Wednesday, November 22, 2006

كنا في جرة وطلعنا ليبرة..

من بعد طوول انتظار، وملل، وفقدان امل واحساس ميؤوس منه، وذكريات تمر على بالي من ايام قضيتها بالكلية والوقت الي اقضيه بالمحاظرة وبالنادي والاغاني والطلاب والبرد والحر والسوالف والضحك، رجعت للكلية مرة ثانية لمن وصلت مرحلة صرت متأكدة انو السنة الاخيرة الي ما راح اكملها بالشكل المفروض اكمله لان الوضع الامني سيء جدا، واحتمالات السفر خارج العراق لوقت غير محدد كان شاغل بالي غصب عني لان رافضة فكرة السفر نهائيا، اكيد الكل هسة يكول اكو احد يرفض السفر ويبقى مسجون بالبيت طول الوقت ويقبل على الظروف والصعوبات الي يشوفها يوميا؟؟ اكول اني اريد ابقى بالعراق وما احب اغير مكاني الي عشت بي وقضيت احلى ايام دراستي بالمدرسة والكلية وتعرفت على احسن واحلى ناس وكونت علاقات حلوة مستحيل اكدر اعوضها بيوم من الايام.
كعدت الصبح بيوم الاحد حتى اتحضر للدوام، وانتظرت السايق يجيني، وقبلها مسجات من الصبح واطمئنان من سوسو ومافيس وظليت طول الطريق اردد دعاء الحفظ من السوء الي وصلني من مافيس واعصابي مشدودة على طول الطريق الى ان وصلت للكلية، تعبت من الخوف والتوتر، والحمدلله وصلت بسلامة، جانت منطقة باب المعظم مختلفة مو مثل قبل بأيام الدوام، الشارع مزدحم وكله طلاب بس هسة تقريبا فارغ او اكدر اكول عدد الطلاب قليل، والشارع مرعب، وبغداد وضعها تعبان والخط السريع مسدود وكله سيطرات والناس شكلها تعبان ومنهكين نفسيا.
دخلت للكلية وشفت ايفا ونوني وباقي البنات، وانقضى الوكت الى ان اخذت محاظرة وحدة وانتهى الوقت بسرعة واتفقنا نداوم يومين بالاسبوع او اكثر، لكن مو الاسبوع كله ، ورجعت للبيت بعدها، واتفقنا نداوم ثاني يوم هم بس مجان اكو محاظرات لان الاساتذة ما رادوا يدرسونا بسبب عدد الطلاب لان قليل، بقينا كاعدين بالنادي ومنسجمين بالاغاني والاجواء، والتقيت بلايون كنك من بعد فترة طويلة، وجانت الكعدة حلوة كلش وانقضى اليوم بسرعة ما حسينا عليها ابد، مثل كل مرة سوالف وضحك وتحشيش وكلام حلو، وابتسامة على الكل، برغم كل الظروف التعبانة والطلقات الي جنا نسمعها والطريق المزعج الي لازم نمر بيه كل مرة، جان يوم مميز جدا...رجعلي ذكرياتي الحلوة بالسنة الي فاتت.
استغربت من التغييرات الي جرت على نوني من ناحية افكارها، تريد تكون اجتماعية اكثر وندمت لان كروبنا منطوي على نفسه ومجانت تحب تختلط بأحد، بس يا نوني بعديش؟ مو انكضت 3 سنين من عمرنا واحنة معقديها كلش، حتى اني اضطريت ان اكون مو اجتماعية مثل طبعي لفترة معينة بس بعدين مليت، وهسة انتوا كسرتوا القاعدة...اتمنى تكون هاي السنة الاخيرة والمميزة النا بالكلية، تمر بنجاح علينا، وبسلامةعلى الكل يا رب، وتكون بيها احلى ايام وذكريات تجمعنا سوا وبكل الي نحبهم بالكلية.
ما ادري ليش تصورت راح اكتب بوست اطول من هذا بس الكلام مدة يجي على بالي، دا احاول كل مرة اكتب موضوع بس ان شاء الله من الدوام يستقر وترجع الحياة الاجتماعية على وضعها الطبيعي اكدر اكتب شي جديد ومختلف..
من صدك جنت في جرة وطلعت لبرة، لان البيت صار عبارة عن سجن لكن جميل جدا، سجن بي كل لوازم الراحة والترفيه، من تلفزيون وكومبيوتر وانترنيت وموبايل ومطبخ وهول، يعني اقضي الوكت ما بين غرفتي والهول والمطبخ وما بين التليفون والانترنيت، وبقيت على هذا الحال لمدة خمس اشهر اذا مو اكثر، بس اليومين الي رحت بيهم للكلية حسيت اني انسانة طبيعية عندي التزام واطلع الصبح للكلية وادرس وعندي واجبات ، شكد حلو الواحد يكون عنده شي يسويه بحياته، مو عايش على لا شي بس ياكل وينام ويسمع اغاني، ..
ادعي من الله تعدي الايام الجاية على خير ويحفظ الجميع واتخرج هاي السنة على خير وسلامة..

8 comments:

Marshmallow26 said...

Hello Micho,

Inshallah you are going to graduate this year, and then travel to discover the world.

Just don't abandon your study, you are almost done dear.

Take care on your way to college :|

Morty said...

May God be with u and with all the innocent Iraqis, I know that the situation is beyond Imagination but what can I say u have to give it ur all and never give up, it might be hard but the harder it may get the better it will turn in the end so hang on.
Take care and may God bless and protect us all...

Morbid Smile said...

أكول ... منو مافيس؟؟ شو مدا اتذكر

و لو اني عايشه بالكليه هسه بس اضزج كل ما اروح للدرس و اتذكر انتي كاعده بالبيت و ما عندج دوام
:(
ان شاء الله يستقر الدوام و تتخرجين هاي السنه على خير و سلامه... بس منو راح يصور بيوم التخرج ؟؟؟
;)

layal said...

ضايقني هذا البوست
يمكن بسبب اللي ذكرتيه عن الجامعه واوضاع العراق بشكل سريع وعابر
وهذي الامور ما تبان علي التلفزيون كثر ما يقدر يخبرك فيها شخص عايش الوضع
معقوله الجامعه تكون خاليه من الطلبه ؟؟
بس وجود دكاتره للحين موجودين ويدرسون هذا امر يرفع الراس ويأكد انه في ناس يهمها غيرها وهمها مستقبل الشباب القادم
ميشو ودي لو تتكلمين عن جامعتك
الاوضاع قبل الحرب والحين

Bassam Sebti said...

الحمد لله على كل شي. ان شالله تعدي هالسنة سلامات و تتخرجين ونفرح بيج و نجيبلج مزيقة. لو تدرين شكد مشتاق لصوت المزيقة. بس و الله لاسويهة و اجيب مزيقة بامريكا هههههه.. تخيلي شراح يصير؟ الامريكان يتخبلون عبالهم عمل ارهابي. ههههههههه

Bassam Sebti said...

موربيدو وينج يمعودة؟ بس الله الجبير

Michomeme said...

MARSHMALLOW26
i hope i will graduate this year..and i realy don't wanna abandon my study...

alla kareem...allah 7afedh





kyubai..welcom here..thanx ,,God bless and protect us all...




موربيدو...مشتاقتلج مووووت
مافيس؟؟ عرفتي منو مافيس ..فما راح اكولج منو مافيس هنا!! :)
لا تنقهرين ترة كلشي بوكته حلو والحمدلله على كلشي بس اكولج سوسو انتي استغليتي فرصة وجودي بالكلية وصورتج بيوم حفلة التخرج بس هاي السنة اكو من يصورني..ااذا جان اكو حفلة...

واذا تحبين انتي تصوريني اني ما عندي مانع!!
:)






ليال..
اني جنت متضايقة من كتبت البوست ولا تتضايقين على شي، هذي الحياة بيها الحلو والمر ولازم نتقبل اي شي..
للاسف وضع الدراسة في المدارس والجامعات لا يبشر بأي خير او مستقبل لان الطلبة يخافون يروحون للمدارس والطلاب الجامعيين خطر عليهم بسبب الطرق ما بين المنازل للجامعات..بس الله الحافظ ما نتوقف ولا العمر يتوقف العمر يمشي بينا وحياتنا دة تنهد يوم بعد يوم وبعدنا متمسكين بخيط امل على وشك الانقطاع ...الله موجود..

ان شاء الله تصير فرصة واكتب بوست عن الجامعة ولو اني بدت حياتي الجامعية مباشرة بعد فترة الحرب فما عشت حياة الجامعة قبل الحرب، لكن راح اكتب بيوم من الايام..





tresure of baghdad..
عاااااااااااا مزيقة..جيبولي مزيقة بيوم حفلة التخرج ضروري ترة من صدك حتى اني مشتاقة لصوتها صارلي هواية ما سمعت صوت المزيقة بعرس او حفلة او اي شي يمعودين معلية الا احركه للجو بيوم التخرج....طبعا اذا اكو تخرج هاي السنة
بس اني دا اتخيل الي راح يصير بأمريكا من يسمعون المزيقة....يكومون يركصون للكاع ....هعهعهعهعهعهع




تحياتي للجميع

tweety said...

ميشو حبيبتي
قلبي معاج

الله يهدي الامور ويغير الحال للأفضل
وانشوفج خريجة قد الدنيا
ونشوف صور تخرجج ونفرح فيج
قولي آمين

تحياتي
دمت بأمان وبحفظ الله