ايــــه شبسرعة خلص رمضان؟؟ مر بلمح البصر بأيامه والاحداث اللي صارت بيها، اذا جانت احداث عامة مثل الوضع الامني او احداث شخصية، الف الحمدلله على كلشي، باجر عيد ان شاء الله، احب اهني الكل واكوللكم كل عام وانتوا بألف خير وان شاء الله ينعاد علينا جميعا بالخير والبركة والامان والسلام والراحة، والله يتقبل منا ومنكم صيامنا برمضان ودعائنا. طبعا الكل يعرف والي ما عنده فكرة راح يعرف هسة، كل العراق وبدون استثناء ما حاس بطعم العيد الحقيقي، العيد صار واجب، يجينا ويروح بدون اي نشاطات اجتماعية وزيارات للاهل والاقارب والاصدقاء، كل هذا صار شي من الماضي، اني متأكدة اكثر العراقيين كاعدين ببيوتهم وما يكدرون يزورون اي احد، ويدعون من الله يعدي كل الايام الجاية على خير وسلامة عالجميع.
طبعا ماكو بوست جديد ولا موضوع جديد بس ردت انطيكم خبر انو اني سويت بلوك جديد راح يكون هذا البلوك خاص باللغة الفرنسية او الانكليزية فقط..لا غير!!...اكتب بي اما قصائد، كلمات اغاني..منقولة يعني، او جمل واقوال تعجبني، نكتة او حزورة بالفرنسي او اي موضوع ثاني باللغتين ...فأذا تحبون تشوفون شكو ماكو واللي يحب يكتب ويشارك بشي باللغتين الفرنسية والانكليزية واللنك تبعو...
ملاحظة: جان عنوان البلوك هذا.
بس تغير وصار:
يعني العنوان الاول حذفته، وبالمناسبة البلوك الاصلي مالتي باقي وما راح ينحذف وراح استمر بالكتابة بي
لان بصراحة بديت انسى اللغتين، وخاصة الانكليزي، بسبب عدم الممارسة، واني مشكلتي افهم اذا اقرا او اسمع بس دة اشوف بصعوبة اكتب او احجي بيه فبالممارسة اكدر استرجع المعلومات الي فقدتها..
يلة عاد...شجعوني...
وكل عام وانتوا بالف خير...
7 comments:
still, happy eid. will go check michomeme1 now..
congrats.. practice makes perfect!
salam to all.
هاي اناركي، عيد سعيد وكل عام وانت بخير، ان شاء الله تحقيق الاماني...
بس صار خلل واضطريت اغير عنوان البلوك الجديد
ف" ســوري جـــدا" لان الكومنت الي
كتبته انحذف لمن حذفت البلوك
michomeme!
:)
Hello MICHO,
Happt Eid, and may all your wishes come true including our wishes about Iraq.
BTW, I tried to open both sites of your new blogs, but it gives me the page 404 page can't be found?
Why is that??
على العموم انشاء لله تنجمعون انتي و موربيدو سوى مرة اللخ
و الله يحفظ الجميع
كل عام وانتي بخير
وعيدج مبارك
تمنياتي لكم بالسعادة والأمان والخير
دمتم بفرح
قلوبنا ودعواتنا معكم
كل عام و انت بخير ميشو. و اني مثلج همين لمن الناس تكول عيد سعيد, اني اكول سعيد منو؟ سعيد مات وية اللي ماتو. يالله تهون
مارشمالو: كل عام وانتي بالف خير وان شاء الله عيد سعيد عالجميع ويحقق كل امنياتج وتنقبلين بالفلبرايت وتلحكين موربيدو :)
اني صلحت اللنك لان مجنت كاتبته صح فجربي وادخلي مرة ثانية ..وانطيني رأيج..:)
تويتي: عيد سعيد عليج يا رب وان شاء الله الموفقية للجميــــــــــــع
وشكرا لدعواتج الحلوة..
treasure of baghdad
يعني انت تعرف سعيد لو متعرفه؟؟ بس لازم نعرف منو هذا سعيد؟؟اذا مات وية الي ماتوا ف الله يرحمه واذا بعده عايش فخلي يجي...وين يجي؟ :) كمت اخربط اني بالحجي ...عالعموم عيد سعيد عليك وكل عام وانت بالف خير وان شاء الموفقية الدائمة والنجاح وتنجمع وية اهلك وناسك واصدقائك بعد رجوعك بالسلامة وية الشهادة الكبيرة..ويكون الوضع احسن والامان موجود...
كولوا آميــــــــــــن
Excuse me, عيد سعيد وكل عام وانت بخير I would like to ask what does these mean??
hope someone can answer...thanks
Post a Comment