Thursday, April 20, 2006

ارهـــــــاصـــــات شابة!!

you raise me up so i can stand on mountains
you raise me up to walk on stormy seas
i'm strong when i'm on your shoulders
you raise me to more than i can be...
واو على الكلام الرائع، شكد ما اسمع هاي الاغنية ما امل منها.
أعرف صارلي فترة طويلة ما كتبت شي بالبلوك ،بس عندي اسبابي
كان الاسبوع الماضي من اصعب الاسابيع، اولا: لان كان عندي امتحان التاريخ الخرافي...واكثر الوقت كنت اقرأ ، ونفسيا كنت تعبانة لان الظروف الامنية سائت خلال هذي الايام، الحرب قامت خلال اليومين الي راحوا، ناس انقتلوا وناس قتلت والرعب صار صفة ملازمة للعراق واحنة كاعدين ننتظر الفرج من رب العالمين وندعي يا رب احفظ العراق والعراقيين..يا رب زيح الهم عنا..واحفظ اهلنا واصدقائنا واحبابنا ولا تحرمنا منهم..وتعدي الازمة على خير ويحفظ الجميع.......
السبب الثاني ونتيجته الاوضاع الامنية..وحدة من صديقاتي المقربات راح تسافر لفترة معينة وما ترجع الا على بداية الامتحانات النهائية..وهذا الشي صدمني وانقهرت عليها لان دا اشوف الوضع شلون يغير احوال الناس ويأذيهم، كله قتل واختطاف وما خفي كان اعظم...قبل سنة صديقتي (يوني) سافرت بسبب الظروف الامنية وهسة صديقتي (علوش) ويا عالم يجوز الدور يجي عليه واني الي اضطر اسافر واترك العراق وكلشي ورايه....
بعيد عن السياسة والاوضاع الي ما نكدر نتغاضى عنها..لان ما يصير ينتهي ونقضي عمرنا بس نحجي بهذا الموضوع..عراق..انفجارات ...الخ...وخلينا نحاول نعيش حياة طبيعية مثل باقي العالم
احاول اركز فكري على موضوع جديد شاغلني قبل فترة، اخذت فكرة الموضوع من مادة تاريخ الادب الفرنسي وربطتها بالواقع والحياة ...مادة التاريخ تتظمن عدة محاور ادبية وما يتظمنها من مواضيع تخص الفلاسفة والشعراء واحد هذي المواضيع هو الحب وانواعه...
اكتشفت ان الحب مصنف الى نوعين بالنسبة للفلاسفة الفرنسيين...
مثل الحب العقلاني وبالفرنسي
l'amour raison
الحب العقلاني هو الحب المبني على العقل وقراراته الصائبة، لا تتحكم المشاعر بالانسان ولا تسيطر على قراراته ..ومن انجح انواع الحب.. لان الانسان راح يحب الشخص المناسب اله..(طبعا هذا رأيي الشخصي انه هو افضل من ان تكون المشاعر مسيطرة على الانسان... لان راح يتبع قلبه وما يمليه عليه ..وما ينظر للأمور من ناحية الواقع والمجتمع والحل الافضل..وانما من ناحية عاطفية فقط...وهذا الشي غلط برأيي)
حتى لا يعيش الانسان بعالم الخيال والرومانسية وتكون نتيجة هذا العالم شي قاسي
والنوع الثاني هو الحب العاطفي...ونتيجة كل من النوعين على تصرف البشر ونتيجة اتخاذهم القرارات الخاصة بحياتهم الي اما تقودهم للهلاك او لحياة ولا اروع منها.
. . .
الحب العاطفي او بالفرنسي اسمه
l'amour passion
....لما قريت الموضوع صدقت الجملة المعروفة
( ومن الحب ما قتل)
لان هذا النوع من الحب يخلي المشاعر والاحاسيس هي الي تسيطر على الانسان وعلى افكاره واتخاذه للقرارات...فأكيد اذا الانسان يتبع عواطفة بكل قرار يتخذه بحياته راح يوصل لنتيجة غير مرضية..او نتيجة قاتله...مثل احد ابطال مسرحية Phedre
هذا اسم بطلة المسرحية الي وقعت اسيرة في غرام ابن زوجها (ابن زوجها لكن مو ابنها)..فهذا حب مستحيل لكن ما كدرت تمنع نفسها لان العواطف هي المسيطرة...حاولت ان تنساه لكن ما نجحت..بالنتيجة صابها الجنون..ثم الانتحار...فهذا الحب القاتل...
لما فسرت الاستاذة الموضوع بالتفصيل مع ذكر الامثلة...كالت جملة بالفرنسي عجبتني جدا
"ou tu m'aimes ou je te tue"
معناها..اما ان تحبني او اقتلك.......هم هيجي حب الواحد ما يتمناه بحياته...
ومن الجمل الي قرأتها وشفتها واقعية..
"aime qui ne l'aime pas, fuit qui le suit, se porte vers qui le fuit"
يحب من لا يحبه، ويهرب من الذي يتبعه ويتجه نحو من يهرب منه"
ذكرتني الجملة بأغنية محمد عبدالوهاب...
بفكر في الي ناسيني وانسى الي فاكرني
واهرب من الي شاريني وادور على الي بايعني...
زين ليش كل هذا التعب؟؟
ليش ما نحب الشخص الي يطلب رضانا ويكون قريب النا ويحب يكسب رضانا بأي شكل
ليش دائما نسمع قصص حب انتهت نهاية حزينة؟؟
ليش اكثر الاشخاص عايشين قصة حب فاشلة؟؟
او مجروحين من شخص كانوا يحبوه؟؟
او دائما اكو قصة وبيها طرفين..
الظالم والمظلوم
الحساس والاناني
الشخص الي مستعد يضحي بكل شي في سبيل يكسب قلب شخص معين
والشخص الي ما يقدر التنازلات الي تقدم اله من قبل شخص اخر
دائما اسمع قصص حب فشلت بسبب هذا النوع من الحب، حب من طرف واحد والنتيجة عذاب نفسي..بينما يكون شخص اخر متعذب بسبب الشخص الاول ومحد حاس بعذابه ..
الحياة شكلها هيجي؟؟
بس مجرد يعيش الانسان ويتألم بسبب هاي المواقف الي اكيد كل انسان يمر بيها
والي ما مر بموقف مشابه.. يجيله يوم ويعيش هذي الحالة
حتى سألت الاستاذة ليش اكو قصص حب تراجيدية لهذي الدرجة؟؟
كان جوابها
C'est La Vie
....
يعني شنو المطلوب حتى الانسان يحضى بشيء نكدر نسميه
The perfect love
احساس مرهف..ثقة عالية بالنفس وبالشخص المقابل؟
اخلاص تام بين الطرفين؟
قناعة تامة من قبل الطرفين؟
اتفاق الاراء ؟
تشابه الافكار والنفسيات والشخصيات وحتى البيئة الي كل شخص ينتمي الها؟
اعتقد لو توفرت كل هذي الاشياء راح يتكون شي اكدر اسميه
perfect love
راح يكون حب عقلاني مبني على اساس قوي ..واقعي..ومعقول جدا..
لكن تشوف البعض حكموا على نفسهم بالحب لشخص معين ما تتوفر بيه اي صفة مشابهة من الي ذكرتها
السؤال هنا....والي اني دائما اطرحه على الاشخاص الي عايشين مثل هيجي نوع من الحب..
على شنو حبيتي او حبيت الشخص الفلاني؟؟
لو هو مجرد حب وخلاص.؟؟
ما ادري ليش اسمع عن هذي المواضيع بكثرة واظل بحالة استغراب
ودائما يكون الحب مصاحب للمشاكل والنزاعات...
سؤالي يكون ليش هاي المشاكل كلها وانتوا تحبون بعضكم؟؟
جواب غير مقنع وما يوصل لنتيجة...احنة ما متفقين
واسال مرة ثانية...لعد شكو باقين سوة وانتوا ما متفقين وتأذون بنفسكم؟؟
الجواب يكون اسوأ من الشخصين....ما نكدر نترك بعض
اوكي الحل شنو؟؟
الجواب ماكو احد يعرفه...من الطرفين
وانطلق بصوتي واحجي من كل قلبي وبقناعة تامة
لو تتحملون بعضكم على هذا الحال الي انتوا بيه
او تتركون بعض وتريحوني من مشاكلم...عبالك بس انتوا الي عندكم مشاكل
الشرق شرق والغرب غرب ولن يتفقااااااا
فألافضل ان الشخص يحكم عقلة من يحس اكو بداخله مشاعر بدت تتحرك بسبب شخص معين
قبل لا ينجرف بمشاعره وقبل لا يوصل لنقطة معينة من الطريق..ويحس بنفسه معلق
لا يكدر يرجع الى نقطة البداية ولا ينطلق الى الامام الي دائما يكون مجهول
خلي يبني حبه على اساس قوي..من القناعة والثقة والاحترام والاعجاب وبعدها الحب

3 comments:

LionKing said...

ارهاصات ... ارهاصات ... ارهاصات .. طالما تكررت هذه الكلمة على مسامعي ولكنني كنت استعمها لغرض المزاح فلم افهم معناها الحقيقي بينما كنت انا أعيش في قلب هذه الكلمة حينما بينتي لي معناها .. فبدأت باستعمالها بمعناها الصحيح وبالشكل الصحيح .. الكل منا يمر بارهاصات تجعل من عقولنا معامل لانتاج الافكار وتحليل للاوضاع فقد اصبح صغيرنا محلل سياسي واجتماعي وامسى كبيرنا هو المستمع لمايجري ويحدث ... لا اريد الغوص بامور التحليل والتشخيص لان مهما تكلمت فانني سادور وارجع اتكلم بموضوع يخص السياسة ومانعانيه منها وانا اكرهها فعل الكره ...
لو تكلمنا عن الامتحانات فالحياة هي امتحان داخل امتحان وفي كل مرحلة من حياتنا نتوجس خيفة من شي معين ومن شخص معين او من امتحان معين او من ضرف معين ولكن بالسعي وتحدي الواقع بأمر أشكالة نحس بنهاية مطافنا ببصيص النجاح الذي نحققهه دائما من خلال نتائج ماكنا نسعى به من امتحان وضرف او مرحلة من المراحل فقد تعودنا على الحياة والتضييق فيها الى ان نصل الى مرحلة ننفجر ايجابا لتحقيق ونكسر طوق الحياة فنلجا الى مايغير واقعنا او مايجعل من هو يتدخل في تغيير واقعنا كما تامل العراقينن بتدخل الامريكان بتغيير الواقع ولكن كان املهم في غير محله ... مالنا غير الدعاء في كل وقت وفي كل محنة لنا وللناس الطيبين
تحويلتك من موضوع لاخر تجعل القارئ يدور بافكاره من منحنى جدي .. صلب قاسي .. واقعي .. الى موضوع يطير في عالم .. خيالي .. رومانسي تسمع وقع صدى خطاه ببطء مما يعبر عن نعومة الاحاسيس ويجعل منه ماهو مخلوط مابين الواقع والخيال وهو الاجمل ...

من منا ممكن ان يتخلى عن مشاعره في موقف معين ؟؟ من منا من يستطيع ان يحكم على بداية منظر معين او صورة معينة او موقف الا بمشاعره .. ولكن هل كل هذه المشاعر والحكم بها في تلك اللحظة هية صحيحة .. اشكك في ذلك فمها كان اتخاذنا لموضوع معين بالشكل العاطفي سيكون لدينا فكرة غير متكاملة عن الضرف والموقف الذي تاثرنا به اما لموضوع الحب الذي كتبتي ياسيدتي فهو موضوع مختلف جدا فعالعقل فيه متضارب مع المشاعر لم اسمع من قبل بحب بالعقل فالحب عاطفة تفوق كل المشاعر والاحاسيس ليس لحب الحبيبة فقط فالحب حب مهما اختلف المحبوب ان كان شخص ام شي مادي او معنوي كما كنا نسمع باناس يحبون وطنهم !! الحب جميل بكل اشكالة ان كان عاطفي او عقلاني ولكن يبقى الحب العقلاني هو الحب المتربع على عرش معنى هذه الكلمة وهذا الحب لانجده الا بقلة جدا حتى من يسمع به تجده يسخر من مفهوم هذا الحب !! اكيد الناس قناعات ولكل منا قناعته ولكن اتفاق الاثنان على قناعة وموضوع واحد فهو كفيل جدا بالغاء جميع الافكار التي تشوب الاطراف الثانية من المجتمع والناس وحتى من المقربين من الاصدقاء الذين نعتبرهم شركاء حياتنا .. فالحب العقلاني والذي تتحدثين عنه لن تجدي الا من النادر من يتفق عليه لان من يحب يريد ان يسابق الريح ويكسر الظلام ويقاتل الاشباح ويصل الى حبيبته !! هذا هو شكل من اشكال الحب الخيالي فهو جميل بصراعاته ولكنه سريع في مبتغاه قد حقق شي ولكن لو كان بالعقل لكان مبتغاه اجمل وأحلى وتتولد في الموضوع رغبة بالشوق لمن يحب
المبني على اساس العقل والتفكير ...
اعجبت جدا بهذه العبارة "يحب من لا يحبه، ويهرب من الذي يتبعه ويتجه نحو من يهرب منه" انها الفلسفة بعينها صحيح من تقرا قد تكون غير مفهومة ولكن تفهم من يمر بحياتة بهذا الشكل من الافكار او من يقيس تصرفات بعض الاشخاص بهذا الشكل فيجد هذه العبارة الفلسفية بسيطة الفهم جدا..

قصص الحب ولتي نسمع بنهاياتها الحزينة هي قصص مبنية بناء كامل على العاطفة تجدنا قد اثرت بنا فكرة القصة لكونها عاطفية ولكن عند دراستها بالعقل تكون نتديجة الدراسة نتيجة ترضي عقولنا ولكن لاترضي انفسنا ومشاعرنا فنبقى بصراع داخلي العقل يقول والمشاعر تقول لكن القرار الاخير للعقل اكيد ..
من نهاية كلامك بالبوست المس شي بان اكول الله يساعدك يا ميشو على اللي كلتي لان الظاهر المواقف اللي صايرة كدامك واللي حاجيلك عنها هية اللي خلتك تحجين بهذا الشكل الصريح جدا وان توجهين الاسئلة للمحبين !! اكيد لكل شخص منا خطوات يحب ان يسير عليها مثلما تعود في حياته اليومية اما الخطوات اللي وضعتيها على الحب العقلاني هي خطوات فعلا اساسية تبدا بالثقة بين الطرفين وتنتهي بشكل البيئة والواقع فلايفكر احد الاطراف بواقع خرافي والاخر بواقع جدي فالوسطية باللامور والتوازن بالافكار هي التي تصنع الاشخاص المميزين والاتفاق عليها يكون هو السبيل الوحيد لانجاح هذا الحب ... الكلام طويل جدا عن هذا الموضوع ولايمكن ان يوفي مطلقا .. سمعت صرخة صوتك تجاه هذا الشخص الذي تكلمتي عنه والذي
يضع شكل حياته الممل امامك .. انا اعرف احاسيسك تجاه هؤلاء الاشخاص فانا منهم !! ولكن البعض منهم يكثر من الشكوى بشكل ممل او بشكل متناقض جدا وهذا هو الشكل الذي يجعلك تضجرين
وتملين من نوع الشكوى اللي اساسها التناقض وية النفس اولا واخيرا ...

هذا اكثر بوست علقت عليه وعرفت ليش انتي كلتي اصلا اني كتبت على هذا الموضوع وحسيت بي هواية امور ماذكرتها اني هم عندي نفس الشعور تجاه هذا الموضوع لان بصراحة هذا الموضوع ماينتهي من النقاش والنتائج التحليلية الشخصية او اللي نتشارك بيها دائما سوية ...
كل مايدور من احداث وكل مانرى من مواقف تجعل من اللانهاية لارهاصاتنا الشابة ...

Michomeme said...

واااااااااااو واااو واااو...شووو هالكلام الحلو...
اولا وقبل كل شيء حبيت اوضح نقطة مهمة جدا جدا.. على الاشخاص الي اسمع منهم قصص الحب او المشاكل الي تتعلق
بهذا النوع من المواضيع ويبقون حايرين ويحيروني وياهم وما يوصلون لنتيجة بعلاقتهم وما يعرفون شنو يسوون...فيجون مثلا
يشكون ..اني بهاي الحالة راح يصير عندي ملل لان اثنينهم واكفين بالطريق وما يتأخرون ولا يتقدمون اي خطوة بطريقهم
تغيرهم من الحال الي همة بيه وينتقلون الى مرحلة ثانية مختلفة..الي تكون اما الاستمرار سوة ومحاولة تغاضي الاول عن عيوب
الثاني والثاني عن عيوب الاول الي تسبب المشاكل..او الانفصال ويشترون راحة قلبهم بدل هذا التعب النفسي ...
فما يوصلون النتيجة معينة...
اني بطبعي ما احب يكون الشخص معلق بأي موضوع بغض االنظر عن الشي الي دا احجي عنه..اذا كان حب..عمل..
دراسة..او اي وضع اخر..احب الكه الحلول..وما ابقى حايرة وادور على الحلول...مع العلم هي موجودة..بس
ما استعين بيها...فهذا الشي الي دة يصير وياهم ..انه اكو حلول بس ما ياخذون بيها...


لكل مشكلة و الها حل...اما اي او لا..وتنحل كل القضايا..الي تخص موضوع الحب...بصراحة تعبت من بعض
الاشخاص الي واكفين بنص الطريق ويعرفون انه الطريق الي يمشون بيه نهايته ما توصل لنتيجة زينة...

اما النوع الثاني من الشكوى...الي عرفت شنو تقصد بيها..فما اعتقد اكو صديق يمل من شكوى صديقه...بس اعترف
بشي اني امل من شكوى بعض الاشخاص الي اعرفهم وتربطني بيهم صداقة قوية لكن يشكون بطريقة مملة
اني ما اعتبر الارهاصات والامور النفسية الي يذكرها الاصدقاء هي نوع من الشكوى الي توصلني للملل..بالعكس..لان اني
هم احتاج الى من افضفض له ويسمع ارهاصاتي و يعرف شنو الي بيه..

لكل شخص شكل حياة ممل خاص بيه..واعتقد حسب الاوقات والنفسية..مرات تشوف الشخص سعيد ومرتاح ومرات
تشوف نفس الشخص تعبان وحزين ...وعلى كولة نانسي عجرم
" قولولوه انا برضو ساعات في حالات..مرة ازعل مرة اديلوه عيني..من فينا على حالو كل الاوقات..دة تعبني قوي
طلع عيني"
يعني كل واحد بينا يمر بحالات نفسية معينة نحتاج ان نلكة الشخص الي يفهمنا ونشاركه باحساسنا..باللي يفرحنا وباللي
يحزننا...فهنا ما لها علاقة بالشكوى الي امل منها..

...نرجع على بداية الكلام...احلى شي من عرفنا معنى ارهاصات شنو...طبعا اني م ما جنت اعرف معناها بالضبط
بس سالت بابا بوكتها وكال معناها وطلعت مطابقة للي جنت متوقعه ومستخدمها بمكانها الصحيح...بس اني بالببداية من ردت
اختار عنوان للموضوع فكرت وما عرفت شنو اكتب بعدين شفت كلامي عبارة عن ارهاصات! فانطيته هذا العنوان
تشوف موضوعي ببدايته عن الاوضاع والظروف الصعبة الي ما تنتهي وانتقالة لموضوع مختلف تماما ..خيالي رومانسي مليء
بالاحاسيس...اكبر دليل انه حياتنا عبارة عن مجموعة من التناقضات...بس تدري مرات رغم التناقضات الموجودة هم
تشوف شي حلو بيها....(بعيدا عن الاوضاع)
كلامك صح ما اعتقد انه اكو انسان يكدر يتخلى عن مشاعره بالحكم على الاشياء والبشر والمواقف ..وخاصة الحكم بالمرة
الاولى..لان دائما الانسان تتحرك عنده العواطف بعدين العقل..الله خلقنا على هذا الشي..بس مو دائما يكون الحكم
صحيح..لان برأيي العقل والقلب واحد مكمل للثاني..بدون عقل القلب ما يفيد بشي وبدون القلب العقل ما يفيد بشي...
سمعت فد يوم بشخص ما عنده مشاعر متهني بحياته؟؟ ما اعتقد... لان اعتمد بقرارته على العقل بس ومو على القلب
والحكم مو شرط الا بالحب وما يتبعه..لان الحب هو مو بس بين شخصين..هو حب اي شي بالحياة..اصدقاء..
عمل..والامثلة هواية
كتلي ما سامع بحب العقل...اني هم ما جنت سامعة بيه بس سمعت بعدها...وشفته واقعي ما ادري ليش..يجوز لان اني
واقعية...او يجوز اريد اعكس جملة..بفكر في اللي ناسيني وانسى الي فاكرني..واسويها افكر باللي يفكر بيه وانسى الي
ينساني..وهذا احسن شكل بالحياة..مو؟؟..بس مثل ما كلت انت انو لو شخصين اتفقوا على الحب العقلاني ما راح
يهتمون لكلام هذا وذاك الي يكول الحب بالقلب مو بالعقل..وكلمن ورأيه وشخصيته
فالي قصدته بالحب العلاقني هو الاحساس المبني على الاحترام اولا وثانيا وثالثا...يجي الاعجاب والتوافق والثقة وكل هذي
الاشياء لو انجمعت راح تكون النا شي اسمه حب..لان صدكني اكو حب ما مبني على الاحترام..او على الاقل تقدير
لمشاعر بعض..هذا هم نوع من الاحترام
طبعا دا احاول اكتب شي بعد بس انت ضفت اضافات بحيث كملت الموضوع..


نشوفك بخير ان شاء الله

ميشو

Michomeme said...

مرحبا سارة شلونك؟؟
الي خلاني ما اكتب بالمدونة هو سبب انشغالي بدراستي ، والامتحانات ..لكن بعدها ان شاء الله اكون متواصلة على الانترنيت..وشكرا لمرورك...

ميشو