Sunday, October 29, 2006

ســـوالف عالماشي !!


واخير الجو صار حلو ببغداد، صح مطر بين فترة وفترة بس قليل، والسما مغيمة، والليل طويل، بس اهم شي الحر ماكو اختفى، من صار الجو حلو هيجي تذكرت السفرة لحدائق الملك حسين بعمان بشهر الثامن 8\8\2006 وية مجموعة البلوكرز العراقيين، وجان الجو حلو وكاعدين نغني وصوت الكيتار والضحك، والناس يتمشون ويشوفون مجموعتنا، حسيت بغرور، كل مجموعتنا حست بغرور او فخر انو احنة عراقيين وبعمان ومجموعين كلنا سوا ومتونسين كلش، بس ظلت حسرة بقلوبنا، نتذكر الجو بالعراق، الحر والناس شلون تعاني، تذكرنا الكهرباء وشنو يصير بينا من تطفى بعز الحر، تذكرنا اصدقائنا الي تمنينا وجودهم ويانا...انتوا هم تتذكرون هاي السفرة وتشتاقون
لآجوائها مثلي؟؟ شكد تمنيت هيجي لمة حلوة وونسة تتكرر هنا وية كروبي ولمة شبابية حلوة واجواء هادئة وامان، بس ما تكررت ..
يلة، ايام وذكريات حلوة، وامنيات نتمنى نحققها، اخباري مثل ما اهي بعدني انتظر اداوم واروح للكلية، بعدني كل يوم قبل ما انام اتذكر المرحلة الاولى واللي بيها، اتذكر ونسة المرحلة الثانية، اتذكر الثقة والصداقة الحلوة، اتذكر اجواؤ الصبح من اكعد واتحضر للكلية، الاغاني، نادي الكلية، المحاظرات، الاساتذة، الساعات الي نكضيها نتمشى، ندرس، ناخذ صور، نضحك، نبجي، لو المرحلة الثالثة؟؟ تجنن اروع مرحلة، كلشي جان مختلف بيها من اول يوم الى اخر يوم، بمحاظراتها، وباحداثها حتى لو جانت بعض الاحداث مو حلوة وتقهر بسبب الوضع الامني، اتذكر ايام الشتا؟ ايام المطر؟ ايام الصيف؟ ايــــــــام اتمنى تتكرر واعيشها مو مرة ثانية وبس..اتمنى اعيشها مليون مرة، تبقى ببالي اكثر، واتهنى بثوانيها اكثر.. آآآآه شلون ايام،؟ هم تنعاد؟؟ هم اكدر اتخرج هاي السنة وية مجموعتي؟؟ ...ايفان، علياء، نور، رفاه، راح اشوفهم هاي السنة؟؟ اتمنى الكل يكدرون يداومون حتى نتخرج ، المفروض الاسبوع الجاي نروح للكلية، لو يكون بي امل ان نداوم ونستمر بس بفترات متباعدة، او بجوز بعد ما نوصل للكلية ابدا...والله اعلم...
هذا الرسم الموجود اني رسمته قبل يومين، جنت بغرفتي والكهرباء مطفية ف على ضوء "اللالة" ورسمته، جنت اسمع اغاني هيثم يوسف على الراديو، رمستها، ومعرفت شنو تمثل..ولا شنو المغزى منها، شنو رايكم لو كل اللي يشوفها ينطيني اسم للصورة حسب الي يحسه بيها والي يشوفه من خلالها....انتظركم...؟!! شوفوني الحس الفني الي تملكوه !! :)

7 comments:

Bassam Sebti said...

اني حسيت انه الصورة تمثل شخصيتج. انسانة رقيقة و حساسة تحب الموسيقى و الفن

اما بالنسبة للسفرة, فكانت احلى سفرة طلعتهة

Morbid Smile said...

هي بنيه متنكره بمناسبه عيد هالويين

:D

السفره جانت اروع سفره شفتهه بحياتي و ان شاء الله تتكرر بس من كلنه نرجع لبغداد .. أما ايام الكليه فماكو مثلهه أيام, و الله جانت حلوة و اني بالنسبه الي كلش تونست بيهه و لو جنت ماخذتهه شويه جد يعني متمشيت هوايه بالشارع مال الكليه مثلج انتي و صديقاتج.. تعرفين جماعتي شلون جانو .. هعهعهعهعهع

Michomeme said...

treasure of baghdad:
شكرا على كلامك..
اممممممم، يجوز تشبهني، لان اني احب الموسيقى والفن....و:)....
ان شاء الله السفرة تتكرر، ونفس المجموعة، واكثر، ومكان احلى، وامان، وراحة وونسة..



موربيدو:الظاهر انتي متأثرة بعيد هالوين...اكولج بالمناسبة اشو انتي من جنت ببغداد ما جنتي تكتبيلي كومنتس!!! بس هسة لا مستمرة ومتواصلة بشكل كلش حلو....شكد احبج..
واذا على ايام الكلية اكيد اتذكر، وبصراحة كلكم جنتوا ماخذيها جديات ...واتذكر خانة الشواذي !!!
هعهعهعهعهع
صدك شخبار صديقاتج؟؟ شفت الفديو مال سفرة الشمال وتذكرت نيلز..شنو اخبارها؟؟

A. Damluji said...

أسم الصورة
ميشو لابسة ألوان فاتحة

فعلا الصورة بيها شبه مادي ومعنوي

عاشت ايدج :D

take care little sister, salam to all.

ahmed said...

اكره المدح لانه يعبر الى التملق المزيف لامضاء العلاقات البشرية المسطحة في معظم الأحيان...لكنني لا اعتقد ان ذلك وارد هنا, هذه الصورة هيه انت فعلا معكوسة على ورقة في لحظة سكون روحي.

يعني باختصار فيكة.

Marshmallow26 said...

هلو ميشو

كوليلي متعبت عينج من الرسم على ضو اللالة؟
بس عفية عليج,
بعد شعندج رسومات؟

Michomeme said...

اناركي...ميشو لابسة الوان فاتحة؟ مممم...يمكن...ليش لا...



the kid
اشكرك على كلامك، اكيد اكو نوع من المدح هدفه التملق حتى الواحد يوصل لاهدافه، بس الي شفته وحسيته من كل الي يقرون مواضيعي والي يكتبون تعليق ما كان تملق وانما ابداء رأي خاص بيهم باللي اكتبه، الحمدلله انت واحد من الي حسيت بصدق الاحساس على مدونتي وتكدر تكتب الي يخطر ببالك وتعلق على اي شي، ويبقى رايك الخاص بدون ما احد يعتبره تملق او "لواكة" كلنا عراقيين، كلنا شباب، كلنا محتاجين لمكان نتواجد بي بس يكون التملق والكذب معدوم...وهذا الي شفته بكل مدوناتكم واكثر المدونات العربية او العراقية الي قريتها...

من صدك جانت لحظة سكون روحي لمن بديت ارسمها، وجنت اسمع اغاني هيثم يوسف
:)





مارش مالو..

بصراحة تعبت عيني ودخت ومكمت اشوف واحتريت، بس ردت الهي نفسي بأي شي لان مجان اكو كهرباء :) لو اكو كومبيوتر ونت يتشغل على النفط جان قضيت وقتي بي
:)

ان شاء الله الايام الجاية اخلي كل رسوماتي الي محتفظة بيها واحب تنطوني رأيكم ...