Friday, October 13, 2006

نق نق نقانق...يا عروسة !!!

بما انو ماكو طلعة لا منا ولا منا..
بما انو ماكو كلية ولا شغل ولا علاقات اجتماعية وزيارات مثل قبل
بما انو الوضع ما يساعد على كلشي..
بما انو النت هسة اجة اريد اكتب اي شي عالبلوك لان صارلي هواية ما كاتبة
ولو، صارلي شكد امخمخ بفد بوست جديد بس ما ادري على شنو احجي، مرات احس كومة مواضيع ببالي بس اكول، لا، مو وكتها، اريد احجي عن الغربة!! اريد احجي عن الاشتياق!! اريد احجي عن الوضع!! اريد احجي عن رمضان، اريد احجي عن المسلسلات الي دا اشوفها ولو ما متابعة هواية مسلسلات مثل كل سنة، اريد احجي عن الليلتين اللي فاتت عليه وقضيتها ببكاء لا ارادي، والسبب "لا شيء والحمدلله" بس هيجي مجرد احساس، مدري اشتياق، مدري ضوجة، مدري اني صايرة حساسة زيادة عن اللزوم، ماكو شي يخليني التهي واشغل تفكيري عن اشياء تزعجبني "طبعا الاشياء الي تزعجني هي الوضع مو اكثر" ادري كتبت كلمة وضع اكثر من مرة، الوضع الامني وما ادراك ما الوضع الامني، المهم، احلى وقت اكتشفته، بالليل وهدووووء تام وهمس صوتي واني ادعي من ربي ان يرحمنا كلنا، ويشيل عنا الغمة وعن وطننا، ويخليلي اهلي ووحبابيبي بكل مكان، ويبعد عنهم الشر، ويبعد عنهم ولد الحرام، اصلي وادعي ودموعي تنزل، احلى دموع، اني وادعي لربي، ويا الله استجب دعائي،ارحمنا جميعا واحفظنا جميعا وابعد عنا الشر وارزقنا براحة البال والسلام والراحة.
صارلي يومين حالتي النفسية شوية مو زينة، مو لسبب معين بس هو الروتين و"الوضع الامني" بس هسة الحمدلله زينة وبديت بمرحلة التغليس واللي مكتوب عالجبين لازم تشوفه العين والحمدلله والشكر على كلشي، طبعا جنت كاتبة بوست فرغت كل اعصابي بي، طلعت القهر كله على كولتهم، بس بما انو الكل ضايجين، وما اريد اشغل بال موربيدو علينا، وبما انو فد نا س كالوا هم الوضع؟ مو الوضع سييسنا، خلانا نحجي بالسياسة، ف بطلت، وكلت ماكو داعي، اني هم ما اريد اضوج احد"
ارجع على شنو ردت احجي، او بالاحرى ردت اكتب عن افلام الكارتون قديما وحديثا، جنا نتفرج احلى قصص، منها حكايات عالمية وتطلع الراوية تكول ببداية كل قصة "حكاية من التراث الفرنسي...حكاية من التراث الاغريقي..الخ" اكيد الكل يتذكره، اغنية المقدمة جانت..
من كل بلاد الدنيا، من كل بقاع الارض
قصص شتى، تروى حتى
نعرف اخبار الانسان والكل هنا جيران
فأذا زرناهم بالصورة في احلى دنيا مسحورة
كي نتسلى، صرنا احلى..
او في قصص الشعوب..في قصص الشعوب،
طرائف لا تنتهي وعالم خير بهي
يسكن في قلوب، في قصص الشعوب..
وجان اكو كارتون نليز، وصديقه رات ومورتون،وكارتون بومبو،"خرجت بومبو من بيضتها"، وكارتون النسر الذهبي، الاحلام الذهبية وابطال القصة "مندوزا واستيفان، وتاوتاو بس نسيت اسم البنية الي وياهم" وكارتون كاليميرو، مازنجر، خماسي، كريندايزر "انطلق" ..سالي الخدامة، اليس، سالي في بلاد العجائب واصدقائها الحطاب والفزاعة وتوتو والليث، وزوزو الكبير، وجان كل يوم جمعة يطلع افلام كارتون التنين الصغير "كريسو" هاي شنو، والله ايام، وبشار مدري نحول، وعقلة الاصبح، وحكيم الاقزام، اكو فد كارتون ابطاله ضفادع، تتزوج الضفدعة يغنولها " نق نق نقانق يا عروسة" هيه هيه هيه...بعد وبعد جانت كلها قصص حلوة..تذكرت فيردي وصديقته جيني، وصديقة المتهور كلما يريد يسوي شي يكوله " لا تتهور يا متهور!" وكارتون دباديبو الموسيقار بس جان مثل مسرح الدمى مال مس بكي وكيرميت، وكارتون ريمي، والبجعات المتوحشات وسيندريلا والاميرة النائمة، وسنو وايت..عفية الي يتذكر بعد افلام كارتون خلي يذكرنا بيها، اني وموربيدو حافظين حتى السيناريو مال كم فلم، خاصة البجعات المتوحشات، هاي البنية اللي ابوها يتزوج بعد ما امها تموت، وتطلع زوجة ابوها ساحرة وتضوج منها ومن اخوتها وتحولها الى بنية قبيحة وتحول الاخوان الى بجعات، ومن يلتقون الاخوة سوا من بعد فراق تكوللهم، "مرحبا يا اخوتي، بيتر، عزيزي بيتر، صباح الخير يا اليزا، عجلوا يا اخوتي، الريح تعصف والصخرة بعيدة" هعهعهعهع...تتذكريها موربيدو...بس الكارثة من وين بدت،؟؟ من كارتون عدنان ولينا، ما ادري ليش ما احب هذا الكارتون ولا اتحمل اشوفه، مع العلم هواية كلش يحبوه، بس من بعده تغيرت كل افلام الكارتون وكل القصص والهدف منها، جنا نتعلم هواية اشياء من الكارتون وبيها اهداف حلوة، نتعلم شلون نحافظ على الصداقة، شلون اذا نغلط بتصرف واهلنا يعاقوبنا عليه حتى ما نكررها، كله من خلال الكارتون، بس هسة ماكو بس..ابطال الدجتال، المحقق كونان، اكاديمية الشرطة، والبوكيمون" نحن نحب كل اطفال العالم ونزرع الورد في كل مكان،....مدري شنو بعد...وراها يكولون...انظمو انظموا...عبالك منظمة ارهابية ويريدون يسوون دعاية عليها...والله كلشي تغير وما بقى على حاله حتى الاطفال، الله يستر من الاجيال الجاية وتفكيرهم حتى من اتعامل وياهم اتفاجا بتصرفاتهم، بس يلة، نعيش ونشوف..

8 comments:

Treasure of Baghdad said...
This comment has been removed by a blog administrator.
Treasure of Baghdad said...

ما اعرف بيش ابدي؟ ما ادري اواسيج و اواسي حالي؟ مادري اشجعج و اني اريد واحد يشعجني بهالغربة ... ما ادري و الله محتار

بس تدرين ؟ احسن شي سويتي انه كتبتي عالكارتون. الحمد لله انه احنا كلنا شايفين هالكارتونات اللي ذكرتيهة. اني اتذكر اول واحد جانت اصالة تغني المقدمة اللي كتبتيهة. اما بومبو فقصتهة قصة. هههههه جان ابن خالي ميكول "من بيضتها" ههههه جان يكول "خرجت بومبو من بطن امهة"

ههههههه

اما احلى شي بعدنان ولينا لمن عدنان يمشي على اصبع واحد على الحافة مال الباخرة و لينا تصيح "عدنااااااااااان" و عدنان يصيح "ليناااااااااااااااا" ههههه

يالله صار فايت وكت و هسة ساعة وحدة ونص يمي اروح انام احسنلي.. ماوصيج ديريبالج على نفسج. باااااي

layal said...

ميشو شلونج ؟؟
الله يطمن قلبك ويبعد الدمعه عن عيونك
الكارتون شنو اقول لج
ذكرتيني بهذي الاغنيه مالت قصص عالميه
كانت وايد حلوه
عندج
نبيه وصالح وحسون الملعون
فلونه-يا احلي ورده
توم سوير -حياتنا مسرة
عقله الاصبع -ما كنت احبه وايد
مخلص صديق الحيوان -قصصه كلها كأيبه
وما انسى البرنامج العراقي اللي كانوا يحطونه
مدينة القواعد - تعرفينه ؟؟
وكان في قصص عالميه مدة كل وحده منهم ساعه منها البجعه المسحوره وعلي بابا والاربعين حرامي -وتارو الولد التنين
كان الراوي للقصص عراقي
اذكر انه طريقة اللقائه كانت وايد قويه
تره دايم عندنا فكره ان العراقيين بارعين في الالقاء والنحو
وله شرايك يا ميشو ؟؟

LionKing said...

هذا بوست عن الكارتون لو على دموعك الغالية لو عن الوضع لو الكل صار مكس والناتج طلع افلام كارتون !!
اذا على الدموع ف الكل محتاج ان ينزل دموعة بس بالوقت المناسب مو باي وقت وترة لاتتصورين الشخص اللي يمر بضروف صعبة هوة الشخص الوحيد اللي يحتاج ان يفرغ دموعة لان الكل محتاج في وقت من الاوقات بان يتحدث وية شخص او يختلي بنفسة ويطلق العنان لنفسة ويزل دموعة بس ارجع واكول مو باي وقت ومو لاي أحد ولا كدام اي احد .. خلي دموعنا تنزل وتغسل همومنا وماتخلينا نعود لنفس الاحساس هذا المزعج والمتعب بنفس الوقت وخلي دائما نتذكر كل من هوه قريب علينا ويضحك النا من نشوف الدنيا ضدنا ويبكي ويانة من نحس احتياجنا لكتف يحتضنا ونبكي علية .. مااريد احجي هواية بطاري الدموع لان راح تصير مناحة فلا دموع بعد اليوم !! اما تحويلتك على الكارتون واغاني الكارتون رجعت بية الوقت الى افلام مو على البال ومن ذكرتيها بديت اتذكرها واتذكر الاقوال المشهورة اللي بيها .. بالفعل افلام الكارتون تربينا وياها وخاصة من جانت على التلفزيون العراقي وعلى القناتين فقط !! جانت الها حلاوة الايام اللي راحت ..
اهتماماتنا بافلام الكارتون جانت كلش هواية وجان الوقت اللي نتفرج بي افلام الكارتون لو الصبح ايام العطل الصيفية والربيعية او وقت مابعد الظهر من نرجع من دوام المدرسة او جان اكو وقت العصر هم يطلع كارتون بس ماادري شعجب مجان اكو فلم السهرة كارتون يعني شنو اللي راح يصير لو يصير افلام الكارتون بال 12 يجوز علمود لايسهرون الجهال مو بلله ؟؟ والله وجهة نظر ذكية اني اشوفها !! كمت احشش واني وياهم بهاي النقطة !!
يلله خلونا كلننا وبصوت واحد جهوري نكول (( نق نق نقانق ... ياميشو ))

Marshmallow26 said...

هلو ميشو
انشاء الله هسة انتي احسن
...
كان أكو كارتون اسمة كوالا و الأغنية مالتة تكول: انا انا كوالا انا سعيد جدا....احب كذا لعبة لعبة خشبية طابع جميل...لا ليس هذا لا و لا هذا.. انت انت الجميا انت انت المثير ....لااا نسيت.

نسيتي كارتون بربا الشاطر؟؟

Michomeme said...

treasure of baghdad

خلونا واحد يواسي الثاني على الغربة، وواحد يشجع الثاني على الوضع، مرات ما نكدر لازم نحجي اللي بداخلنا بس المن تحجي والي داير مدايرك يمرون بالموقف نفسه ؟؟ ماكو غير البلوك
:)

عدنان وولينا وصديقهم عبسي...جنت اسمي ابن جوارينا عبسي :)...هو يشبه عبسي

وخرجت بومبو من بيضتها ...والله جنا صغار ويقشمرون علينا بالاغاني ..ههههه

******
******


ليال...نورتي...شلونج؟
اكيد اعرف برنامج مدينة القواعد، اكو هواية افلام كارتون والراوي او المتحدث بصوته عراقي ..مثل القصص القديمة الروسية الاصل، البجعات المتوحشات وبينوكيو، وبحيرة البجع من اشهرهم، اصوات ممثلين عراقيين معروفين جدا، احلى شي ببحيرة البجع السناجب..مركريتا وهانكس...هههههه...

اما الامير سيكفريت، واوديت..وبنت الساحر اوديل..بس مدا اتذكر اسم الساحر..


ورأيي من رأيك يا ليال.. :)


******
******
لايون كنك، هذا بوست منوع :) !! تعرفني دائما اطفر واغير بالمواضيع فجأه فهاي مو جديدة عليه :) .

وان شاء الله لا دموع بعد اليوم..
تسلم على كلامك الرائع..

اني من جنت ارجع من المدرسة اشوف كارتون ويني الدبدوب.. :) نموووووووور
وحوار ومحدش وفجلة... هاهاهاها
وجنت احب برنامج سينما الاطفال يطلع كل يوم خميس على القناة الاولى يطلعون فلم كارتوني او فلم عادي المهم جانت قصص حلوة وظليت لفترة طويلة متابعته..ولو اكو بعد سينما الاطفال جان شفته بس ماكو...وكارتوم مروكو هم حلوة...
مروكو مروكو اسمي مروكو الصغيرة اهلا بكم يا اصدقاء..قصصي يا اطفال مثيرة وبكم يحلو اللقاء.. :)...


*****
*****

marshmallow26
هلوووو شلونج؟؟ ان شاء الله زينة..
اكيد اتذكر باربا الشاطر اعظم ساحر..
صدك..نسيت اكتب السنافر :)...هذولي شخصيات مهمة ترة..

بس للاسف مدا اتذكر كارتون الكوالا..دا اتذكر الكوالا الي وية جورجي...طبعا هم نسيت اكتب جورجي وساندي بيل ولين وليدي ليدي ...عاااااااااا

chikitita said...

آني هم ما أحب عدنان ولينا كله مي وشغلات تعبانة.
مو جنج نسيتي ساندي بيل وليدي ليدي وسنان ودوبا من عائلة لطيفة وجورجي ولوسي؟؟؟؟

آني صح صار عمري 27 سنة بس هسه ما عندي مانع اتفرج اذا تطلع هاي الشغلات كلها.

Anonymous said...

اخوتي العراقيين الاصلاء انا دا ادور على افلام كارتون البجعات المتوحشات الروسي الرررررررررررائع والذي تمت دبلجته في روسيا ايضا دا ادور على فلم الكارتون الروسي الاخر من منكم يتذكرو اسمو تفاحة الصبا القصة كلها تدور حول تفاحة تجلب الشباب يدور عليها شاب نبيل ايضا يدور عليها اثنين اشرار كل يحاول الوصول اليها اولا لكسب تأييد الرجل العجوز الذي يبحث عنها فلم كارتوني رائع اللي تتوفر عندوا هذين الكارتونيين اني مستعد اشتريهم علما انو اني من الموصل وهذا ايميلي melad_sobhi@yahoo.com
تحياتي اخوكم ميلاد صبحي من الموصل