Tuesday, October 16, 2007

Happy Birthday To Me


صارت الساعة 12 وبديت اسمع رنة المسجات والمكالمات على موبايلي، شكد حلو من كل الي اعرفهم واحبهم يتذكرون يوم عيد ميلادي ويهنوني ويعايدوني، بس خالي يكول ما المفروض الشخص يفرح بيوم ميلاده، بالعكس، المفروض يحزن، لان نقص من عمره سنة وبدة يكبر ويمشي بي العمر، بس اني ضد هاي الفكرة، ماكو شخص من يكون وية نفسه ويفكر شلون عاش حياته ومر بمراحل معينه يتمنى بيها لو يبقى عمره وما يتغير، مثلي لمن صار عمري18تمنيت ،ولو هو شي خيالي، ان ابقى على هذا العمر وما اكبر، لان جانت مرحلة رائعة من حياتي وبيها احلى الذكريات، بس من صار عمري19 تمنيت ان ابقى 19 لان هم شخصيتي تغيرت وتعرفت على ناس اكثر ودخلت لمجتمع الكلية وصارت الي حياتي وكياني الخاص، بس كلت لنفسي الى متى اني كل سنة اتمنى ابقى على عمري نفسه وانقهر لان دا اكبر والعمر بية ديمشي؟ هو شر لا بد منه، الانسان يكبر، والحياة تمشي بأتجاه واحد، وما ترجع للخلف، فقررت صدك افرح بيوم ميلادي، لان خلقني رب العالمين بشكلي، وخلاني بين اب وام مستحيل الكي شبيه الهم، وعندي اخت صح وحدة، بس ماكو مثلها، وعشت مراحل حياتي بأحلى ما يكون، والحمدلله مريت بمواقف حلوة ومرة بس استفاديت من كل هذي المواقف بشكل ايجابي، ورب العالمين وفقني بكل خطوة اختاريتها، عرفت شلون اختار صديقاتي، وشلون احافظ على صداقتهم وعلى علاقتي باللي احب واني متأكدة لو ادور العالم كله ما راح الكي مثلهم، ولا طيبة قلبهم، ولا حبهم الي وتعاملهم وياية..بكل عيد ميلاد دائما الشخص يتمنى امنية، اني امنيتي بسيطة..واتمنى ربي يحققها الي، يارب لا تحرمني من كل الي احبهم..

وخليهم طول العمر وياية..


HAPPY BIRTHDAY TO MICHO...MEEEEE

4 comments:

layal said...

اول المهنئين علي البلوغ :-)
كل عام وانت بألف خير

Yoda said...

عييييييييييد ميلاد سعيييييييييييييييد ويا ربي العمر كله سعادة وهناء وسلامة ومحاطة بكل الي تحبيهم .

وصدك صدك صدك من كل قلبي يا ربي يحققلج كل امنياتج وخصوصا الامنية البسيطة .
ويا ربي امنيتج البسيطة تعمم على بلدنا وكلنا نعيش بسعادة وامان ..... يــــــــــــا رب
آمين

يودا العجوز

Marshmallow26 said...

Hello Micho,

Welcome back, Ayamich Sa3eeda and Happy Birthday to you :)

I missed your writings girl!

LionKing said...

God create the Sun, moon, sky, oceans, nature... etc in an individual and give each one of them feature and meaning, please tell me how did you have all the features in one meaning !!

^*^*^*^ HAPPY BIRTHDAY ^*^*^*