Saturday, November 24, 2007

افكاري..


حياة ما بعد التخرج حياة جديدة، يحس الانسان بيها وكأنما شخص ثاني، شخصيا احس بنفسي كبرت، او مسؤولياتي بحياتي اختلفت، لازم اخطي خطوة ثانية تحدد مستقبلي، حياة الطالبة الجامعية والعلاقات الاجتماعية والامتحانات والدراسة والاساتذة والاصدقاء كلها انتهت وبديت اشوفها بأطار ثاني مختلف عن نظرتي قبل التخرج، صدك احس بنفسي اكبر، هو الاحساس هذا حلو، بس لكوني جنت دائما اتمنى ان ابقى بمرحلة معينة من العمر(ولو هو شي مستحيل ومو منطقي) لان تكون ايامها واحداثها مميزة بالنسبة الي، بعدني اكون ما بين فرحانة لوصولي لهذي المرحلة والحمدلله بتفوق، وكوني واثقة من الي اكدر اسوي واحققه حتى اعيش بشكل اني اكون بي راضية عن نفسي واكون عد حسن ظن كل الي يعرفوني، وما بين خايفة من المسؤولية الي راح تكون علية بالمستقبل الجاي.


العطلة الي فاتت جانت حلوة كلش بالنسبة الي، كدرت اسافر واطلع، والتقيت بوحدة من اعز صديقاتي واقربهم لشخصيتي، واكدر احجي وياها واتناقش واتفلسف على راحتي واعرفها تفهمني مثل ما تفهم نفسها، جانت السفرة هذي فرصة الي حتى اشوفها، اعتبرها ملاك واجاني من السما لان صدك تعرف شلون تخليني استرسل بأفكاري واحجي الي بداخلي الها بعفوية ودائما اطلع بنتيجة حلوة بنهاية النقاش وياها. للاسف جنا نحس اني وياها انو دورنا بالحياة انتهى، خاصة تخرجت وبعد ما عندي شي اسوي بحياتي، جنت متعودة على الدراسة، واكو شي يدفعني ويشجعني ان اقرأ واطور نفسي اكثر باللغة الفرنسية واتخرج واني عندي لغة ما اكول مضبوطة مية بالمية بس في تحسن دائم، بس من رجعت من سوريا وتذكرت كلام صديقتي، فكرت، كلت دوري ما انتهى لهنا، اكو بعد حياة، مستقبل، بغض النظر عن كل الظروف الي تصير بالعراق والي هواية تحد من امكانياتنا بتحقيق طموحنا، بس الحياة لازم تستمر، ما اكدر اخلي ايدي على خدي وانتظر لحد ما تتحسن الظروف، ولا اكدر العن الحظ الي وصل العراق لهذي المرحلة، لازم اسوي شي لنفسي، لازم اطلع من هاي الفقاعة الي اني بيها، ظروف مناسبة اولا، اني لازم اشتغل على نفسي، لازم احقق انجاز مهم على الاقل اني اشوفه مهم بالنسبة الي، ما يصير اخذ الشهادة واكعد، مو هذي شخصيتي الي اعرفها، ولا اكو من يمنعني ويفرض علية شروط بأن اتوقف لهذا الحد، على الاقل اني تخرجت، اخذت شهادتي، بينما صديقتي لحد الان ما كدرت تكمل دراستها بسبب ظروفهم الخاصة وسفرهم خارج العراق، رجعت من سوريا وكلي امل ان اتخذ هيجي قرار، وفكرت بصديقتي الي ما توفرت الها فرصة اكمال الدراسة، وبقلبي الها كل يوم دعوة من الله بأن تحقق طموحها وتكمل دراستها وتحس بنفسها كملت مرحلة جديدة واكو بحياتها انجاز، مو حلو الشعور بالاحباط، لازم نحاول ونحاول ونتشجع انو ما نخاف من المسؤولية ولا نخاف من الاختلاط بمجتمع العمل، لان اكيد الناس الي ممكن التقيهم بالعمل يكونون مختلفين بأخلاقهم، بتفكيرهم، بتصرفاتهم، بنظرتهم للمقابل عن الي عشت وياهم اربع سنوات بالكلية، كل الي جنت احتاجه ان اشجع نفسي واخلي كدامي هدف انو لازم اطلع من الي اني بي، لازم ابدي مرحلة جديدة واخلي مبدأ الانجاز كدام عيوني، المهم احاول، استكشف، وامر بتجارب بالشغل ووية الناس، راح يساعدني هذا الشي ان يكون عندي امل مرة ثانية بخصوص حياتي العملية، وان ابقى مثل ما اني نشيطة لان كعدة البيت تسبب الاحباط.


راح ابدي رحلة البحث عن الوظيفة، ولو المسألة مو هينة، بس لازم احاول، وان شاء الله الله يوفقني ...

10 comments:

Anonymous said...

ميشو
الحياة امامك وستعملين وستحققين ذاتك وستعتمدين على نفسك..ربما انت الان في تشوق الى ان تعملي و انا متاكد بانك ستجدين شيئا يتناسب مع امكانياتك الاجتماعية والاكاديمية وستصبحين سعيدة ولكن هل تعرفين ماهو اجمل شيئ في العمل ؟ انه الاستقلال المادي يا ميشو ! لان الانسان ومهما كانت عائلته لطيفة معه و تدعمه ماديا فلن تعوض تلك الميزة ماهما حصل ...استمري وسنتابع نجاحك ونراك تكبرين مثل شجرة حتى تصلين الى قمة النجاح ...تحياتي
نبيل العراقي .

Marshmallow26 said...

ميشو

شلونج و شلون الصحة؟
لا تكليلي نشلة و كًحة كلنا هيجي

شوفي عزيزتي تفكيرج كلش حلو و يدل على انو انتي انسانة طموحة و تحبين الحركة
دوري على شغل
واذا ملكيتي قدمي عالماستر
او لكي اي وظيفة وقتية بمكتب ترجمة

حرامات هالعلم اللي اخذتي يندفن بالبيت

good luck for you dear

Michomeme said...

شكرت نبيل على كلامك وتشجيعك وان شاء الله اجد الوظيفة المناسبة لي، قد يكون الاستقلال المادي شي مميز ايضا، لكن صدقني هدفي من الوظيفة للتواصل مع المجتمع، لاحساسي بأن لي دور مهم في هذه الحياة..




مارشو..
سلامتج يمعودة، اني همزين راحت النشلة والكحة ببداية البرد..سلامات..
انتي شلونج وشنو اخبارج؟؟
تدرين مارشو اني كلش عاجبني اقدم عالماستر بس للاسف باب التقديم للماستر بكلية اللغات وقسمي بالاخص مغلق الى اشعار اخر..بس تصير فرصة اقدم اذا الله راد..
بس انتوا ادعولي وان شاء الله الكي الوظيفة..

LionKing said...

ميشو .. النت بهذل احوالي للوصل الى هذي الصفحة .. دورك بالحياة متجدد من فترة الى ثانية .. وثبات نفسك لنفسك شي وللاخرين اشياء ومو شي ثاني .. طالما حبيت ادق تفاصيل تفكيرك وتحليلك لادق الامور .. طالما الكل يحبك وهواية يحبوك ف اكيد راح يقدمون الك الدعم باللي تتمني .. سددي على اهدافك وان شاء الله يكون الحظ والخير من نصيبك ..

Ammaro said...

حياة المدرسة و الجامعة غير حياة العمل... كل شئ مرتب, فترة دراسة, فترة واجبات, فترة امتحانات, فترة اجازة... و اذا سقطت في مادة ترد تكررها... الحياة فيها اصدقاء و لعب و ضحك... اما بعد الجامعة ترى الحياة شئ ثاني.. شئ ما كنت متوقعه, حياة يعتمد فيها الشخص على نفسه, حياة مبنية على المال و المسؤوليات, حياة غير... و ان شاء الله تلقى الشغل الي في بالك,

Yoda said...

ميشو....
ان شاء الله تتوفقين بكل الي تريديه وتمنيه ويا ربي دائما محاطة بكل الي تحبيهم .

نصيحتي الج انه ما دام انتي دتتسلقين الجبل فخلي عينج دائما وابدا على القمة وميهمج المصاعب وتذكري كل عمل يتضمن بداخله الجزاء عليه.

مجرد الرضا عن النفس بعد تحقيق الانجاز او الهدف يكفي حتى تكولين اني سويت شي واخذت الجزاء عنه.

هذا شعاري واتمنالج التوفيق ياااااااااا رب بجاه النبي

يودا

Yoda said...

بوست جديد

بوست جديد

بوست جديد

attawie said...

ميشو
اول شي احب اهنيج على تفكيرج و اتمنى كل البنات الي بعمرنا يفكرون بنفس الطريقه.
صحيح الحياة تجارب و احنا كلما تعحبنا تجربه تنمنى تطول.. بالاعداديه نتونس و انكول احلى فتره. تجي الجامعه و نفس الشي.. بس حياه بعد التخرج اكبر و اشمل و هي الحياة الواقعيه الي صدك الواحد يبدي يقرر منو هو شنو يريد يصير..
ان شاء الله موفقه و تلكين الشغل الي تتمني.. و مثل مارشملو اكول اذا مو الشي التتمني شوفي شي مؤقت.. لان اول فتره الواحد يبقى يجرب هنا و هناك الى ان يلكى نفسى بالشغل و يكول اي هذا الي اريد اسوي بحياتي.
تحياتي للاهل

Michomeme said...

لايون كنك..
واحب اكولك طالما كلامك جان مصدر تشجيع الي، هو الي حفزني اكثر على مسألة الشغل وان ما ابقى كاعدة بعد التخرج..ان شاء الله ما بقى شي على مسألة انتظاري للوظيفة حتى اعرف صارت الي؟؟ او ادور مرة ثانية..


ammaro.com

شكرا على كلامك الرقيق وعلى زيارتك لموقعي...واهلا وسهلا بيك..



يودا..
شكرا على كلامك وتواصلك الدائم..ويعجبني ان تشاركوني بنصائحكم وتجاربكم والي تعلمتوا منها..وان شاء الله يا رب الله يوفق الجميع..

وراح اكتب بوست جديد قريبا..




أتااااوي
ما تتصورين شكد فرحت من قريت كلامج، طبعا مشتاقتلج هواية، شنو اخبارج وسوسو شلونها؟؟ والاهل؟ وبيبي؟ ان شاء الله الكل بخير وبصحة زينة..
كلامج ورأيج يهمني، واكيد اتاوي ممكن تجربة العمل الي راح الكيها لو تعجبني لو ما تعجبني بس المهم اتكييف بيها واحاول الكي نفسي باللي دا اسوي..

اخبار الدراسة شنو؟ ان شاء الله بالتوفيق دائما..
وسلامي للاهل..

THE ROYAL said...

بسم الله الرحمن الرحيم
طبعا كلامك 100 بالمية صحيح
بس ما ادري منين عندك هاي الروح المتفالة بالحياة
يعيني اني عراقي و مغترب
و ما اعرف شسوي بالحياة يعني تقريبا اني وضعي مثل صديقتك اللي كلتها بالمقالة
و الحمد لله وضعي احسن من الوضع اللي انتو عايشين بيه الله يساعدكم
بس ما اعرف شبيه!!!!