Sunday, June 24, 2007

تخرجت!!!وخلصت الكلية

هااااااي
احب بالبداية اسلم عليكم كلكم، وعلى اختي موربيدو، لايونك كنك، اتاوي، مارشو، وكل الموجودين باللستة مال بلوكرز، وعلى ليال، وكل الاشخاص الي يدخلون للمدونة، والي يقروها ويكتبون كومنت، والي يقروها وما يهتمون، والي يدخلون وما يقرون شي، وسلام لكل الي ما اعرفهم همينة. خلصت امتحاناتي النهائية والاخيرة بحياتي ، لان تخرجت والكلية انتهت وراح اخذ شهادتي قريبا جدا، والله يوفق الجميع وهم ياخذون شهاداتهم، ما جنت اعرف احساس المتخرج شنو، مرة حزن ومرة فرح، حزن على فراك الي عرفتهم وجمعتني بيهم ذكريات كلش حلوة من الو يوم داومت بي بالكلية ولحد الان، صديقاتي الاربعة، ايف، علوش، نوني، ويوني الي ما كدرت تكمل ويانة وسافرت لسوريا بسبب الظروف، وعلى امل ان التقي بيها قريبا ان شاء الله، وحزن، لان الحياة الجامعية انتهت، شي حلو ومجتمع مصغر عن عالمنا الخارجي نلكه بي مختلف الشخصيات، الغريب، الطموح، الاجتماعيين والمنعزلين ، وهواية شخصيات ما توقعنا ان تكون حتى على ارض الواقع، حتى الاساتذة اكو شخصياتهم غريبة ، واحساس بالفرح، لان حلو ان امر بمرحلة تعليمية من حياتي وتنتهي، وانتظر ان امر بالمرحلة الي بعدها، وابقى اجتاز مراحل ومراحل الى ما لا نهاية، لان كل يومية نتعلم شي من حياتنا هذي، سواء الي يخص الدراسة والثقافة، او الي يخص التجارب الشخصية الي تعلمنا شلون نختار الناس الصح الي يعرفونا ويقدرون صداقتنا، تعلمت شلون ما اعامل الناس بالمثل، وابقى على مبادئ الي امشي عليها بدون ما اغيرها علمود اي شخص، اسوي الي يعجبني مدام الشي الي اسوي ما يأذي احد ولا يأذيني، تعلمت شلون ما احكم على البشر بسرعة، ولو هذي صفة بية بس كدرت اتغلب عليها، وتعلمت هواية اشياء ما ممكن اعددها هسة.
الحمدلله تعديت مرحلة من حياتي وبنجاح، واني راضية عن نفسي، بس حسيت بنفسي كبرت، مو حلو لمن الواحد يكبر، بس هاي هية الحياة كلما نعدي مرحلة راح نحس بنفسنا دة نكبر اكثر واكثر، وبعد كدامي هواية مراحل من حياتي راح امر بيها. وان شاء الله تكون خير مثل ما اتمناها واعديها على نجاح مثل كل المراحل الي مريت بيها بحياتي.
ومن احدث اخباري، هي سفرتي الى سوريا الى اتمنى تكون حلوة وخاصة راح التقي بصديقتي يوني هناك، واكيد احاول استمر على البلوك واكتب عن الي يصير وياية والي اشوفه، وان شاء الله تعدي هاي الفترة بسرعة حتى لو جانت حلوة لان اني مو من النوع الي احب اغيير مكاني :)
هذا البوست رقم مية الي اكتبه، اتمنى قدمت فكرة حلوة وصادقة عني من خلال كتاباتي، صح هواية احجي عن نفسي اني، وهواية احب اتفلسف، بس جنت على طبيعتي، ومثل ما اني ومثل ما الكل يعرفني.عجبني البلوك واكتشفت هواية مدونات حبيتها ومستمرة لحد الان اقرا الجديد منها، والفضل يعود لاختي موربيدو الي دلتني على البلوك..والي علمتني هواية اشياء تخصه وتخص الانترنيت بصورة عامة.
وان شاء الله راجعة على البلوك بأقرب وقت...

10 comments:

Little Penguin said...

ألف مبروك و ان شاء الله النجاح الباهر بهالمرحلة و كل مراحل الحياة

هسه دورج تندعيلي.. بعد شوية عندي آخر امتحان.. سوسيولوجي.. و اذا نجحت بعون الله أبدي جامعة شهر التاسع ان شاء الله

يلله نشوفج على خير

Marshmallow26 said...

Hello Micho,

تهانينا الحارة عزيزتي ميشو و انشاءلله دايما موفقة بحياتج وباقي النواحي الاخرى

سفرتج لسوريا راح تكون وقتية لو دائمية؟

ديري بالج على نفسج و تونسي هناك شكًد ما بيج حيل و طلعي قهرج بكل مكان تروحيلة

يلا نسمع من منج اخبار حلوة عن قريب

تحياتي
مارشو

Michomeme said...

هااااااااااااااي لتل بنكوين ومارشوووو


اني ان شاء الله ادعيلك والله يسهل عليك امتحاناتك وتنقبل بجامعة تعجبك وتتفوق وتاخذ الشهادة الكبيرة


مااارشوووو سفرتي وقتية يعني راجعة بس بعد فترة...تقريبا شهرين او اكثر بشوية راح اتونس شكد ما اكدر على كولتج..


ديروبالكم على نفسكم..



المرة الجاية من اجي عالنت اريد اشوووف كومنتات اكثر...


لان دا اجي بالاسبوع مرة تقريبا للنت


عااااااااا


اني مدمنة عالنت شلون عايشة ببيت ما بي انترنيت ما اكدر بس راح اتحمل



يلة بااي

tofy said...

حبي مروة مبروك عليج النجاح والتخرج واتمنالج الموفقية و اعذريني لان ما اجيت بيوم الجامعة
وشكرا تووووفي

Morbid Smile said...

توفي ؟؟؟

Morbid Smile said...

فوسوووو
مبروك النجاح و بداية رحلة جديده و ان شاء الله تتوفقين بكل شي تسوي و تحققين كل احلامج
تونسي بسوريا و سلميلي على الكل و اتمنى لو اني وياكم بس (جا شسوي)هعهعهع
من تخرجت من الكليه توقعت جانت هاي اخر مره امتحن بيهه بحياتي بس بعدين بديت اقره مرة ثانيه و عندي بعد كومه امتحانات.. و الحياة نفسها اكبر امتحان بالنسبه النا, و اني متأكده راح تنجحين بيه
;)

مو تنسون تدزولي صور
امموووااااح

Michomeme said...

توفي؟؟
خالو؟؟
عااااااااا
مستحيل..
شلونك مشتاقتلك مكانك خالي هنا والله، تسلمي خالو، ولو زعلتني منك لان ما جيت بس يلة تصالحنا
نبقى طول عمرنا اصدقاء مو بس خال وبنت اخت..
ديربالك على نفسك وكولي انت استلمت النتيجةلو بعدك؟
نجحت؟؟
لوو مثل العام؟
هعهعهعههع



سوسو موربيدو بدعتي بكلامج تسميلي الله لا يحرمني منج، مشتاقتلج هواية وكل يومية اكول لو سوسو ويانة جان صارت احلى ان شاءالله نرجع مرة ثانية ورجلي على رجلج هعهعهعهع
يا ربي يوم الج وتاخذين مو بس ماجستير وانما دكتوراه
احبج

attawie said...

مبروك ميشوووووووووو
ان شاء الله تحقيق الاماني و سفره سعيدة

يعني وصفتي فرحا و حزنا بيوم التخرج
سلام للعائله

bo9ali7 said...

alf alf mabrook

-_- said...

السلام عليكم

انت واحد من اثنين اختارهم شارم ليمثلوا بلادهم في مدونة (مدونوا العالم المتحدين ) و التى يمثلها اكثر من 30 مدون من حوالي 20 دولة من كل قارات العالم و هي اول مدونة عالمية على بلوجر
تم اختيارك بناء على دراسة اجراها شارم لمدة شهرين لمدونات تفيد القارئ و تقدم الفكر المحايد و تسمح لوجود الاختلافات في وجهات النظر على صفحاتها
وجودك معنا يشرفنا
في حالة الموافقة يرجى ارسال ايميل الى العنوان التالي خلال
sharm_lover@hotmail.com
يحمل اسمك المستعار و سنك و اسم مدونتك و ايميلك و سيتم ارسال الدعوة الخاصة لدخول مدونة (مدونوا العالم المتحدين )حتى تتعرف على اعضاءها و اهدافها الذي يتقدمه اثبات ان اختلاف لغاتنا و اعراقنا و دياناتنا و توجهاتنا لا يعنى ابدا بعدنا عن بعضنا البعض او كراهيتنا لبعضنا البعض و اننا يمكن ان نجعل عالمنا سعيدا اذا استطعنا سماع اراء الاخرين التى تعبر عنهم و قول اراءنا التى تعبر عنا

شارم