Wednesday, February 20, 2008

مرحلة جديدة

هلو من جديد..
اعرف تأخرت هواية حتى كتبت هذا البوست، لكن انشغالي بالفترة الماضية منعني ان اكتب واستمر على البلوك، بس اني وعدت انو حتى لو تأخرت عليكم راح ارجع من جديد. من بعد التخرج صار لازم ادخل مرحلة جديدة بحياتي، انتهت فترة اللعب كما يقال ولازم اعمل لنفسي شي، من اكبر التغييرات الي ممكن صارت بحياتي واكدر اتكلم عنها بالبلوك هو خطوبتنا اني ولايون كنك، ومن بعدها العمل.
طبعا لايون كنك كان من اول المشجعين الي وكان اله اثر كبير على حصولي لهذه الفرصة، والحمدلله بدأت بالمباشرة بالعمل من اكثر من اسبوع تقريبا، اول فترة واجهت صعوبة لان مكان جديد ومجتمع جديد، التقيت بأشخاص ما اعرف اي خلفية عنهم وعن شخصياتهم، واحساسي بكبر المسؤولية الي القيت على عاتقي، اضافة الى عدم تنظيمي لوقتي ويومي بحيث ارجع من العمل وما استغل الوقت الكافي بالشكل المناسب، فتعبت لدرجة كرهت حتى الشغل من مجرد مباشرتي في ليومين !!
لكن الحمدلله تجاوزت هذه المرحلة، بدأت انظم وقتي بشكل مناسب، حتى ارجع للبيت واخذ كفايتي من الراحة باقي اليوم مثل الايام العادية، لكن نفسيتي احسن والحمدلله واكيد بفضل الله واهلي ولايون، كنت محتاجة ان اركز على نفسي وعلى اهمية العمل الي بشكل ايجابي، ما تخيلت نفسي في يوم من الايام ان اوصل لهذه المرحلة، "مثل ما يكول لايون كنك مرحلة قبل لا يطلع الوحش" ههههههههه، بس كلو تمام لحد الان، وبدأت اتعود على هذا الاسلوب الجديد بحياتي واحبه، حتى من ارجع للبيت ما اشتكي من تعب ولا اتذمر من شي.
كل ما اوصل لمكان عملي اتذكر صديقاتي الي لحد الان بأنتظار ايجاد فرص عمل الهم، منهم من توظفت وبمكان مريح ومنهم لحد الان تنتظر خبر قبولها بالعمل، والباقي ما مفكرين ان يشتغلون نهائيا، لان اغلب الشغل هذه الايام يتطلب معرفة على الاقل بالكومبيوتر وبرامج الأوفس، الي قليل من البنات يعرفون استخدامه وبالاخص "الآكسل"، حتى وحدة من صديقاتي كلما اقترح عليها ان تقدم طلب تعيين بمكان معين، تجاوبني " ما اعرف اشتغل على الاكسل ولا اتكلم انكليزي بشكل جيد، وين ممكن اشتغل؟" واسباب اخرى من ظمنها سوء الوضع الامني طبعا.
جان الطريق الوحيد الي ممكن امر بي بشوارع بغداد، والمكان الوحيد الي اندل ان اروحله لوحدي هو الكلية، لان لمدة اربع سنوات اني اروح للكلية وطبعا وية السائق، فما جنت اشوف شوارع بغداد الباقية ولا احس لآي درجة من التخلف احنة واصلين، ولا حتى بقية الناس شلون عايشين.
شوارع بغداد مليانة بالحواجز الكونكريتية والسيطرات العسكرية والازدحامات المزعجة جدا، عدا صور مجموعة من رجال الدين والسياسين الي وين ما اروح اشوفها، وشعارات مكتوبة بمختلف الاساليب، ضد او مع مجموعة من المليشيات والاحزاب المختلفة بالعراق، وطبعا مع مناظر القذارة والبنايات المتهدمة بسبب الانفجارات او الهجمات المسلحة على كل المناطق الي امر بيها بطريقي للشغل.
بس احلى شي ممكن اشوفه بالشارع وجود شابات بعمري يستقلون سيارتهم الخاصة، طبعا هذا المنظر صار شي نادر بعد الحرب خاصة بعد ازدياد حالات التسليب والاغتيال والخطف، بس منظرهم حلو، يرجعني لآيام حلوة عشناها قبل الحرب. جنت دائما اتخيل نفسي من اداوم سنتي الاولى بالكلية ان تكون عندي سيارتي الخاصة لكن للاسف بسبب الظروف اني اخاف اروح لآي مكان لوحدي لهذا ما افضّل ان يكون عندي سيارة بالوقت الحالي، لكن ان شاء الله اول شي ممكن احققه "أذا" صارت الظروف الامنية بالعراق مناسبة هو ان اشتري سيارة. :)
هذا كل الي اكدر اكتبه لليوم، ان شاء الله بالايام الجاية تكون عندي مواضيع او حتى لو مواقف او افكار جديدة اشارككم بيها، وان شاء الله راجعتلكم بأقرب وقت..
الله يحفظ الجميع يارب
ميشو

11 comments:

Sandybelle said...

هلو خاله ميشو.اكول خاله احسن,مو؟
هاي اول مره الي هنا, ما عندي شي اكوله غير انشالله التوفيق بالحياة دائما.والنجاح في كافة المجالات.
وسلام مع تحيات حاره.

Michomeme said...

هلو ساندي بيل، يا خالة؟؟ ترة اني مو جبيرة كلش يعني، صيحيني ميشو..وان شاء الله الموفقية للجميع وشكرا لحضورج وسلامج الحار.

Anonymous said...

اهلا ميشو
الحياة بالعراق صعبة لكن هالصعوبات ان شالله في يوم من الايام راح تعد في خبر كان و تصير من الذكريات .. حبيت فيج اجتهادج في ظل هالظروف قدرتي تاخذين الشهادة و تحاولين تعيشين حياتج الطبيعية
بالتوفيق يارب في كل خطوة تخطينها
سعيدة للتعرف على مدونتج :)
ورق مخطط

http://wara8mu5a6a6.wordpress.com/

Sandybelle said...

اوكي,ولو اكو احراج..بس راح اتجاوز هاي المساله..اني راح اضيف البلوك مال حضرتج المالتي البلوك رول..شكرا رد حضرتج كلش حلو

Marshmallow26 said...

هلو ميشو,

الف مبروك على الوظيفة الجديدة و خير ما سويتي

انشالله تستقر الامور و تشترين سيارة و تفرفرين بيها بلا خوف
واتمنالج كل التوفيق بحياتج و بعملج

مارشو

Michomeme said...

ورق مخطط:
شكرا على زيارتج وكلامج الحلو وان شاء الله الله يوفقنا جميعا، الحياة صعبة بالعراق لكن لازم نستمر، اذا احنة توقفنا لحد معين فالوقت لا يتوقف ولا ينتظر ابدا..
خلينا نقرا تعليقاتج وكلامج، وتسعدني زيارتج للبلوك..

===========================

هلو ساندي..لا مو قصدي احرجج لعد كوليلي خالة، لان صدك بيني وبينج فرق مو قليل بالعمر مو؟
حلوة منج خالة..
وضيفي مدونتي وشكرا لان حتكون وحدة من مدوناتج الي تتابعيها دائما..


=============================
مارشوووو:
شلونج وشنو اخبارج؟ شكرا حبيبتي على كلامج الحلو ويارب الله يوفقج وتحققين كل الي تتمنيه..
طبعا اذا صارت الظروف زينة ومستقرة واشتريت سيارة شنو رأيج اعزم نفسي واسويلي زيارة الج :d

كولي ان شاء الله

Yoda said...

مبرووووووك مرة اخرى وما اكول لج عيني لا يزعل اخووووية لايون كنك ههههههههه

مبروك اختي ميشو والله يوفقج اكثر واكثر انتي ولايون

كل خطوة جديدة تحمل بين طياتها اثر حلو واحساس بان الانسان دخل معركة الحياة ومثل ما يكولون


اتعب تلعب .....مبروك وان شاء الله بالتوفيق



يودا

LionKing said...

مبروك زوجتي العزيزة على حب الناس الك بالبلوك الهي يقدرلك الخير ويمكني أكثر لأسعادك .. لايون ميشو

Sandybelle said...

هلو خاله, اني فعلا اشكرج عله ذوقج العالي لان زرتي مالتي البلوك, اني فعلا شاكره.
سالتيني عله سن شاين, اني كتبت هلمره بوستين الاول عله اول اسبوع, والثاني عله هذاالموضوع. بلكت اتصير الفكره واضحه.. وشكرا يا احلى خاله ميشو بلكون.

Michomeme said...

Yoda
شكرا اخوية وتسلم على كلامك الحلو وزياراتك المتواصلة، ان شاء الله الله يوفق الجميع وما يضيع تعب اي شخص يسعى ان يحقق طموحه وحلمه..

يودا اكتب بوست جديد ترة دننتظر..
:)

***************

لايوني، شنو احجي وشنو اكول؟ الله يقدرني اسعدك طول العمر..

***************
هلو ساندي شلونج؟ تسلميلي حبيبتي على زياراتج المتواصلة، واني صرت من متابعين البلوك مالتج
تواصلي دائما واني اول من يشجعج..

خالتج ميشو

Marshmallow26 said...

هلو ميشو طبعا عيني
تعالي يمي
و اضيفج بعيوني