Wednesday, November 07, 2007

صديقتي زعلانة مني

صديقتي زعلانة مني !!؟؟
لان ما اسأل عليها !!
يعني والله موقف ما جنت اتمنى امر بيه، وخاصة هالفترة لان نفسيتي فد مرة مو زينة وبالكوة دا اصبر روحي، يعني اتصلت بيها بالضبط يوم 31\10، وحجت وياية ببرود قاتل !! واني ما احب هاي الطريقة بالكلام خاصة من اعرف نفسي اني ما مقصرة وياها وما استحق هاي الطريقة بالتعامل، بس من اعرف اني غلطانة وياها ساعتها ما اتضايق من طريقتها بالكلام، المهم كالت الصوت مو واضح وماكو تغطية هنا لان اني بالسيارة، كلت الها اوكي من توصلين بس دكيلي مسد كول واني اتصل بيج، وانتظرت، انتظرت، انتظرت، وماكو صديقتي، كلت احتمال انشغلت وما اتصلت، وانتظرت ثاني يوم، وثالث، ورابع، وخامس يوم، وسادس يوم، كلت خلي اتصل بيها، وردت اكوللها تزورنا العصر هي وامها واختها نشرب كهوة ونقضي وكت لان اعرفم يحبون هذي السوالف، فأتصلت البارحة، وظليت انتظر تجاوبني وما جاوبت، كلت اكيد من تشوف المكالمة مني راح تتصل او تدكلي مسد كول، وانتظرت وهم ماكو، اخيرا قررت اليوم اتصل بيها وورة فترة طويلة كلش جاوبتني وببرود، سلمت عليها، وكتلها شبيج؟؟ كالت ما بية شي...كتلها شو ماكو لا تتصلين لا تسالين واكولج اتصلي بية وماكو، ومن اخابرج اني تكولين ما اكدر احجي وصوتج مو واضح وتروحين، ومن اكول من يصيرلج وقت بس مسد كول حتى ارجع اخابرج وانتي ولا تعبريني وشايلتني من حساباتج، جان تكول، انتي ما تسألين عني، وناسيتني، واني ضايجة وماكو انتوا ناسيني ...ومتخابرون انتوا، ما تسالون......وانكطع الخط لان الشبكة جانت ضعيفة!!
اني الي اتصل بيها وانتظرها...صرت ما اتصل وناسيتها!!!
اني الي كل الي اطلبه منها ان تسويلي مسد كول وارجع اتصل بيها....صرت ما اسأل عنها !!!
صرت اعصاب، تنرفزت، انفعلت، كرهت الدنيا كلها، وما رجعت اتصل بيها...وما ادري شأسويلها...
مو وكتها ابد تتصرف هيجي وياية
هاي بعد عشرة 8 سنين سوا...

3 comments:

LionKing said...

كل شخص ياميشو ممكن ان يتعرض لضغوط وضروف بعضهم يفضل ان يبوح بيها والبعض الاخر يريد من الناس اللي قريبين علية همة اللي يحجو علمود يعرف ويعرفون معزة احدهم للثاني .. اعرف اعتزازك بصديقاتك لاي حد بس مايوصلك الموضوع الى ان تكرهين الدنيا لان اذا جان تاثير صديقتك كرهك كل الدنيا لعد وين حبك للباقي اللي بالدنيا وانتي معروفة بطيبة كلبك .. الموضوع احس بي شخصي كلش وجان ممكن ان تكتبي بطريقة ثانية تحجين بي على التواصل وية الناس وشلون يكون المفروض ولا يحتاج ان يكون بهذي التفاصيل .. يجوز باللحضة اللي كتبتي بيها الموضوع جنتي عصبية .. وترة الاشخاص القريبين مهما حسو منا او حسينا منهم بالتقصير .. يرجع اكو البذرة الاولى اللي انزرعت بداخل كل شخص تجاه الثاني بالحب والتواصل .. صيري اقوى ميشو لان الحياة تستوجب ان تواجه ... الله يصفي كلوب كل الناس

immarogy said...

و الله اني نفس الحاله بالضبط و اني وياها 7 سنين بس جانت دا تحجي و ياي على الياهو و تكلي انسي لينا ماكو لينا
اني مموجودة
روحي و يا اصدقائج
و دا تهددني بانه تجيب ابوها عليا جماله شلون عين قويه و الله اني انصحج لا تحجين و ياها و هي ترجعلج رجعه الجلب لصاحبه و لا تسوين مثي اني قبل عصبت و تنرفزت و صرت اعصاب بس ردت اموت تركيها و تصرفي و ياها بهدوءو ببرودة اعصاب مثل ما هي تسوي وياي بحيث تشقين بطنها و ضلي قويه و متماسكه و تذكري اكو هوايه ناس يحبوج و يحترموج غيرها و لا تنقهرين و لا ينشغل بالج مثل ما صار بيا و انقهرت اوكي يلا انشاء الله تنفرج و يانا مع انو هذا الشي صارمستحيل بنضري

immarogy said...

و الله حقج و اكثر