Saturday, December 30, 2006

Happy New Year & Happy Big Bairam


اولا..احب اهني العالم الاسلامي بعيد الاضحى وان شاء الله يكون عيد خير ومبارك على الجميع وبالاخص العراقيين، وادعي من رب العالمين العيد الجاي يكون حال العراق افضل ونحس بالامان والراحة والاستقرار مثل ما جنا قبل ننعم بي ونعيش حياتنا مثل باقي العالم بدون خوف وبدون بعد او سفر او ضايع او انتظار للمجهول..لان تعبنا، كافي الي شفناه من اول يوم من الحرب ولحد اليوم، كل يوم دة يصير اسؤ من الثاني وبس الله الي يدري ليوين راح يتوقف نزف دماء العراقيين ويرجع الاستقرار..
ثانيا..احب اهني الجميع بالسنة الجديدة وان شاء الله مثل ما مرت سنة 2006 بخير وسلامة عليه وعلى اهلي وحبابي يا رب سنة 2007 تعدي ..تبدي وتنتهي بخير وسلامة على الجميع.. ما بقت الا ساعات قليلة حتى نودع سنة ونستقبل سنة جديدة، نودع وقت مر علينا ومستحيل يرجع، نتذكر تفاصيل واحداث مرت وعشناها بأبستامة او دمعة، لوحدنا او وية اهلنا واصدقائنا وحبايبنا..احب ليلة رأس السنة لمن يطلع برنامج على التلفزيون يستعرضون بي كل الاحداث المهمة للسنة الي فاتت ويتناقشون بيها، ويستضيفون المنجمين ومنهم من يتفلسف علينا وينطي احداث معقولة ومنهم من "يخربط" على راحته بالكلام..منهم اللبناني "ميشيل حايك" وماغي فرح ...والعراقي الي احتل قناة كاملة المدعو بـــ " ابو علي " .... ما ادري يعني هو جهل من الناس وقلة ثقافة حتى يصدكون بشخص مثل ابو علي؟؟ المهم...من ضمن التوقعات الي " افحمنا" بيها ابو علي انو " العراقي راح يمشي على شوارع من الجثث ولكن بعدها راح يستقر الوضع والظروف تتحسن والي اجة وية الاحتلال يروح وية الاحتلال ويرجع العراق طبيعي !!!! " احنة كلنا نتمنى ان نعيش حياة حلوة ومستقرة ونتمتع بالامان، اروح للكلية، اطلع، اعيش حياتي مثل ما كل الي بعمري يعيشوها بكل الدول ما عدا العراق، ما اريد افكر بأشياء جدية وبس هم يعجبني اكون شوية "بطرانة" ...صرنا متسامحين كلش، اكو هواية امور ما كمنا ننطيها اهمية مثل الي ننطيها قبل فترة الحرب، نحاول ما نزعل، ما نسوي مشاكل من اشياء كمنا نشوفها هسة تافهة..
من ضمن الاحداث المهمة بالنسبة الي..اكدر اكول سفر اختي جان اله اثر جبير كلش عليه، وطبعا اكو بعد احداث مهمة صارت بس ابقى محتفظة بيها لنفسي ووية الناس الي يشاركوني بيها !! بس احدث حدث عالمي صار هو اعدام الرئيس السابق "صدام حسين" ما ادري مجنت متوقعه ممكن نهايته تكون بهذا الشكل لان اكثر الرؤساء جانوا محاكمين لكن تنفيذ الحكم ابد ما يصير ونتفاجأ بخبر موت الرئيس الفلاني لآسباب صحية او مجهولة...اشمعنه صدام حسين دون عن الناس كلها مات بهاي الطريقة؟ جانوا يكدرون يموتوه او يختلقون اله حادث ويموت بي ويبين كانما حادث عرضي طبيعي جدا..ولو ما يدرون انو اعدام صدام مراح يودي ولا يجيب..ولا راح يغير اي شي بالوضع الي احنة بي واذا بي اثر فأكيد اثره سلبي جدا علينا..اني ما جنت بيوم وية صدام حسين ولا حتى ضده، ما عندي اي مشاعر تجاه هذا الشخص الي اله ايجابياته وسلبياته، بس من صدك هاي المرة من شفته على التلفزيون ويحضروه على منصة الاعدام حسيت قلبي انفطر عليه، مهما يكون هو بشر، اله هيبته، وين جان من ينذكر اسم صدام حسين نحس برهبة، من يحجي او يلقي خطاب ومن نسمع اخباره ..جان شخص فارض نفسه على الاقل بزمانه ماكو اي شخص يتجرأ يكول اني سني او شيعي، مهما يكون اله اذية على فئة من العراقيين بس صدام حسين اشرف من المعممين الي اجوي على الدبابة وية المحتل، اجونه من كل صفحة..وخربوا نفوس العراقيين بحركاته متخذه اسم الدين لكن كل عملها ماله اي علاقة بالدين...حسبي الله ونعم الوكيل..
ما اريد هذا البوست ياخذ شك او معنى سياسي، بس هذا اهم حدث صار بأخر ايام سنة 2006 وبأول يوم من عيد الاضحى، يا لسخرية القدر!!
I wish you all a happy new yearfull of joy..love..peace..succes...may God save us all..be strong, be faithfuldon't wast your time without saying thanx for the one who helped you some daydon't wast the time and have some courage to say "i love you" for the one you love..you were alive for this year...and maybe you won't be the next yearso make your best to do anything just to be loveable, respected, and forget all about hates..
merry christmas and happy new year for all

Et pour cel que j'aime...tu etais mon bon ami la deriere annee, et mon petit amoureux de cette annee et pour la vie...
joyeux noel a vous

12 comments:

iraq2006 said...

مع الاسف اكو ناس مثلكم بعدهم مصدكين بكذبة صدام حسين.. اذا كان محد يكول اني سني او شيعي لانه كانت مبينة منو السنة ومنو الشيعة.. واذا ما عندج اي شعور تجاه الطاغية فلأنه معشتي العذاب اللي سببه لبقية الشعب... ولو انت صدك عراقية وتحبين العراق مثل ما تدّعين مكان انفطر قلبج على واحد سفاح قتل وعذّب العراقيين... العراقي الصدك ميكول فئة من الشعب.. منو اللي ديفرق هسة؟

ألطيبُ said...

لحسن حظي تعرفت على مدونتك من خلال تعليقك في مدونة جتاما . راقت لي افكارك عكس ما رآه المعلق الذي سبقني واحترم رأيك كثيرا كما اود ان انقل لك اعجابي بمدونتك التي سأطرق بابها كثيرا على ما يبدو ، اما حلاوة اللهجة الراقية فلا جدال فيها رغم صعوبتها نسبيا بالنسبة لنا نحن في اقصى الوطن العربي لكن الفضل في حبنا لها ومعرفتنا بها يعود في جزء منه الى كاظم الساهر في اغانيه القديمة .. لك احترامي وتحيتي

Michomeme said...

Iraq2006
اولا..اني عراقية وافتخر بعراقيتي..
ثانيا..هي مو يسموها حرية؟ كل واحد اله رأيه الخاص بي؟ المهم الرأي الشخصي لآي شخص ما يكون بي اي ضرر على المقابل او على باقي الناس..اني حبي او كرهي لصدام حسين مراح يودي ولا يجيب..

ثالثا..اكو احساس اسمه "انسانية" الحس الانساني الي يكون موجود بقلب كل واحد بينا..بغض النظر عن انتمائاتنا..او ديننا.او جنسياتنا..هو الي يخلينا ننقهر لمن نشوف البشر يقتل بشر اخر ويحدد مصيره..والقاتل والمقتول مذنبين امام الله لان اثنينهم اذوا الشعب وشوفوه الامرين..

رابعا..اني أأمن بالمثل الي يكول ..الباب الي تجيك منه الريح سده واستريح..اني ما تعديت هذا الباب وسديته من زمان حتى ما اتعرض لآي اذى..بزمن صدام جان اكو خط احمر ما المفروض ان نتعداه..واذا تعديناه اكيد راح نلكي شي مايعجبنا او يأذينا "من تدخل في ما لا يعنيه لقي ما لا يرضيه"

خامسا..اني عراقية وما افرق..
بيوم من الايام جنت اكول ما احب صدام وما يعنيني امره بس احنة بشر وهو بشر اكيد ننقهر من تكون نهايته بهاي الطريقة وعلى ايدي مجرمين اسوأ منه..


واهلا بيك..









الطيب..اهلا بيك وشرفتنا، واشكرك على كلامك الجميل وابداء رايك..والمدونة ترحب بيك..اني زرت مدونتك وعجبتني..بيها مواضيع منوعة..
واكيد الاغاني العراقية هي الي وصلت لهجتنا الى اقصى الوطن العربي..

اهلا بيك مرة ثانية

تحياتي..

ahmed said...

العتب مو على ميشو...صدام يستاهل ميه الف شنقة مو بس وحدة...بس العتب على الناس اللي خلفوه كرهو الناس بيهم و ضيعو الفرحة من كلوبهم, يعني ترضاها عراق 2006 تستفتح عيد سلام و حب و فرح بمشهد انتقام و حقد مهما كان...لعبو نفس العالم, بالمحصلة صدام يستاهل اللي جرا له بس اللي يضوجني ذوله الربيعي و الخريفي مكيفين عبالك سوولهم نمونة...شكرا مستر ربيعي...اني متاكد لو بمكانه اي واحد من ذوله المبشرين جان بال بالعباية اللي جاي بيها, صدام الحسنة الوحيدة انه الرجال جانت ملته انت ويايه لو مو ويايه...يعني صدفت هوه من تكريت مو هوه سني متعصب و عنده حقد على ال البيت مثل المتوكل مثلا و كل شويه يجيب بطاري معاوية و المطالبة بدم المقتول الناس وصلت للكمر و احنا مجلبين بالقرن السابع...تمشي عدل ما لك علاقة تمد راسك اضربك بالقندرة هذا جان صدومي...مو هسه انت ماشي ما لك ذنب بس يكتلونك على اسمك...راحت بيهه الاخضر و اليابس...و هاي همين على السنة و الشيعة...اكو ناس تكول صدام جان مسوينا رفعة راس...عمي دطيرو...ليش هوه ما وكعنا غير هالهمبلة يكلك اني افتح فلسطين و فلسطين و هاي تاليتها...بابه لاتتشاقى هيج شقة...شوف شصار بيك ديله.
على كل كلها لعبان نفس وين متودي وجك واحد يبقى على الحاتات و البلي ستيشن هواية اشرفله.

ahmed said...

سوري ميشو حجيي جلفي...ما بيه حيل انمق...لوثت البلوك...

يابه والله مشتاقين...اتاوي وصلت هنا و مكانج خالي...
سلمينا على ام حنين.

Michomeme said...

konfused kid
يمعود اعصابك شوية، احنة صح يمكن نكول على صدام يستاهل بس بحالة وحدة ..لمن يكون الشخص الي بعده بالحكم احسن منه بس المشكلة ماكو بعد شخص احسن منه وكل الي اجوي اسوء بهواية..وترة صعبة من تشوف شخص كدامك جان رئيس وبعدها هارب وبعدها سجين ومتهم ومحكوم بالاعدام...شوف الدنيا شكد دوارة..

يلة هو الرأي الاول والاخير يكون حر والاهم يصير نقاش اعتيادي وكلمن يبدي رأيه باللي يعجبه..مو هي هاي الحرية؟والكلام الي انت كتبته منطقي..

ترة اريد اجي..ها شدة تسوون بعمان عاااااا...المهم اذا تشوف البنات سلملي عليهم هوابة هواية وكوللهم كلش مشتاقة لايامنا من جان كل الكروب يلتقي..

يلة ان شاء الله نشوفكم بخير
وسنة سعيدة عليكم

layal said...

كل عام وانتي بخير
وعساك من عواده
وسنه خير ان شاء الله علي الجميع
بعيدا عن الحرب
تحياتي

LionKing said...

أحب اهني بالسنة الجديدة وادعو بيها لكل الناس الطيبين بالخير والصحة والسلامة وادعو خصوصا لصاحبة المدونة بالصحة والسلامة والعافية والنجاح

واتمنى من الناس اللي ماتعرف توزن كلامهم قبل مايحجون بشي يسئ للذوق العام ويسئ بمستوى الموقع الراق جدا جدا ان يلكون مكان ثان يسبون ويلعنون بي براحتهم !!

Raed said...

كل عام و أنت بخير

Marshmallow26 said...

ميشو كل عام و انتي بخير و ايامج سعيدة و انشاءلله كلها أعياد

و انشاءلله نسمع بيج متخرجة من الكلية
و تحققين اللي بقلبج

Bassam Sebti said...

Happy New Year Micho! I hope this year brings all the happiness to your heart. May God protect you and your family.

2006 was a horrible year in Iraq. We hope 2007 brings some peace and hope.

Bests,
B.T.

Caesar of Pentra said...

And that's why I hate (or avoide) mentitoning ma own thoughs or opinions about politics! It doesn't make any better!
I hope you avoid posting such topics cuz it touches other people's feelings!
I hope I wasn't rude and I apologize in advance if I was!
And happy 2007!