطبل وحضرت التلفون علمود اسجلة تالي اشو الصوت بدة يقترب تالي يمكن شافني اشو هذا من راس الفرع وفلت يمكن كال راح اروح بيها !! بس الجايات هواية .. وبعدة رمضان ماخلص وين تطير يامسحراتي الزمك الزمك !!

Michomeme said...

هلو عمر شلونك؟ ان شاء الله بخير، رمضان كريم، لو بيدي ادزلكم دولمة، لان اختي تحب الدولمة بشكل مو طبيعي...شوفوا اني راح ادزلكم جدر جبير، ويوصللكم هناك مدري وين وانتوا تعاركوا عليه اوكي..

هعهعهعهعهع

الا نسوي دولمة واخلي صوره بالبلوك..
نيااا

اكيد مشتاقين انتوا لاجواء رمضان واللمة وية الاهل على الفطور بس ميخالف تعرفون الوضع شلونه هنا..فخليكم بعيدين..

عمر..منو بسبس؟ tresure of baghdad?

اني الحمدلله تونست بالكلية وتعرفت على هواية ناس صداقتي بيهم حلوة كلش وما زعلت اي احد عليه، صح راح تنتهي السنين هذي ومقهورة بس الاهم نترك ذكرى حلوة بداخل كل شخص نعرفه، ادعولي اكو دوام حبابين ترة ميصير ماكو دوام هاي اخر سنة الي..


بس اريد اعرف شنو قصة ال"فييه" الي تكتبها بنهاية كل بوست؟؟؟








سوسو..فوسو..موربيدو..مبروك الموبايل الطاك!! اصلا كلش طاك..هعهعهعهعهعهع...عود سويلي مس كولات....مس كولات لو حامض حلو..!؟؟

شلون ادزلج دولمة فهميني؟؟؟






يمعود لايون هذاابو الطبل يجوز بعد ما يفوت من فرعكم عباله واحد ينتظره!! تدري احسن شي اجيب جدر واطبل عليه واسجل الصوت......هعهعهعهع
اكولك محد يدري شنوقصة الهعهعهع



يلة سلمولي على الما شفناهم !

ahmed said...

يا ولد....

روحوا لبيت عمي بشيكاغو بولز....وداعتكم كل شي من الدولمة للفلافل موجودات....

Michomeme said...

confused kid

هيه هيه، انطي خبر لبيت عمك لان راح يصير عليهم هجوم مو طبيعي على الاكل البغدادي...

Morbid Smile said...

Kid,

بس الولد يروحون؟؟؟ اني هم اريد دولمه :D

Eve said...

كيفك يا ميشو؟ رمضان كريم عليك. انتبهي من الأكل اللي يسبب عسر هضم ;)

انشاالله كل شي رايق عندكم؟ على فكرة، الرسومات اللي في مدونتك حلوة كتير. شغلك؟

Michomeme said...

مرحبا ايف...نورتينا، رمضان كريم عالجميع..

الرسومات اللي بمدونتي، شغلي
عجبوك؟

Eve said...

to7fa :)

Bassam Sebti said...
This comment has been removed by a blog administrator.
Bassam Sebti said...

Hi Micho,
I need to email you someting important. This is my email :

baghdadtreasure@gmail.com